Read Makassar Version – KITTA' MATANGKASA LAMPA-LAMPANA 12 Bible Online

LAMPA-LAMPANA 12 - Makassar Version – KITTA' MATANGKASA bible

LAMPA-LAMPANA 12

¹Iatommi anjo wattua nappakkaramulamo Karaeng Herodes anjallakkangi anggota-anggota jama'aka.

²Iami amparentakangi, nanibunomo siagang pa'dang sari'battanna Yohanes, iamintu Yakobus.

³Ri wattunna nacini' Herodes angkanaya rannui nyawana tu Yahudia anciniki anjo apa nagaukanga, pila' katambammi panggaukang kammana; nasuro tommi taua anjakkalaki Petrus. Anjo wattua Allo Lomponai Roti Tenaya Nammake Pa'gambang.

⁴ Ri wattunna nijakkala'mo Petrus nipantama'mi ri tarungkua. Nia' appa' regu tantara nisuro anjagai Petrus — tasse're-se're regu, nia' appa' anggota tantara. Le'bappi passua'-suarrang allo Paskaya, nampa laniadeli Petrus ri Herodes, ri dallekanna tau jaia.

⁵Jari nitahammi rolong Petrus lalang ri tarungkua; mingka tuli appala' doang dudumi sikontu jama'aka mae ri Batara sollanna Narurungangi Petrus.

⁶Ri bangngi tenanapa nalanierang Petrus andallekang ri Herodes siagang tau jaia, attinromi Petrus. Anjo wattu attinrona tassikkoki rua-rua limanna, nanijagai ri rua tantara pangawala'. Anjoreng ri pakke'bu' tarungkua, nia' todong rua pangawala' maraengang anjagai tarungkua.

⁷Ti'ring nia'mo malaeka'Na Batara ammenteng anjoreng, siagang accayami singaraka lalang ri kamara'na anjo tarungkua. Nironrommi Petrus ri anjo malaekaka, sa'genna ambangung Petrus. Nampa nakana anjo malaekaka, “He, ambangungko linta'!” Anjo wattua ta'lappasa'mi anjo rante bassi nipasikkoka ri limanna Petrus.

⁸Le'baki anjo nakanamo anjo malaekaka, “Pakemi pakeannu siagang patabami sapatunu!” Ammakeammi Petrus siagang napatabami sapatuna. Le'baki anjo, nakanamo pole anjo malaekaka, “Pakemi jubanu, siagang amminawangko ri nakke!”

⁹Jari amminawammi Petrus ri anjo malaekaka, assulu' battu ri anjo tarungkua. Mingka tena naassengi Petrus angkanaya anjo apa nagaukanga malaekaka ma'nassa kajariang tojeng-tojengi. Nakapangi Petrus angkanaya asso'naji bawang.

¹⁰Ri wattunna nalaloimi ke'nanga tampa' pajaga makase'rea siagang makaruaya, anrapi'mi ke'nanga ri pakke'bu' bassia, angngoloa mange ri kotaya. Tassungke kale-kalemi anjo pakke'buka. Assulu'mi ke'nanga, nampa a'jappa ri se'reang lorong. Ti'ring lanynya'mi anjo malaekaka ambokoi Petrus.

¹¹Le'baki anjo nampami naasseng Petrus anjo apa le'baka kajariang ri kalenna. Nakanamo ri kalenna, “Kamma-kamma anne kuassemmi angkanaya ma'nassa Nasuromi malaeka'Na Batara battu allappassanga' battu ri kakoasanna Herodes siagang battu ri sikontu apa eroka nagaukang bansa Yahudi mae ri nakke.”

¹²Naassennamo Petrus anjo passalaka, a'lampami Petrus mange ri balla'na Maria, amma'naya Yohanes, nigallaraka todong Markus. Anjoreng jai tau a'rappungang appala' doang.

¹³Nade'de'mi Petrus pakke'buka. Nia'mo sitau baine palayang niarenga Rode, battu ero' assungkei pakke'buka.

¹⁴Naasseng memanji silalonna sa'ranna Petrus. Lanri rannu duduna, akkaro-karomi ammotere' antama', natanasungkeapa pakke'buka. Nampa napauang sikamma tau niaka anjoreng angkana niaki Petrus pantarang.

¹⁵Nakanamo ke'nanga, “Pongorokko antu!” Mingka attojeng-tojemmi Rode angkana ma'nassa Petrus tojeng anjo pantarang. Jari nakanamo ke'nanga, “Malaeka'naji anjo!”

¹⁶Anjo wattua nade'de' tulimi Petrus pakke'buka. Jari nasungkemi ke'nanga pakke'buka. Na ri wattunna nacini' ke'nanga Petrus, sanna'mi lannasa'na ke'nanga.

¹⁷Nikodemi siagang lima ke'nanga ri Petrus, sollanna sannang ke'nanga. Nampa nacarita antekamma bateNa Batara angngerangi assulu' ri tarungkua. Nampa nakana, “Pabattumi anne kabaraka mae ri Yakobus siagang sikamma sari'battang maraengannaya.” Le'baki anjo, a'lampami Petrus ambokoi anjo tampaka, nampa mange ri tampa' maraenga.

¹⁸Ammukona bari'basa', gegere' ngasemmi tantara pangawalaka ri tarungkua. Sanna' lannasa'na ke'nanga ri passala'na anjo apa kajarianga ri kalenna Petrus.

¹⁹Nasuromi Herodes taua mange amboyai Petrus. Mingka takkulleami ke'nanga ambuntuluki Petrus. Jari naparentakammi Herodes sollanna nikuta'nang ngaseng anjo tantara pangawalaka nampa nibuno. Le'baki anjo a'lampami Herodes battu ri Yudea, namange ammantang siapa are sallonna ri Kaisarea.

²⁰Sanna' larrona Herodes ri tu Tiruska siagang tu Sidonga. Lanri kammana, a'lampami ke'nanga mange andallekang ri ia. Uru-uruna nanyonyo'mi rolong Blastus, iamintu kapalaya ri balla' lompona Herodes, sa'genna sipammentengang Blastus siagang ke'nanga. Le'baki anjo nirurungammi ke'nanga mange andallekang ri Herodes. Appala' damemi ke'nanga ri Herodes, nasaba' apa-apa nikanrea ri pa'rasanganna ke'nanga, sangnging apa-apa battu ri pa'rasanganna Herodes.

²¹Ri se'reang allo, iamintu allo le'bakamo nipattantu, napakemi pakeang kalompoanna Herodes. Nampa ammempo ri empoang kakaraenganna, nappakkaramula appidato ri dallekanna ra'yaka.

²²Nalangngere'na ra'yaka anjo pidatona Herodes, akkiok-kio'mi ke'nanga angkana, “Anne sa'ra rewata, teai sa'ra tau!”

²³Mingka anjo wattua battumi malaeka'Na Batara antempaka'rangi Herodes, lanri tenana nahargai Allata'ala. Nikanremi Herodes ri gallang-gallang nampa mate.

²⁴Jari pila' a'la'bammi mange-mange kana-kananNa Allata'ala, siagang pila' majarre'mi.

²⁵Le'ba'namo nagaukang jama-jamanna Barnabas siagang Saulus, a'lampami ke'nanga ambokoi Yerusalem. Naerang tommi ke'nanga Yohanes Markus.