Read Makassar Version – KITTA' MATANGKASA LAMPA-LAMPANA 18 Bible Online

LAMPA-LAMPANA 18 - Makassar Version – KITTA' MATANGKASA bible

LAMPA-LAMPANA 18

¹Le'baki anjo a'lampami Paulus ambokoi Atena, namange ri Korintus.

²Anjoreng ri Korintus assigappami siagang se're tu Yahudi, niarenga Akwila, battua ri pa'rasangang Pontus. Anne Akwila beru-beru battui ri Italia siagang bainenna niarenga Priskila. Battumi ke'nanga mange ri Korintus lanri nisuro ngasemmi ri Karaeng Klaudius assulu' tu Yahudia battu ri Roma. A'lampami Paulus angkunjungi anjo tau ruaya.

³Ammantammi Paulus anjoreng siagang ke'nanga, siagang anjamami siagang ke'nanga. Nasaba' a'julu pa'boya-boyangi Paulus siagang ke'nanga, iamintu appareka balla'-balla' niarenga kema.

⁴Mingka punna narapi' allo Pammari-marianga, a'lampami Paulus mange ri balla' sambayanga. A'bicarami siagang tu Yahudia kammayatompa tu Yunania, sollanna tappa' ke'nanga mae ri Isa.

⁵Ri wattunna nia'mo Silas siagang Timotius battu ri Makedonia, napakemi Paulus sikontu wattunna niaka, untu' ampabattui kabara' battua ri Allata'ala mae ri tu Yahudia. Napabattumi mae ri ke'nanga ri passala'na Isa, Karaeng Mappasalama' le'baka Napa'janjiang Allata'ala.

⁶Mingka lanri tuli nigeakkinna siagang tuli nicallana Paulus ri taua, napatu'du'mi bangkenna siagang napaba'basa'mi pakeanna sollanna a'lesang limbu'bu'na; iaminjo a'jari pammatei siagang pappakainga' ri kasalanna ngaseng ke'nanga. Nakanamo Paulus, “Punna cilakako, passala' kasalannu ngaseng tonji! Pantarang limangkuko! Pakkaramula ri kamma-kammaya anne la'lampa mangema' ri bansa-bansa maraenga.”

⁷Le'baki anjo, a'lampami Paulus ambokoi ke'nanga nampa mange ammantang ri ba'leanna anjo balla' sambayanga. Anjo ballaka, teai balla' tu Yahudi, mingka tau anynyombai ri Allata'ala tau ammantanga anjoreng. Anjo patanna balla' niarengi Titus Yustus.

⁸Mingka kapalana anjo balla' sambayanga, iamintu niarenga Krispus siagang sikontu tau niaka ri balla'na, a'jari tappa'mi ri Batara Isa. Siagang pole jai tommi tu Korintus maraenganga allangngereki anjo kabara' napabattua Paulus, na'jari tappa' mae ri Isa nampa nije'ne' ke'nanga.

⁹Ri se'reang bangngi nabattuimi pappiso'na Paulus. Lalang pappiso'nana Nakana Batara ri Paulus, “Teako mallakki Paulus! A'bicarako turus, teako ammakkangi.

¹⁰Nasaba' niaKa' anrurungangko. Tena manna sitau akkulle a'gau' ja'dala' ri kau, nasaba' jai taungKu anrinni ri kotaya.”

¹¹Jari ammantammi Paulus se're sitangnga taung sallona ri Korintus, siagang napangngajarrammi kana-kananNa Allata'ala mae ri ke'nanga.

¹²Ri wattunna Galio a'jari Guburnur ri Akhaya, assamaturu'mi tu Yahudia ambaliangi Paulus nanaerang mange ri pangadelanga natuntu'.

¹³Kammaminne tuntutanna ke'nanga mae ri Paulus, “Anne taua ampangarui tau jaia anynyomba sala ri Allata'ala; nasaba' sisalai anjo apa napangngajarranga siagang apa Napassuroanga Allata'ala le'baka napabattu Musa mae ri kambe!”

¹⁴Kamma ero'na appiali Paulus, la'bi riolomi Galio angkana mae ri tu Yahudia, nakana, “He, ikau ngaseng tu Yahudia! Ka'de' passala' kasalang yareka kaja'dallang nanutuntu' anne taua memang siratanga' sa'bara' ampilangngeri anne tuntutannu.

¹⁵Mingka anne passala' passigeakkang bicara, passigeakkang areng-areng, siagang passigeakkang ri passala' atorang-atorannu tonji! Jari ikau ngaseng tommo ampasilolongangi. Tena nakuero' angngadeli anne passala' kammaya!”

¹⁶Le'baki anjo nibongkami ke'nanga assulu' ri Galio.

¹⁷Jari a'gilimmi ke'nanga anjakkalaki Sostenes, iamintu kapalana anjo balla' sambayanga, nampa naba'ji ri dallekanna mejang pangadelanga. Mingka tena sikali najampangi Galio anjo apa nagaukanga ke'nanga.

¹⁸ Le'baki anjo sallo iji ammantang Paulus ri Korintus. Mingka ri se'reang allo appala' kanami Paulus ri sikamma tau tappaka anjoreng, nampa a'lampa assombala' siagang Priskila na Akwila mange ri Siria. Battui ke'nanga mange ri Kengkrea, nasuro cukkuru'mi uu'na Paulus, le'baka a'jari la'bu siapa are sallona lanri tinja'na mae ri Batara.

¹⁹Ri wattunna battu ke'nanga mange ri Efesus, nasuromi ammantang Priskila siagang Akwila, nampa antama' ri balla' sambayanga sipa'bicara siagang tu Yahudi niaka anjoreng.

²⁰Napala'mi ke'nanga sollanna ammantang sallo-sallo Paulus, mingka takkulleai ammantang sallo Paulus.

²¹Mingka manna nakamma, ri wattunna la'lampa Paulus, nakanamo ri ke'nanga, “Punna nia' pangngellai battu ri Allata'ala, labattu poleanja' antu sallang mae anrinni.” Le'baki akkana kamma, a'lampami Paulus mange ri Efesus.

²²Ri wattunna naung ri Kaisarea, a'lampami Paulus mange ri Yerusalem ampabattui sallanna ri jamaah niaka anjoreng, nampa annarrusu' mange ri Antiokhia.

²³Niaki siapa are sallona ammantang anjoreng. Le'baki anjo a'lampami angkunjungi jamaah-jamaah niaka ri daera Galatia siagang Frigia ero' ampakajarreki tappa'na sikontu anggota jama'aka.

²⁴Anjo wattua, nia'mo se're tu Yahudi battu mange ri Efesus, niarenga Apolos, anjorenga ri Aleksandria nilassukang. Anne Apolos tau cara'de' a'bicara, siagang napahang bajiki bonena Kittaka,

²⁵kammayatompa le'ba'mi niajara' sollanna naasseng pangngajarranga ri passala'na Isa. Mingka nampami sa'genna passala' pa'je'ne' nagaukanga Yohanes naasseng. Mingka manna nakamma sanna'mi lompona sumanga'na angngajara'. Naajara' baji'-baji'mi taua ri passala'na Isa.

²⁶Appakkaramulami a'bicara siagang barani Apolos lalang ri balla' sambayanga. Na ri wattunna nalangngere' Priskila siagang Akwila anjo apa napangngajarranga Apolos, nakio'mi ke'nanga Apolos mange ri balla'na ke'nanga. Anjoreng ri ballaka napauang la'bi baji'mi ke'nanga Apolos ri passala' antekamma ero'Na Allata'ala ampasalamaki rupataua lalang ri KalenNa Isa.

²⁷Le'baki anjo apparurumi Apolos ero' a'lampa mange ri Akhaya. Jari annulisi'mi sura' tau tappaka ri Isa niaka ri Efesus mae ri tau tappaka ri Akhaya sollanna ero' ke'nanga antarimai Apolos siagang te'ne pa'mai'. Na ri wattunna Apolos mange ri Akhaya, ma'nassa sanna'mi lompona matu-matunna pannulunna mae ri sikamma tau tappaka ri Isa lanri pangngamaseanNa Allata'ala.

²⁸Nasaba' akkullei nabeta bicara tu Yahudia punna sipa'bicara ke'nanga ri dallekanna tau jaia. Siagang akkullei napa'butti situru' apa-apa niaka tattulisi' lalang ri Kittaka angkanaya ma'nassa Iaminjo Isa Karaeng Mappasalama' le'baka Napa'janjiang Allata'ala.