Read Makassar Version – KITTA' MATANGKASA YOHANES 9 Bible Online

YOHANES 9 - Makassar Version – KITTA' MATANGKASA bible

YOHANES 9

¹Ri wattunna a'jappa Isa, nia'mo Nacini' tau buta battu ri pakaramula nilassukanna.

²Akkuta'nammi ana'-ana' gurunNa Isa angkana, “Angngapa nabuta nilassukang anne taua Pa' Guru? Apa lanri dosa kalenna yareka lanri dosana anrong-manggena?”

³Appialimi Isa Nakana, “Teai lanri dosana yareka lanri dosana tau toana nabuta, passangalinna sollanna akkulle nacini' taua antekamma gau' makoasaNa Allata'ala a'nyata lalang ri kalenna anne taua.

⁴Ri singara'na ija musti nijama memammi jama-jamang nipassuroanga ri Nakke. Labattui bangngia sa'genna tenanniakka manna sitau akkulle anjama.

⁵ Ilalang niakKu lalang ri anne linoa, iNakkemi Singara'na linoa.”

⁶Le'baki akkana kamma Isa, appi'rumi naung ri buttaya, nampa Naleo' anjo pi'runNa siagang buttaya. Nampa Napasapu mange ri matanna anjo taua,

⁷na Nakana ri ia, “A'lampamako ambissai rupannu ri Balang Siloam.” (Siloam battuanna ‘Nisuro’.) Jari a'lampami anjo taua ambissai rupanna. Ri wattunna ammotere', akkullemi accini'.

⁸Sikamma sambori'na, siagang sikamma tau le'baka anciniki appala'-pala' anjo taua, angkana ngasemmi, “Sai ia anne tau biasaya ammempo appala'-pala'?”

⁹Nia'mo angkana, “Ia memang.” Mingka nia' tommo angkana, “Teai ia, sangkammanaji anjo taua.” Mingka kalenna minjo taua angkana, “Inakkemi anjo taua.”

¹⁰Nakanamo ke'nanga ri ia, “Antekamma kajarianna nukkulle accini'?”

¹¹Appialimi angkana, “Anjo tau niarenga Isa appare' peo' sike'de', nampa Napasapu ri matangku, na Nakana, ‘A'lampamako ambissai rupannu ri Balang Siloam.’ Jari a'lampama'. Na ri wattunna kubissai rupangku, akkullema' accini'.”

¹²Akkuta'nammi ke'nanga angkana, “Kemae anjo taua?” Appialimi angkana, “Tena kuassengi.”

¹³Allo Pammari-mariangi ri wattunna Napasileo' pi'runNa Isa siagang buttaya naNaballei anjo tau butaya sa'genna akkulle accini'. Jari nierammi anjo tau le'baka buta mange ri tu Farisia.

¹⁵Nakuta'nang tommi ke'nanga anjo taua, antekamma nakkulle accini'. Appialimi nakana, “Nasarei peo' matangku nampa kubissai nakuakkullemo accini'.”

¹⁶Nia'mo siapa are tu Farisi angkana, “Tena olona laTau battu ri Allata'ala anne Tau anggaukangai anne panggaukanga lanri tena Najampangi allo Pammari-marianga.” Mingka nia'mo maraengang angkana, “Tena olona Tau dorakaya lakkulle anggaukangi gau'-gau' appakalannasa' kammaya anne!” Jari tenamo na'julu panggappa ke'nanga.

¹⁷Jari akkuta'nammi pole anjo tu Farisia ri anjo tau le'baka buta angkana, “Antekamma panggappanu ri anjo Tau le'baka amballeiko nukkulle accini'?” Appialimi nakana, “Na'bi anjo Taua.”

¹⁸Mingka tena ngasemmo natappa' anjo pamarentana tu Yahudia angkanaya butai anjo taua pirangalloang nakkullemo accini' kamma-kamma anne. Jari nakio'mi ke'nanga tau toana anjo taua;

¹⁹nampa akkuta'nang angkana, “Ana'nu tojeng anne, nukanaya buta memammi ri wattunna lassu'? Antekamma batena nakkullemo accini' kamma-kamma anne?”

²⁰Appialimi anrong-manggena anjo taua angkana, “Memang, ana'na memang ikambe anne; na memang buta memammi pakkaramula ri lassu'na.

²¹Mingka antekamma batena nakkulle accini' kamma-kamma anne, tena naassengi ikambe. Kammayatompa, inai amballei nakkulle accini' kamma-kamma anne, tena todong naassengi ikambe. Ia tommo kuta'nang, nasaba' toa tommi; akkullemi kalenna appiali.”

²²Nakkana kamma anjo anrong-manggena, lanri malla'na ke'nanga ri pamarentana tu Yahudia; nasaba' le'ba'mi assamaturu' ke'nanga, angkanaya inai-nai angngakui Isa angkana Iami Karaeng Mappasalama', takkulleai antama' ri balla' sambayanga.

²³Lanri kammana minjo na nakana anrong-manggena anjo taua, “Toa tommi; kalenna tommo kuta'nang.”

²⁴Jari nakio' poleammi ke'nanga anjo tau le'baka buta, na nakana ri ia, “Assumpa mako angkanaya lanupaui kontutojenga. Naassengi ikambe angkanaya tau doraka anjo Taua.”

²⁵Appialimi anjo taua nakana, “Dorakai yareka tena anjo Taua, tena nakuassengi. Mingka nia' se're kuasseng; pirangalloang buta', mingka kamma-kamma anne accini'ma'.”

²⁶Jari nakanamo pole ke'nanga ri ia, “Antekamma bateNa amballeiko nukkulle accini'?”

²⁷Appialimi anjo taua nakana, “Le'ba' mako kucaritang ngaseng, mingka taeroka ngasengko appilangngeri. Angngapa nanuero' pole allangngereki? Barang ero' tommako amminawang ri Ia?”

²⁸Napakkanaimi ke'nanga anjo taua siagang nakana, “Ikau mintu tau amminawanga ri Ia; ikambe tena! Ikambe Na'bi Musa nipinawang.

²⁹Naassemmi ikambe angkanaya le'ba'mi a'bicara Allata'ala mae ri Musa. Mingka passala'na anjo taua, tanaassengai ikambe angkanaya tau battu kemae assala'Na.”

³⁰Appialimi anjo taua nakana, “Appakalannasa' sikali punna tena ngaseng nanuassengi angkanaya battu kemae assala'Na, nakule'ba'mo anne Naballei sa'gengku akkulle accini'.

³¹Naniassemmo angkanaya tanipilangngeriai ri Allata'ala pappala'na tau dorakaya; iaji nipilangngeri pappala'na tau ampakala'birikai Allata'ala, siagang anggaukangai ero'Na.

³²Baku' nia'na linoa tenale'bakapi nilangngere' angkana nia' tau amballei tau butaya ri pakkaramula lassu'na sa'genna akkulle accini'.

³³Punna teai tau battu ri Allata'ala anjo taua, takkulleai laNagaukang anjo panggaukang kammaya.”

³⁴Appialimi ke'nanga angkana, “Apa? Ikau tau dorakaya memang battu ri pakkaramula lassu'nu ero' angngajaraki ikambe?” Pakkaramula anjo wattua tenamo nanikellai anjo taua antama' ri balla' sambayanga.

³⁵Nalangngere'mi Isa angkanaya tanikellaiami anjo tau le'baka Naballei antama' ri balla' sambayanga. Naboyami anjo taua nampa Nakana ri ia, “Tappa'jako ri Ana' Ma'rupataua?”

³⁶Appialimi anjo taua nakana, “Inaika anjo Ana' Ma'rupataua, Tuang? Kitulungsa' naKipauanga' sollangku tappa' ri Ia.”

³⁷Appialimi Isa Nakana, “Nucini'mi anjo taua. Iami anjo nuaganga a'bicara kamma-kamma anne.”

³⁸Nakanamo anjo taua, “Tappaka' Batara,” nampa su'ju' ri dallekanNa Isa.

³⁹Nakanamo Isa, “BattuA' antama' ri anne linoa untu' angngadeli; sollanna akkulle accini' tau butaya, na'jari buta tau accinika.”

⁴⁰Nia' siapa are tu Farisi anjoreng allangngereki akkana kamma anjo Isa; jari akkuta'nammi ke'nanga ri Ia angkana, “Jari Nukana buta ngaseng tongki' anne mae?”

⁴¹Appialimi Isa Nakana, “Ebara' angkana buta ngasengko antu, tenaja nudoraka. Mingka lanri nukanana ngaseng, ‘Accini'jaki' anne’, iaminjo battuanna angkanaya doraka ngasengijako.”