Read Makassar Version – KITTA' MATANGKASA LAMPA-LAMPANA 11 Bible Online

LAMPA-LAMPANA 11 - Makassar Version – KITTA' MATANGKASA bible

LAMPA-LAMPANA 11

¹Nalangngere'mi sikamma tunisuroNa Allata'ala siagang sikamma tau tappaka ri sikontu Yudea, angkanaya manna tau tenayapa nantama' agama Yahudi natarima tommi kananNa Allata'ala.

²Jari ri wattunna a'lampa Petrus mange ri Yerusalem, nicallami Petrus ri tu Yahudi tappakamo.

³Nakana ke'nanga ri Petrus, “Angngapa nu'lampa todong mange ri balla'na tu tenayapa nisunnaki? Ba'lalo sipangnganreang tongko siagang ke'nanga!”

⁴Jari napakasingara'mi Petrus mae ri ke'nanga ngaseng, sikamma apa le'baka kajariang, appakkaramula battu ri pakkaramulanna. Nakana Petrus,

⁵“Sitabanga' appala' doang ri Yope, nania' se're pappiso'na battu mae ri nakke. Nia' kucini' apa-apa kamma silawara' kaeng la'ba' nipaturung battu ri langika, ta'gentung ri appaka panynyingkulu'na, nampa ammantang ri sa'ringku.

⁶Ri wattunna kuciniki lalanganna, nia' kucini' olo'-olo' appaka bangkenna, olo'-olo' liaraka, olo'-olo' akkadangkanga, kammayatompa jangang-jangang liaraka.

⁷Nampa nia' kulangngere' sa'ra angkana mae ri nakke, nakana, ‘Ambangungko nai' Petrus! Samballei nampa nukanre!’

⁸Mingka appialima' kukana, ‘Tena, Batara! Tena' le'bakapa' angnganre kanre harang yareka ra'masaka.’

⁹Mingka nakanamo pole anjo sa'raya battua ri langika, ‘Apa le'baka Nahallallang Allata'ala, teako pa'jari harangi.’

¹⁰Pintallungi kucini' anjo apa kajarianga. Nakala'busanna ta'angka' ngasemmi ammotere' nai' ri suruga.

¹¹Sitabang anjo wattua, nia' tommi anjo tau tallua battu ri Kaisarea iamintu tunisuroa battu mae ri nakke, battu mae ri anjo balla' kupa'bangngia.

¹²Nampa Nasuroma' RohNa Allata'ala a'lampa ampinawangi ke'nanga, siagang Napasanga' sollanna tena nakubata-bata ampinawangi anjo ke'nanga. Manna anne annang sari'battanga amminawang tongi ri nakke a'lampa mange ri Kaisarea, nakisiagang ngasemmo antama' ri balla'na Kornelius.

¹³Nampa nacaritamo Kornelius mae ri kambe antekamma ri wattunna nacini' malaekaka ammenteng ri balla'na na nakana, ‘Suroi taua mange ri Yope nanakio' se'rea tau bura'ne niarenga Simon Petrus.

¹⁴Iami lampabattui mae ri kau kabara' lakkullea ampasalamakko siagang sikontu bone balla'nu.’ ”

¹⁵Napannarrusuki caritana Petrus nakana, “Na ri wattungku appakkaramula a'bicara kamma anjo, Naummi RohNa Allata'ala mae ri ke'nanga ngaseng, sangkamma le'baka kajariang mae ri katte ngaseng pirangalloang.

¹⁶ Nampa kuu'rangimo angkanaya le'baki akkana kamma anne Batara, ‘Yohanes je'ne' napake anje'neki taua, mingka ikau ngaseng lanije'nekko siagang RohNa Allata'ala.’

¹⁷Jari singara'mi ma'nassana angkanaya Napassareang tongi Allata'ala passare kammaya mae ri tu tenaya nantama' agama Yahudi, sikamma apa Napassareanga mae ri katte ngaseng ri wattunta tappa'mo mae ri Isa Almasi. Jari antekamma bateku lampisangkai Allata'ala?”

¹⁸Nalangngere'namo anjo apa napabattua Petrus, tenamo nakkana-kana ke'nanga. Nampa ammuji-mujimo ke'nanga ri Allata'ala. Nakana ke'nanga, “Punna kamma, manna bansa maraenga nisare tommi oloang ri Allata'ala sollanna toba' ke'nanga battu ri dosa-dosana, nanapahang baji' katallassang sitojennaya!”

¹⁹ Ri le'ba'namo Stefanus nibuno, appakkaramulami niondang mange-mange tau tappaka ri Isa, sa'genna tassia'-siara'mo ke'nanga ri kere-keremae. Nia' lari mange ri Fenisia, nia' todong mange ri Siprus siagang Antiokhia. Napabattumi ke'nanga kabara' battua ri Allata'ala. Mingka tu Yahudiaji bawang napabattuang ke'nanga.

²⁰Mingka nia' todong anjo tau tappaka, iamintu tu battua ri Siprus siagang Kirene, a'lampa mange ri Antiokhia. Na iaminne ke'nanga ampabattui tongi Kabara' Bajika ri passala'na Isa mae ri tu tenayapa nantama' agama Yahudi.

²¹Niaki koasaNa Batara anrurungangi ke'nanga, sa'genna jaimi tau a'jari tappa', nanapassareang kalenna mae ri Batara.

²²Sikontu kabara'na anne apa kajarianga anrapi' tommi mae ri jama'aka ri Yerusalem. Jari nasuromi ke'nanga Barnabas mange ri Antiokhia.

²³Na ri wattunna battu Barnabas mange anjoreng, nacini'mi antekamma bateNa Allata'ala ambarakkaki ngasengi anjo taua. Sanna'mi rannuna Barnabas. Na napakainga'mo ke'nanga sollanna jarre' tojeng-tojeng tappa'na ke'nanga ri Batara.

²⁴Anne Barnabas tau baji' pa'mai' siagang nikoasaimi ri RohNa Allata'ala; kammayatompa sanna' jarre'na tappa'na ri Batara, sa'genna jaimi tau amminawang tappa' ri Batara.

²⁵Nampa a'lampa Barnabas mange ri Tarsus, amboyai Saulus.

²⁶Ri wattunna sibuntulu'mo Saulus, naerang tommi Saulus mange ri Antiokhia. Niaki sitaung ke'nanga ammantang a'rappungang siagang jama'aka anjoreng, najai tau naajara' ke'nanga. Anjoremmi ri Antiokhia uru-uru nigallara' tu Karisteng sikamma tau tappaka ri Isa.

²⁷Anjo wattua nia' siapa are na'bi battu ri Yerusalem mange ri Antiokhia.

²⁸ Kalase'renna ke'nanga niarengi Agabus. Lanri pangngajara'Na RohNa Allata'ala, natappu riolomi angkanaya lakajariangi sallang ri sikontu linoa kacipurang lompoa. (Na anjo napakkanaya kajariang tojemmi ri wattunna Karaeng Klaudius ammarenta.)

²⁹Jari assamaturu'mi sikamma tau tappaka ri Isa, ero' appikatu sumbangang mae ri sikontu sari'battang niaka ammantang ri Yudea; massing appikatumi ke'nanga situru' pakkullena.

³⁰Nagaukammi ke'nanga anjo passamaturukanga. Na'lampamo Barnabas siagang Saulus angngerangi anjo sumbanganga mae ri pamimping-pamimping jama'aka ri Yudea.