Read Makassar Version – KITTA' MATANGKASA LAMPA-LAMPANA 17 Bible Online

LAMPA-LAMPANA 17 - Makassar Version – KITTA' MATANGKASA bible

LAMPA-LAMPANA 17

¹Napatulusu'mi lampana Paulus siagang Silas. Ammolongangi ke'nanga ri Amfipolis siagang Apolonia, nampa battu ke'nanga mange ri Tesalonika. Anjoreng nia' balla' sambayang tu Yahudi.

²Kamma biasaya nagaukang punna nia' balla' sambayang tu Yahudi ri se'reang tampa', a'lampami Paulus mange anjoreng ri balla' sambayanga. A'bicarami Paulus siagang sikamma tau niaka ri balla' sambayanga, ri passala'na apa-apa niaka tattulisi' lalang ri Kittaka. Kammaminjo nagaukanga Paulus sa'genna pintallung allo Pammari-mariang assisambung-sambung.

³Situru' apa niaka tattulisi' lalang ri Kittaka, napakasingara'mi siagang napa'buttimi Paulus angkanaya parallui Nakasia' sessaya siagang ambangung poleang battu ri kamateanga anjo Karaeng Mappasalama' Napa'janjianga Allata'ala. Nakana Paulus, “Anjo Isa, kukabarranga mae ri kau ngaseng, Iami Karaeng Mappasalama' le'baka Napa'janjiang Allata'ala.”

⁴Nia'mo siapa are tau a'jari tappa', nampa amminawang ri Paulus siagang Silas; kammayatompa jai todong tu Yunani mallaka ri Allata'ala, siagang bai'-baine nibilang tutoaya, a'jari tappa' todong.

⁵Mingka assereatimi tu Yahudia. Nakio'mi ke'nanga tau ja'dalaka siagang pasolle' tenaya jama-jamanna, nampa a'rappungang ke'nanga ero' apparicu. Apparicumi ke'nanga ri kota-kotaya; nampa namangei balla'na se'rea tau tappa' niarenga Yason, ero' amboyai Paulus siagang Silas, kaeroki ke'nanga angngerangi Paulus siagang Silas assulu', ri dallekanna tau jaia.

⁶Mingka lanri tenana nabuntuluki ke'nanga Paulus siagang Silas, a'gilimmi ke'nanga anre'resangi Yason siagang siapa are tau tappa' maraenganga, mae ri dallekanna sikamma pamarenta anna'galaka koasa ri anjo kotaya. Akkio'-kioki ke'nanga angkana, “Anne tau ruaya angngacoi ri kere-keremae! Kamma-kamma anne battu tommi ke'nanga ri kotata;

⁷na natarimamo Yason anjo ke'nanga ri balla'na. Nadakkaimi ke'nanga apa-apa le'baka napattantu Karaenga ri Roma, lanri nakanana ke'nanga nia' ija karaeng maraeng niarenga Isa.”

⁸A'jari lussa'mi tau jaia siagang sikamma pamarentaya ri anjo kotaya nalangngere'na anjo kana-kana kammaya.

⁹Nisuromi Yason siagang sikamma tau tappa' maraengannaya ri pamarentaya a'bayara' doe' pappassala. Le'baki a'bayara' nampami nilappassang ke'nanga.

¹⁰Anjo bangngia nisuromi Paulus siagang Silas ri tau tappaka anjoreng ri kotaya, a'lampa mange ri Berea. Battuna Paulus siagang Silas ri Berea, mangemi ke'nanga ri balla' sambayanna tu Yahudia.

¹¹Anjo tau anjorenga ri Berea baji'-bajikangangi pa'mai'na na tau niaka ri Tesalonika. Sannangi pa'mai'na ke'nanga ampilangngeri anjo kabara'Na Isa; allo-allona napilajari ke'nanga apa niaka tattulisi' lalang ri Kittaka, lanri ero'na ke'nanga angngassengi angkanaya maka kontutojengi anjo napangngajarranga Paulus.

¹²Jaimi ri ke'nanga a'jari tappa' ri Isa. Jai tommi tu nipakalompona tu Yunania a'jari tappa', baji' nabaine kammayatompa bura'nea.

¹³Ri wattunna nalangngere' tu Yahudi niaka ri Tesalonika angkanaya nabirittakang tommi Paulus kana-kananNa Allata'ala ri Berea, mangemi ke'nanga ri Berea; nampa napa'jari lussa' siagang napakabambang nyawana tau niaka ri Berea.

¹⁴Akkaro-karomi tau tappaka ri Berea angngantaraki Paulus mange ri biring tamparanga. Mingka Silas siagang Timotius ammantanji anjoreng ri kotaya.

¹⁵Le'baki naantara' Paulus sa'genna ri Atena, ammotere'mi anjo sikamma tau tappaka mange ri Berea. Angngerammi pasang ke'nanga battu ri Paulus, sollanna linta' amminawang Silas siagang Timotius.

¹⁶Lalang natayanna Paulus kabattuanna Silas siagang Timotius ri Atena, si'nami atinna anciniki anjo kotaya lanri jaina barhala anjoreng.

¹⁷Lanri kammana sipa'bicarami Paulus lalang ri balla' sambayanga siagang sikamma tu Yahudia kammayatompa sikamma tau anynyombaya ri Allata'ala anjoreng. Kammayatompa allo-allona sipa'bicara Paulus ri pasa'-pasaraka siagang sikamma tau niaka anjoreng.

¹⁸Assigea'mi Paulus siagang guru-guru battua ri golongang Epikuros siagang golongang battua ri Stoa. Nia' siapa are maraeng ri ke'nanga angkana, “Apa todong naasseng anne taua? Sike'de' duduji pangngissenganna mingka teai sipato' jaina bicaranna!” Nia' todong siapa are tau angkana, “Kamma nicini' rewata-rewata bansa maraeng nakabarrang.” Akkana kammai anjo ke'nanga, lanri passala'Na Isa siagang passala' attallasa'Na ammotere' Isa battu ri kamateanga nabicara Paulus mae ri ke'nanga.

¹⁹Nampa naerang ke'nanga Paulus mange ri passirapakkanga irate ri Bonto Areopagus. Battui mange anjoreng, nakanamo ke'nanga ri Paulus, “Eroki ikambe angngassengi anjo pangngajarang berua nupabattua.

²⁰Nasaba' sangnging apa-apa tena nantama' ri akkala' antu nupabattua. Jari ero' maki' anne angngassengi battuanna.” (

²¹Nasaba' anjo tau niaka ri Atena siagang sikamma tau niaka battu anjoreng, nangai ke'nanga ampakei wattu-wattu tanjamana a'rappungang ampilangngeri siagang ambicarai passala' apa-apa beru nalangngereka ke'nanga.)

²²Ri wattunna ammenteng Paulus ri dallekanna ngaseng anjo tau niaka a'rappungang ri Areopagus, angkanami Paulus, “He, ikau ngaseng tu Atenaya! Turu' ri apa kucinika, sanna' ngaseng nukatutuina agamaya.

²³Nasaba' ri wattungku a'jappa-jappa akkuliling ri kota-kotanu, nakuparhatikang sikamma tampa' passambayangannu, nia' tommo kucini' se're tampa' biasaya nupake assare koro'bang. Anjoreng ri tampaka nia' tattulisi' angkanaya, ‘Mae ri Allata'ala Tenaya Naniassengi.’ Na kamma-kamma anne, iaminjo Allata'ala nusombaya mingka tanuassengai, Iaminjo Allata'ala kukabarranga ri kau ngaseng.

²⁴ Allata'ala ampa'jariai anne linoa siagang sikontu bonena, Iami Batarana langika siagang buttaya. Tena nalalang ammantang ri sikamma balla' rewata napareka rupataua.

²⁵Tena todong Naparallu ri pannulunna rupataua, nasaba' Iami assarei katallassang siagang nyawa, kammayatompa assarei sikontu apa-apa rupataua!

²⁶Battu ri se'rea tau Nanapa'jari sikontu bansaya, nampa Nasuro ke'nanga ampammantangi sikontu buttaya. Iatommi ampattantui battu ri uru-uruna angkana kemae sa'genna siagang kemaei akkulle ammantang rupataua.

²⁷Kammaminjo Nagaukanga Allata'ala, sollanna niboya Allata'ala ri rupataua. Niminasai sollanna assibuntulu' siagang Allata'ala, ri wattu naboyana ke'nanga Allata'ala. Mingka sikontutojenna tena nabella Allata'ala battu ri kalenta ngaseng.

²⁸Kamma biasaya napau taua angkana, ‘Akkulleki' nia', attallasa', siagang a'gio' ri anne linoa lanri kakoasanNa Allata'ala.’ Sangkamma tonji siagang apa napaua tu cara'de'nu, angkanaya, ‘Ikatte ngaseng, ana'-ana'Naki' Allata'ala.’

²⁹Jari, lanri ana'-ana'Naki' Allata'ala, takkulleaki' ampasangkammai Allata'ala siagang patung bulaeng nipareka, yareka pera', yareka batu nipareka situru' kacara'dekanna rupataua.

³⁰Anjo wattu kadongokanta Nakaluppaimi Allata'ala, mingka kamma-kamma anne Nasuromi toba' battu ri dosa-dosana sikontu rupataua ri lino.

³¹Nasaba' le'ba'mi Napattantu wattunna nalaNaadeli sikontu bonena anne linoa siagang adele'. Anjo tugasaka lanagaukangi tau le'bakamo nipile ri Allata'ala untu' anggaukangi anjo tugasaka. Na sollanna akkulle tappa' ngaseng taua ri anjo passalaka, Napattallasa' poleammi Allata'ala anjo taua battu ri kamateanga!”

³²Ri wattunna nalangngere' ke'nanga anjo passala' attallasaka ammotere' battu ri kamateanga, nia'mo ri ke'nanga angkakkali Paulus. Nia' todong angkana, “Ero' ijaki' allangngerekko ambicarai pole anne passalaka!”

³³Nabokoimi Paulus anjo tampa' pa'rappunganga.

³⁴Mingka nia' todong ri ke'nanga angngalle-alleangi Paulus, siagang a'jari tappa' ri Isa: nia' niareng Dionisius anggota kumpulanna Areopagus, siagang sitau baine niarenga Damaris, na siapa are pole tau maraengannaya.