Read Makassar Version – KITTA' MATANGKASA LAMPA-LAMPANA 15 Bible Online

LAMPA-LAMPANA 15 - Makassar Version – KITTA' MATANGKASA bible

LAMPA-LAMPANA 15

¹ Nia'mo siapa are tu battu ri Yudea mange ri Antiokhia. Naajara'mi tau tappaka ri Antiokhia angkanaya takkulleai salama' ke'nanga, punna tena nanisunnaki ke'nanga situru' Napassuroanga Allata'ala, le'baka napangngajarrang Musa.

²Sanna'mi nageakkinna Paulus siagang Barnabas panggappana anjo taua. Kale'bakkanna nipassamaturukimi sollanna a'lampa Paulus, Barnabas, siagang siapa are tau maraengannaya ri Antiokhia, mange ri Yerusalem. A'lampami ke'nanga mange ambicarai anjo passalaka siagang sikamma tunisuroNa Allata'ala kammayatompa pamimping-pamimping niaka anjoreng.

³Nirurungammi ke'nanga ri anggota-anggota jama'aka sa'genna assulukang kota. Nampa a'lampa ke'nanga allalo ri Fenisia siagang Samaria. Anjoreng, nacaritami ke'nanga antekamma batena bansa-bansa maraenga ampassareang tommi kalenna mae ri Allata'ala. Sanna'mi rannuna ngaseng tau tappaka anjoreng allangngereki anjo kabaraka.

⁴Ri wattunna battu ke'nanga mange ri Yerusalem, nitarima baji'-baji'mi ke'nanga ri jama'aka, ri tunisuroNa Allata'ala, kammayatompa ri pamimping-pamimping jama'aka. Nampa nacarita ngasemmo ke'nanga sikamma apa le'baka Nagaukang Allata'ala lalang ri kalenna ke'nanga.

⁵Mingka nia'mo siapa are tu Farisi tappakamo, ammenteng angkana, “Musti nisunnaki anjo bansa-bansa maraenga, siagang musti naturuki apa-apa napassuroanga Allata'ala, le'baka napabattu Musa.”

⁶Assirapakkang ngasemmi tunisuroNa Allata'ala siagang pamimping-pamimpinga, ero' ambicarai anjo passalaka.

⁷ Sanna' sallona ke'nanga sipa'bicara. Kala'busanna ammentemmi Petrus na nakana, “Sikamma sari'battangku ngaseng! Nuasseng ngasemmi angkanaya ri siapa are wattu allaloa Napilema' Allata'ala battu ri tangnga-tangnganu, untu' ampa'la'bangi anjo Kabara' Bajika mange ri bansa-bansa maraenga, sollanna nalangngere' todong siagang tappa' todong ke'nanga.

⁸ Na Allata'ala angngassengi atinna rupataua. Iami ampappicinikangi angkanaya Natarimami ke'nanga. Jari Napassareang tommi RohNa Allata'ala mae ri ke'nanga, sangkamma le'baka Napassareang todong mae ri katte.

⁹Tena Napasimmara'-maraengki' Allata'ala siagang ke'nanga. Natangkasi atinna ke'nanga, lanri tappa'na ke'nanga.

¹⁰Jari apa saba'na nanuero' ambali Allata'ala kamma-kamma anne lanri ero'nu ambattali atorang-atorang anjo tau tappaka? Na sikontutojenna manna boe-boeta, yareka manna kalenta ngaseng tena todong nanikkulle anggaukangi anjo atoranga.

¹¹Kabalekanna, kamma-kamma anne tappakki', angkanaya iaji nikkulle salama' lanri pangngamaseanNa bawang Batara Isa; kamma le'ba' tommi anjo ke'nanga.”

¹²Tenamo nania' akkana sikontu anjo tuniaka assirapakkang. Nampa napilangngerimo ke'nanga Barnabas siagang Paulus ancarita poleangi sikamma anjo gau'-gau' appakalannasa' le'baka Nagaukang Allata'ala lalang ri kalenna ke'nanga ri tangnga-tangngana bansa maraenga.

¹³Le'baki ke'nanga a'bicara, nakanamo Yakobus, “Sikamma sari'battangku! Pilangngeri sai anne kanangku.

¹⁴Beru le'baki napakasingara' Simon, antekamma uru-uruna Allata'ala amparhatikangi bansa-bansa maraenga, lanri ero'Na Allata'ala ampile todongi bansa maraenga a'jari umma'Na.

¹⁵Anjo coco' sikali siagang apa le'baka nasero kana na'bi-na'bia riolo. Nasaba' nia' tattulisi' lalang ri Kitta' angkanaya,

¹⁶ Nakana Batara, ‘Le'baki anjo labattu poleangA', laKupabangung poleangi balla'na Daud, le'baka rumbang laKupakabajiki ri rumbanna, nampa Kupaenteng poleang;

¹⁷sollanna sikamma anjo tau niaka tassesa naboyai Batara, assama-samai bansa maraenga, Kukioka a'jari ummakKu.’ Kammaminjo kananNa Batara,

¹⁸le'baka Napabattu memang ri jammang riolo.”

¹⁹Nakanamo pole Yakobus, “Jari turu' ri panggappaku, takkulleaki' ansusai bansa maraenga, punna ero' ampassareangi kalenna mae ri Allata'ala.

²⁰ Mingka musti apparekki' sura' mae ri ke'nanga, na nipakainga' ke'nanga sollanna tena nanakanre ke'nanga kanre ra'masaka, iamintu kanre le'baka nipassareang mae ri barhalaya; kammayatompa ceraka, yareka olo'-olo' mate niaccekanga. Kammayatompa napakabellai kalenna ke'nanga battu ri panggaukang assalimaraka.

²¹Nasaba' battu riolo duduji napabattu Musa passuroNa Allata'ala, siagang tuli nibacami punna allo Pammari-mariang ri sikamma balla' sambayanga siagang nibirittakang ri kota-kotaya.”

²²Assamaturu'mi tunisuroNa Allata'ala, pamimping-pamimpinga, siagang sikontu anggota jama'aka, ero' ampilei siapa are tau lanisuroa angngagangi Paulus siagang Barnabas a'lampa mange ri Antiokhia. Napilemi ke'nanga Silas siagang Yudas, nigallaraka todong Barsabas. Iaminne tau ruaya nibilang tutoa ri sikamma tau tappaka ri Yerusalem.

²³Nisaremi anne ke'nanga angngerang se're sura', kammaya anne bonena, “Natarimai sikontu sari'battang bansa-bansa maraenga, niaka ammantang ri Antiokhia, Siria, siagang Kilikia. Salama' battu ri kambe ngaseng tunisuroNa Allata'ala siagang pamimping-pamimpinga, iamintu sari'battannu ngaseng.

²⁴Nia' kabara' nalangngere' ikambe angkanaya nia' siapa are tau battu ri kambe le'ba' mae ri kau ngaseng assareko pangngajarang sala, sa'gennu a'jari lussa' siagang lingu napakamma ke'nanga. Sikontutojenna teai ikambe assuroi anjo ke'nanga battu mae ri kau ngaseng anggaukangi anjo kammaya.

²⁵Jari le'ba' maki' sipa'bicara ngaseng, nakissamaturu'mo assuroi battu mae ri kau ngaseng anne siapa area tau. Laniaki ke'nanga battu mae ri kau ngaseng angngagangi sari'battang nikamaseanta, iamintu Barnabas siagang Paulus.

²⁶Anne tau ruaya le'ba'mi narellakang kalenna lanri Batarata Isa Almasi.

²⁷Jari nisuromi sari'battanta iamintu Yudas siagang Silas battu mae ri kau ngaseng. Iaminne ke'nanga lampabattuang ngasengko anne apa niaka tattulisi' lalang ri suraka.

²⁸Nasitujuimi RohNa Allata'ala — siagang ikambe nisitujui tommi — sollanna tena nanisareko atorang-atorang battallanganga na anne parallua:

²⁹teako angnganrei kanre le'baka nipassareang mae ri barhalaya; teako angnganrei cera', teako angnganrei olo'-olo' mate niaccekanga, siagang pakabellai kalennu ri gau'-gau' assalimaraka. Punna nupakabella ngasemmo kalennu ri apa-apa kammaya anjo, nugaukammi nikanaya kabajikang. Sikammamo anne, poro salama' ngasengko!”

³⁰Le'baki appala' kana ke'nanga, a'lampami anjo tunisuroa mange ri Antiokhia. Battui ke'nanga mange ri Antiokhia, nakio' ngasemmi sikontu jama'aka nampa napassareang anjo suraka.

³¹Ri wattunna nabaca ke'nanga anjo suraka, teaimi sipato' sannanna ke'nanga; nasaba' bonena anjo suraka a'jari panynyaleori ri atinna ke'nanga.

³²Anjo Yudas siagang Silas, na'bi-na'bi todong, salloi sipa'bicara siagang sikamma tu tappaka ri Antiokhia; napakalompomi sumanga'na siagang napakajarre'mi tappa'na anjo sikamma tu tappaka.

³³Niaki siapa are sallona ammantang Yudas siagang Silas ri Antiokhia. Le'baki anjo nikellaimi ammotere' ke'nanga. Akkirimmi sallang sikamma tu tappaka ri Antiokhia mae ri sikamma tau assuroai ke'nanga battu. [

³⁴Mingka ammantang tulimi Silas ri Antiokhia.]

³⁵Ammantang tongi Paulus siagang Barnabas siapa are sallona ri Antiokhia. Angngajara'mi siagang napabattui ke'nanga kana-kananNa Batara anjoreng. Jai tau maraeng naagang ke'nanga angngajara' ampabattui kana-kananNa Batara.

³⁶Tasalloai, nakanamo Paulus ri Barnabas, “Umba ki'lampa pole angkunjungi sikamma paranta tu tappa' ri Isa niaka ri kota-kota le'baka nibattui ampa'la'bangi kana-kananNa Batara; sollanna akkulle nicini' antekamma katallassanna ke'nanga.”

³⁷Eroki Barnabas angngerang tongi Yohanes Markus,

³⁸ Mingka napikkiriki Paulus angkanaya tabajikai nierang Markus; nasaba' taerokai assamaturu' anjama siagang ke'nanga, kammayatompa le'baki Markus ampilari ke'nanga ri wattunna nia' ri Pamfilia ke'nanga.

³⁹Jari a'gea' lompomi Paulus siagang Barnabas sa'genna assisa'la'mo ke'nanga: A'lampami Barnabas siagang Markus, na assombala' mange ri Siprus.

⁴⁰Na Paulus napileimi Silas lanaagang a'lampa. Le'baki nipassareang ke'nanga ri jama'aka ri Antiokhia mae ri pangngamaseanNa Batara, a'lampami ke'nanga.

⁴¹A'lampami ke'nanga angkulilingi Siria siagang Kilikia; napakajarre'mi ke'nanga sikamma jamaah niaka anjoreng.