Read Makassar Version – KITTA' MATANGKASA LAMPA-LAMPANA 13 Bible Online

LAMPA-LAMPANA 13 - Makassar Version – KITTA' MATANGKASA bible

LAMPA-LAMPANA 13

¹Ri jamaah Antiokhia nia' siapa are na'bi siagang guru. Areng-arenna ke'nanga iamintu: Barnabas, Simeon nigallaraka I Le'leng, Lukius battua ri Kirene, Menahem siaganga Herodes niparakai sa'genna lompo, siagang Saulus.

²Ri wattunna assambayang mae ri Batara siagang appuasa ke'nanga, Nakanamo RohNa Allata'ala mae ri ke'nanga, “Pilei nanusa'lakkangA' Barnabas siagang Saulus, sollanna Kusuro anjamai jama-jamang le'baka Kupattantuangi ke'nanga.”

³Le'baki appuasa siagang appala' doang ke'nanga, napadongko'mi limanna ke'nanga irateanganna Barnabas siagang Saulus, nampa nabarakkaki nanasuro ke'nanga sipa'rua a'lampa.

⁴Lanri nisuroi ke'nanga ri RohNa Allata'ala, a'lampami Barnabas siagang Saulus mange ri Seleukia. Battu anjorengi ke'nanga assombala' mange ri pulo Siprus.

⁵Ri wattunna battu ke'nanga mange ri Salamis, napabattumi ke'nanga kana-kananNa Allata'ala lalang ri sikamma balla' sambayanna tu Yahudia. Nibantumi ke'nanga ri Yohanes Markus lalang ri pa'jappanna ke'nanga.

⁶Najappai ngasemmi ke'nanga anjo puloa, sa'genna battu mange ri Pafos. Anjoreng assibuntulu'mi ke'nanga siagang se're tu Yahudi, niarenga Bar Yesus. Jama-jamanna iamintu pabale'-bale' mata, na nakana kalenna na'bi.

⁷Anne taua agang bajiki siagang Sergius Paulus, iamintu Guburnur ri anjo puloa. Anjo Guburnurka sanna' cara'de'na siagang sanna' baji'na. Nakio'mi Barnabas siagang Saulus lanri ero' tongi nalangngere' kananNa Allata'ala.

⁸Mingka nihalangimi Barnabas siagang Saulus ri Elimas, anjo pabale'-bale' mataya. Nasaba' najagai Elimas (iaminjo arenna anjo pabale'-bale' mataya lalang bicara Yunani) gassingka a'jari tappaki anjo Guburnurka mae ri Isa.

⁹Mingka nikoasaimi ri RohNa Allata'ala Saulus — nigallaraka todong Paulus; sa'genna najanjang anjo pabale'-bale' mataya,

¹⁰nampa nakana, “He, ikau paballe-balle lompoa, ana' tu sannaka ja'dala'na! Ikaumi musunna sikontu apa-apa bajika. Angngapa nutaeroka ampamari anrompa-rompai ero'Na Allata'ala untu' ampasalamaki rupataua?

¹¹Kamma-kamma anne lanuciniki, naNahukkungko Batara! La'jari butako siapa are sallona, sa'genna takkullea nucini' matanna alloa.” Anjo wattua nia' memammo silalonna nakasia' Elimas kamma rammang le'leng antongkoki matanna. Sa'genna angngasala'mi mange-mange, a'boya tau akkullea anrenrengi.

¹²Nacini'na anjo Guburnurka anjo apa kajarianga, a'jari tappa'mi ri Isa. Nasaba' sanna' baji'na antama' ri atinna anjo pangngajarang battua ri Batara.

¹³Battu ri Pafos, assombala'mi Paulus siagang agang-aganna mange ri Perga, daera Pamfilia. Battuna mange anjoreng a'lampami Yohanes Markus ambokoi ke'nanga, ammotere' mange ri Yerusalem.

¹⁴Battu ri Perga, napatulusu'mi lampana ke'nanga mange ri Antiokhia, ri daera Pisidia. Ri allo Pammari-marianga, a'lampami ke'nanga mange ammempo ri balla' sambayanga.

¹⁵Ri wattunna le'ba' nibaca Kitta'na Musa siagang Kitta'na Na'bi-na'bia, nasuromi pamimping-pamimping balla' sambayanga akkuta'nang tau niaka hadere' mae ri Paulus siagang agang-aganna. Nakanamo pamimping balla' sambayanga mae ri Paulus siagang aganna, “Sikamma sari'battangku, punna nia' pappakainga' ero' nupabattuangi anne taua ngaseng, pabattuammi.”

¹⁶Ammentemmi Paulus, nanaangka' limanna, nampa nakana, “Sikamma sari'battangku bansa Israel, kammayatompa sari'battangku ngaseng maraengannaya, niaka anrinni, anynyombaya ri Allata'ala. Pilangngeri sai anne kana kupabattua:

¹⁷ Le'ba'mi Napile Allata'ala bansa Israel, boe-boeta, naNapa'jari jai anne bansaya ri wattunna ammantang ke'nanga annumpang ri butta Mesir. Nampa lalang kakoasang lompoNa Allata'ala, Naerammi Allata'ala assulu' ke'nanga battu ri Mesir.

¹⁸ Sa'baraki Allata'ala anciniki gau'-gau'na ke'nanga ri wattunna a'jappa ke'nanga patampulo taung sallona ri parang lompoa.

¹⁹ Tuju bansa maraeng nabeta Nabunduki ri butta Kanaan. Nampa Nabage-bage Allata'ala anjo butta Kanaan mange ri bansa Israel, sollanna nakammai anjo buttaya.

²⁰ Yangasenna anjo patambilangngang allimampulo taung sallona kajariang. Le'baki Nabage Allata'ala anjo butta Kanaan mae ri ke'nanga, Nasaremi ke'nanga haking-haking a'jari pamimpinna ke'nanga. Haking kala'busanga iamintu Na'bi Samuel.

²¹ Nampa appala' ke'nanga sitau karaeng. Nisaremi Allata'ala ke'nanga se're karaeng, iamintu Saul, ana'na Kis, battua ri suku Benyamin. Iaminjo Saul a'jari karaeng ri ke'nanga patampulo taung sallona.

²² Ri wattunna Nalekka' Allata'ala empoanna Saul a'jari karaeng, Naangka'mi pole Allata'ala karaeng maraenga iamintu Daud a'jari karaenna ke'nanga na iaminne kananNa Allata'ala ri passala'na Daud, ‘Kugappami Daud, ana'na Isai, ampakasannangai atingKu. Iami langgaukangi erokKu.’

²³Battu ri sossorannami anjo Daud, Napasadia Allata'ala sitau Karaeng Mappasalama'na bansa Israelka, situru' apa le'baka Napa'janjiang riolo. Na iaminjo Isa Karaeng Mappasalama' le'baka nipa'janjiang.

²⁴ Ri tenanapa Napakkaramulai Isa jama-jamanNa, napakkio'-kiokammi Yohanes mae ri bansa Israel, sollanna toba' ke'nanga battu ri dosana nampa nije'ne'.

²⁵ Na ri wattu lakala'busannamo jama-jamanna Yohanes, nakanamo mae ri taua, ‘Turu' panggappanu, anne inakke inaia'? Teai inakke anjo Tau salloamo nutayang. U'rangi, anjo Taua labattui ri bokoangangku; manna assungkeangi passikko' sapatuNa tena todong kusiratang.’

²⁶Sossoranna ngasengko Abraham. Siagang sikamma sari'battang maraenganga anrinni anynyombai mae ri Allata'ala! Napabattumi Allata'ala mae ri katte anjo kabara' kasalamakkanga;

²⁷nasaba' tanapahangai tau ammantanga ri Yerusalem siagang pamimping-pamimpinna ke'nanga angkana Iaminjo Isa Karaeng Mappasalamaka. Tanapahangai ke'nanga pangngajaranna na'bi-na'bia, tuli nibacaya punna allo Pammari-mariang. Iaminjo saba'na nanabunoi ke'nanga Isa. Mingka lanri nagaukannamo anjo ke'nanga, na'jari a'rupamo apa le'baka nasero kana na'bi-na'bia riolo.

²⁸ Manna takkullea ke'nanga anggappa kasalang ri Isa, ampassiratangai nihukkung mate, mingka kammaji napala'na ke'nanga ri Pilatus, sollanna nibuno anjo Isa.

²⁹ Na le'ba'namo nabuno Isa, situru' apa le'baka tattulisi' lalang ri Kittaka, napanaummi ke'nanga maya'Na battu ri kayu sallika nampa napantama' ri jeraka.

³⁰Mingka nipattallasa' poleammi ri Allata'ala battu ri kamateanga.

³¹ Nampa a'mole-mole battu ampappicinikangi KalenNa mae ri sikamma tau Naaganga battu ri Galilea mange ri Yerusalem, ero' ampa'nassai angkanaya attallasa' poleammi battu ri kamateanga. Iaminjo ke'nanga a'jari sa'biNa kamma-kamma anne mae ri bansa Israel.

³²Jari, kamma-kamma anne napabattumi ikambe anjo Kabara' Bajika mae ri kau ngaseng: Anjo apa le'baka Napa'janjiang Allata'ala mae ri boe-boeta,

³³ Napa'rupami mae ri katte lanri attallasa'Na ammotere' Isa battu ri kamateanga. Nasaba' ilalang ri Kitta' Pammuji-muji passala' rua nia' tattulisi' angkana, ‘Ikaumi AnakKu, anne alloa iNakkemi a'jari ManggeNu.’

³⁴ Nipattallasa' poleammi ammotere' ri Allata'ala battu ri kamateanga. Kamma-kamma anne tenamo nalaNakasia' pole nikanaya kamateang lalang ri jeraka. Ri anjo passalaka Nakanamo Allata'ala, ‘LaKusareKo janji matangkasa', attantua laKurupaina, le'ba' Kupa'janjianga mae ri Daud.’

³⁵ Kammayatompa, lalang ri aya' maraenga nia' angkana, ‘Tena nalaNubalang parekang anjo Ata majarre'Nu la'jari botto' lalang ri jeraka.’

³⁶Matemi Daud ri le'ba'namo nagaukang apa-apa Napassuroanga Allata'ala ri ia. Le'ba'mi nitarawang siagang boe-boena. Anjo maya'na Daud ancuru' tommi a'jari butta ngaseng.

³⁷Mingka anjo Isa, nipattallasa' poleanga ammotere' battu ri kamateanga, tena naancuru' a'jari butta maya'Na.

³⁸Lanri kammana minjo sari'battangku ngaseng, musti nuasseng ngasengi angkanaya ilalang arenNa minjo Isa nanipabattumo anjo kabara' nipammopporanna dosaya mae ri kau ngaseng; musti nuassengi angkanaya inai-nai tappa' ri Ia, lanipata'lappasaki battu ri sikontu dosaya, tenaya nakkulle nipata'lappasa' lanri sikamma parentaNa Allata'ala napassareanga Musa.

³⁹

⁴⁰Lanri kammana minjo namusti nuparhatikang baji'-baji', sollanna tena nakajariang mae ri kau apa le'baka napau na'bia, angkana,

⁴¹ ‘Parhatikangi baji'-baji' ikau tau nungaia pahina-hina! La'jari lannasakko, nunampa mate! Nasaba' anne jammanga nia' apa-apa Kugaukang tenaya nalanupatappaki, manna nia' tau ampakasingaraki mae ri kau.’ ”

⁴²Ri wattunna lanabokoimo Paulus siagang Barnabas anjo balla' sambayanga, napala'mi taua sollanna battu pole ke'nanga punna allo Pammari-mariang poleang, nanapakasingara' baji' anjo passalaka.

⁴³Assulu'na ngasemmo anjo taua battu ri balla' sambayanga, jaimi tau amminawang ri Paulus siagang Barnabas. Anjo taua tu Yahudi siagang bansa maraeng, antamayamo agama Yahudi. Nipakainga'mi ke'nanga ri anjo tunisuroNa Allata'ala, sollanna tuli tanjeng ke'nanga mae ri pangngamaseanNa Allata'ala.

⁴⁴Ri allo Pammari-mariang poleanga, a'birimmi battu ngaseng tau anjorenga ri kotaya ero' ampilangngeri kana-kananNa Batara.

⁴⁵Ri wattunna nacini' tu Yahudia anjo tau jaia, sanna'mi akkimburuna lalang atinna ke'nanga. Nahinami Paulus, siagang nageakki ngasemmi anjo apa napabattua.

⁴⁶Mingka pila' baranimi Paulus siagang Barnabas a'bicara silambusu'na. Nakanamo ke'nanga, “Musti nipabattu memangi rolong kananNa Allata'ala mae ri kau ngaseng. Mingka lanri tenana nuero' antarimai, jari kalennu tommi ampattantui angkanaya tena nusiratang antarimai katallassang sitojennaya siagang satunggu-tunggua. Jari kamma-kamma anne kubokoi ngaseng mako, nampa a'lampa ikambe mae ri bansa maraenga.

⁴⁷ Nasaba' iaminne parentaNa Batara mae ri kambe; Nakana Batara, ‘Kupa'jari mako singara' mae ri bansa-bansa maraenga, teaiya tu Yahudi, sollanna nupabattu kasalamakkang mae ri sikontu linoa.’ ”

⁴⁸Ri wattunna nalangngere' tau battua ri bansa maraenga anjo kananna Paulus, sannang sikalimi nyawana ke'nanga. Ammuji-mujimi ke'nanga ri Batara. A'jari tappa'mi sikamma tau le'baka nipattantu ri Allata'ala langgappai katallassang satunggu-tunggua.

⁴⁹A'la'bammi kana-kananNa Batara mange ri kere-kere mae ri sikontu anjo daeraya.

⁵⁰Mingka nikompa-kompa salami ri tu Yahudia sikamma tumalompoa siagang bai'-baine tumalompoa ri anjo kotaya, ia tu mallakamo ri Allata'ala. Napasimusumi ke'nanga siagang Paulus na Barnabas. Sa'genna nibongkamo Paulus siagang Barnabas battu ri anjo daeraya.

⁵¹ Napatu'du'mi nanapasulu' limbu'bu' niaka ri pa'lapa' bangkenna Paulus siagang Barnabas ri dallekanna ngaseng ke'nanga. Iaminjo a'jari pappakainga' mae ri ke'nanga. Le'baki anjo a'lampami Paulus siagang Barnabas mange ri Ikonium.

⁵²Sanna'mi rannuna ngaseng tau tappaka ri Antiokhia siagang nikoasaimi ke'nanga ri RohNa Allata'ala.