Read Makassar Version – KITTA' MATANGKASA LAMPA-LAMPANA 19 Bible Online

LAMPA-LAMPANA 19 - Makassar Version – KITTA' MATANGKASA bible

LAMPA-LAMPANA 19

¹Ri wattunna nia' Apolos ri Korintus, sitabang tongi a'lampa Paulus anjappai padalamanna anjo daeraya, sa'genna battu mange ri Efesus. Anjoreng, assibuntulu'mi siagang siapa are tau tappakamo ri Isa.

²Akkuta'nammi Paulus ri ke'nanga angkana, “Le'ba'mi nutarima RohNa Allata'ala ri wattunnu tappa' ri Isa?” Appialimi ke'nanga angkana, “Tenapa. Ba'lalo tenapa kile'ba' allangngere' angkanaya nia' RohNa Allata'ala.”

³Akkuta'nammi Paulus angkana, “Jari lanri inai nanije'nekko?” Appialimi ke'nanga angkana, “Lanri pa'je'ne'na Yohanes.”

⁴ Nakanamo Paulus, “Naje'neki Yohanes taua sollanna akkulle nipa'nassa angkanaya ma'nassa toba' ngasemmi anjo taua battu ri dosa-dosana. Mingka tuli napau tongiji Yohanes mae ri tu Israelka, angkanaya musti tappaki ke'nanga mae ri Tau niaka battu ribokoanganna, iamintu Isa.”

⁵Ri wattunna nalangngere'mo ke'nanga anjo napaua Paulus, nasuro je'ne'mi kalenna ke'nanga lalang arenNa Batara Isa.

⁶Na ri wattunna napatompang limanna Paulus irateanganna ke'nanga, battumi RohNa Allata'ala angkoasai ke'nanga; sa'genna akkullemo ke'nanga a'bicara lalang a'rupa-rupa bicara appakalannasaka, siagang napabattumi ke'nanga kabara' battua ri Allata'ala.

⁷Niaki kira-kira sampulo anrua jaina ke'nanga.

⁸Niaki tallum bulang sallona tuli a'bicara siagang barani Paulus mae ri tau niaka lalang ri balla' sambayanga. A'bicarami siagang ke'nanga sollanna akkulle a'jari tappa' ke'nanga mae ri Allata'ala siagang PamarentahanNa.

⁹Mingka nia' siapa are ri ke'nanga sanna' terasa'na pa'mai'na, siagang taerokai tappa'. Nacallami ke'nanga ri dallekang pa'rappunganna anjo taua, anjo pangngajarang ri passala' ero'Na Allata'ala ampasalamaki rupataua lalang ri KalenNa Isa. Lanri kammana, a'lampami Paulus ambokoi ke'nanga, nampa a'lampa siagang tau tappakamo ri Isa mange ri kamara' sikolana Tiranus. Anjoreng, allo-allomi sipa'bicara siagang taua.

¹⁰Iaminjo tuli nagaukang ruan taung sallona, sa'genna sikontu tau niaka ammantang ri daera Asia, baji' na tu Yahudi yareka bansa-bansa maraenga, nalangngere' ngasemmi ke'nanga kana-kananNa Batara.

¹¹Jaimi gau' appakalanna'-lannasa' Nagaukang Allata'ala lalang ri kalenna Paulus.

¹²Ebara'na, punna nierang passapunna yareka passikko' aya' le'baka napake Paulus mae ri tau garringa, akkullemi a'jari baji' taua, yareka assulu'mi roh ja'dalaka ri kalenna ke'nanga.

¹³Anjo wattua nia' siapa are sanro-sanro tu Yahudi masarroa a'lampa kere-keremae ambongkai roh ja'dalaka battu lalang ri kalenna tau nasosoka roh ja'dala'. Nacoba-coba tongi anjo sanro-sanroa ampakei arenNa Isa untu' ambongkai anjo roh-roh ja'dalaka. Angkanami ke'nanga ri anjo roh-roh ja'dalaka, “Lalang arenNa Isa, anjo napabattua Paulus, kamma-kamma anne kusuroko assulu'!”

¹⁴Niaki tuju ana'-ana' bura'nena imang kapalaya, iamintu niarenga Skewa anggaukangi anjo kammaya.

¹⁵Mingka nakanamo roh setanga ri ke'nanga, “Kuassengi anjo Isa, kammayatompa kuasseng tongi anjo Paulus; mingka ikau anne, inai ngasengko?”

¹⁶Nampa a'lumpa'mi anjo tau nasosoka setang siagang sanna'mi larrona ambakkai ke'nanga nanakokko'. Sa'genna lari ngasemmi ke'nanga ambokoi anjo ballaka. A'bokka'-bokka'mi kalenna, siagang assolara'mi, lanri nikekke'-kekkekangi care-carena battu ri kalenna ke'nanga.

¹⁷Nalangngere'mi sikontu tu Yahudia siagang bansa-bansa maraeng niaka ammantang ri Efesus anjo apa kajarianga, sa'genna a'jari malla'mi ke'nanga. Napila' nipujimo arenNa Batara Isa.

¹⁸Jaimi tau tappakamo ri Isa battu ammangakui ri dallekanna tau jaia sikamma panggaukang salana ke'nanga ri wattu allaloa.

¹⁹Na sikamma tau biasaya ammake baca-baca, massing napa'rappungammi sura' jima'-jima'na ke'nanga nampa natunu ri dallekanna tau jaia. Punna nipasse're ballinna anjo sura'-sura' nitunua, nia' kira-kira limampulo sa'bu doe' pera' jaina.

²⁰Kammaminjo, sanna' heba'na batena pila' tassiara' kana-kananNa Batara, siagang pila' lompomi pangaruna.

²¹Le'ba'namo kajariang ngaseng anjo sikammaya, apparurumi Paulus ero' a'lampa mange ri Makedonia siagang Akhaya, nampa annarrusu' mange ri Yerusalem. Nakana Paulus, “Punna battu anjoremma' musti lamange tonga' ri Roma.”

²²Jari nasuromi rua pambantuna, iamintu Timotius siagang Erastus, a'jappa riolo mange ri Makedonia. Na ia ammantangiji siapa are sallona ri daera Asia.

²³Kira-kira iaminjo wattua nania' karicuang lompo ri Efesus passabakkang pangngajarang ri passala'na Isa.

²⁴Nasaba' anjoreng ri kotaya nia' sitau tukang pera', niarenga Demetrius, appareka balla'-balla'na Rewata Artemis. Sanna' jaina wassele' nagappa anjo taua mae ri pajama-jamana.

²⁵Lanri kammana napa'rappungammi sikamma pajama-jamana siagang pajama-jamana tukang pera' maraenganga; nampa nakana, “Kammanne sari'battangku ngaseng! Massing nuassemmi angkanaya battu ri anne jama-jamanta kinggappa wassele'.

²⁶Na kamma-kamma anne massing nucini'mi siagang massing nulangngere'mi, apa nagaukanga anjo Paulus. Napaui angkana anjo rewata-rewata napareka rupataua tena sikali nakkulle nikana rewata. Najaimo tau akkulle a'jari tappa' ri anjo pangngajaranna; tena na ri Efesus bawang mingka a'birimmi a'la'bang todong ri sikontu daera Asia.

²⁷Bahayana mae ri katte, iamintu nasaba' akkullei anggappa areng kodi usahata. Ba'lalo tena nasikammaja anjo bawang, nasaba' manna balla'na Rewata Artemis lanicini' tuna tommi siagang lanionjo'-onjokammi kalompoanna; padahala', iami rewata nipakalompoa ri sikontu tau niaka ri Asia siagang tau niaka ri sikontu linoa!”

²⁸Nalangngere'na ke'nanga anjo bicara kammaya, a'jari bambammi nyawana ke'nanga. Akkiok-kio'mi ke'nanga angkana, “Nipakalompoi Artemis, rewatana tu Efesus!”

²⁹A'la'bammi anjo karicuanga sa'genna ri sikontu kotaya. Nampa mangemi anjo kumpulanna tau apparicua anjakkalaki Gayus siagang Aristarkhus. Nasaba' iaminjo tau anrurungangi Paulus battu ri Makedonia lalang ri pa'lampanna. Nare'resammi ke'nanga anjo tau ruaya mange ri tampa' luara'na anjo kotaya.

³⁰Ero'mi Paulus antama' ampinawangi ke'nanga, mingka nipisangkai ri sikamma tau tappaka ri Isa.

³¹Nia' todong siapa are tumalompo ri daera Asia, a'jari aganga ri Paulus, assuro pauangi Paulus sollanna tena namange ampappicinikangi kalenna anjoreng ri tampa' luaraka.

³²Anjo wattua sikamma tau niaka a'rappung ri lapanganna anjo kotaya a'jari sanna'mi ricuna. Sangka' rupami napau taua ammarrang-marrang. Nasaba' jaiangangi ke'nanga tangngassengai angkana apa saba'na nania' ke'nanga anjoreng ri paranga a'rappungang.

³³Nia' sitangnga ri ke'nanga nakana passala' Aleksander, nasaba' iami nisorong mae ri dallekang ri tu Yahudia. Jari napanai'mi limanna Aleksander sollanna nisare wattu a'bicara ampakasingaraki kalenna ri dallekanna anjo tau jaia.

³⁴Mingka nacini'na ke'nanga angkana tu Yahudi anjo Aleksander, appada-padami ke'nanga ammarrang lompo angkana, “Nipakalompoi Artemis, rewatana tu Efesus!”

³⁵Kale'bakkanna akkullemi nipakasannang anjo tau jaia ri jurutulisi'na anjo kotaya. Nakana anjo jurutulisika, “Ikau ngaseng tau ammantanga ri Efesus! Baji' ngaseng naassenna taua angkanaya anne tau niaka ri Efesus amparakai balla'na Rewata Artemis siagang batu matangkasa' tu'guruka battu ri langika.

³⁶Manna sitau tena nania' akkulle anggeakki anne passalaka. Jari lanri kammana, sannang ngaseng mako, siagang teako pitigau'-gauki ri apa-apa tenaya nupahangi.

³⁷Anne taua nuerangi mae anrinni teai passabakkang le'ba'na naalle passa apa-apa niaka ri balla' rewataya, yareka lanri le'ba'na nahina ke'nanga rewatanta.

³⁸Punna nia' tau lanatuntu' Demetrius siagang pajama-jamana, boli'mi kamma nanaerang anjo parkaraya mange ri pangadelanga. Tuli tassungkeji pangadelanga, siagang tuli nia' tonji pamarentaya punna nia' tau ero' nituntu'.

³⁹Mingka punna nia' ija apa-apa maraengang nukaeroki, anjo musti nipassirapakkang baji'-bajiki lalang ri passirapakkang tau jaia.

⁴⁰Nasaba' anne kajarianga anne alloa, akkullei a'jari bahaya ngaseng mae ri katte. Akkulleki' nitudu ero' angngewai pamarentaya, nasaba' tena sikali akkulle nipare' pattuppuang nakkulle nipannaba anne karicuanga.”

⁴¹Le'baki akkana kamma anjo jurutulisika, nasuromi ammotere' ngaseng anjo tau jaia.