Read Makassar Version – KITTA' MATANGKASA LAMPA-LAMPANA 2 Bible Online

LAMPA-LAMPANA 2 - Makassar Version – KITTA' MATANGKASA bible

LAMPA-LAMPANA 2

¹ Ri wattunna narapi'mo allo Pentakosta, a'rappungang ngasemmi sikamma tau tappaka ri se'reang tampa'.

²Ti'ring nia'mo sa'ra kalangngerang battu ri langika, sangkammaya anging lompo sa'ranna. Sangnging ia mami anjo sa'raya kalangngerang anjoreng ri balla' napammantangia ke'nanga ammempo a'rappungang.

³Nampa nia'mo nacini' ke'nanga lila-lila kamma pepe', allepa' mange-mange sa'genna a'dongko' massing-massing mae ri ke'nanga.

⁴Nikoasai ngasemmi ke'nanga ri RohNa Allata'ala, sa'genna appakkaramulamo akkulle a'bicara lalang a'rupa-rupa bicara. Akkullemi a'bicara ke'nanga situru' apa nisareangai ri RohNa Allata'ala untu' lanapau.

⁵Anjo wattua jai tu Yahudi ammantang ri Yerusalem, battua ri a'rupa-rupa pa'rasangang ri sikontu linoa. Sangnging tau malla' ngaseng ke'nanga ri Allata'ala.

⁶Ri wattunna kalangngerang anjo sa'raya, jaimi tau battu a'lipung. Ta'bangka ngasemmi ke'nanga nalangngere'na akkulle a'bicara anjo tau tappaka ngaseng situru' massing bicaranna ke'nanga.

⁷Lalang lannasa'na siagang takkajanna'na ke'nanga, nakanamo ke'nanga, “Sikontu anjo tau a'bicaraya sangnging tu Galilea!

⁸Antekamma kajarianna, sa'genna akkulle nilangngere' ke'nanga a'bicara lalang bicara battua massing ri pa'rasanganta?

⁹Ikatte tu battua ri pa'rasangang Partia, Media, Elam; Mesopotamia, Yudea, Kapadokia, Pontus, Asia,

¹⁰Frigia, Pamfilia, Mesir, siagang battu ri daera-daera Libia sikambania Kirene; ikatte niakki' tu battu ri Roma,

¹¹nia' tu Yahudi, siagang tu bansa-bansa maraeng antamayamo agama Yahudi; nia' todong tu battu ri Kreta siagang battu ri Arab. Massing nilangngere' ngasemmi ke'nanga a'bicara lalang bicaranta ngaseng; nabicaraya ke'nanga iamintu gau'-gau' appakalannasa' Nagaukanga Allata'ala!”

¹²Lalang lannasa'na siagang takkajanna'na ke'nanga, akkuta'nang ngasemmi para ia ke'nanga angkana, “Apa ngaseng battuanna anne apa kajarianga?”

¹³Mingka nia' tommo ri ke'nanga pacau-cau, angkana, “Hah, poro nasa'ring ngasennaja anjo ke'nanga!”

¹⁴Ammentemmi Petrus siagang anjo sampuloa asse're tunisuro maraenganga, nampa a'bicara mae ri anjo tau jaia. Nalompoimi sa'ranna Petrus angkana, “Sikamma sari'battangku, tu Yahudia siagang sikamma tau niaka ammantang ri Yerusalem! Pilangngeri baji'-baji', nasaba' parallui nipakasingara' anne passalaka mae ri kau ngaseng.

¹⁵Anne taua tena nanasa'ringi sangkamma nupakkanaya ri nawa-nawannu, nasaba' kamma-kamma anne nampai tette' salapang ri bari'basaka.

¹⁶Mingka anne passalaka, le'ba' memammi Napabattu Allata'ala lalang ri kalenna Na'bi Yoël, ri wattunna angkana:

¹⁷ Nakana Allata'ala, ‘Ri allo kala'busanna jammanga laKupaturungi RohKu mae ri sikamma taua. Lanapabattuangko ana'-ana' bura'nenu siagang ana'-ana' bainenu sikamma apa-apa le'baka Kupabattu mae ri ke'nanga. Lanaciniki tu rungkanu apa-apa Kupappicinikanga mae ri ke'nanga. Lasso'nai tu toa-toanu, iamintu so'na Kupabattua mae ri ke'nanga.

¹⁸Ba'lalo manna ata-atangKu — bura'ne siagang baine — laKupiturungi tongi RohKu anjo allo-alloa. Lanapabattuangko ke'nanga, apa-apa le'baka Kupabattu mae ri ke'nanga.

¹⁹Lappa'niakKa' apa-apa appakalannasa' rate ri langika, siagang gau'-gau' tantamaya ri akkala'nu irawa ri anne linoa; lania' cera' siagang pepe', umbu siagang saliu'.

²⁰La'jari sassangi alloa, la'jari ejai bulanga sangkamma cera' ri tenanapa nabattu AllonNa Batara, iamintu allo malompoa siagang mala'birika.

²¹Anjo wattua, inai-nai akkio' mae ri Batara iami lanipasalama'.’

²²Sikamma sari'battangku tu Israelka! Pilangngeri anne apa kupaua: Anjo Isa, battua ri Nazaret, nisarei tugasa' ri Allata'ala untu' ikau ngaseng. A'nassa sikalimi anjo lalang ri gau'-gau' appakalannasa' siagang apa-apa tenaya narapiki akkala'nu, le'baka Nagaukang Allata'ala ri tangnga-tangnganu lalang ri KalenNa anjo Isa. Yangasenna anjo massing nuassemmi.

²³ Situru' ero' KalenNa, Natappukimi Allata'ala laNapassareang Isa Almasi mae ri kau ngaseng. Na ri wattunna nipassareang mae ri kau ngaseng, nuallemi nubuno, lanri nubalang parekanna nisalli' ri tau ja'dalaka.

²⁴ Mingka nipattallasa' poleangi ri Allata'ala battu ri alla'na tau matea. Nia'luki ri kamateanga, mingka nilappassangi ri Allata'ala, lanri tena olona lakkulle tuli lanikoasai ri kamateanga.

²⁵ Ri passala'na anne Isa, le'baki Daud akkana kamma anne, ‘Kuciniki Batara tuli nia' ri dallekangku; Narurunganga' ri sa'ringku, sollangku tanipakamallaka ri apa-apa mamo.

²⁶Iaminjo saba'na namarannu sanna' atingku nakupaumo pammuji-mujia; na sannammonne batangkalengku lamattayang lalang ri jerakku.

²⁷Nasaba' tena natuli nubalang parekangi nyawaku ammantang lalang ri linona tu matea. Tanubalang parekangai ata majarreka ri kau a'jari ancuru' na la'busu'.

²⁸Le'ba'ma' Nujo'jokang oloang mangea ri katallassang sitojennaya. Sanna' sikalimi lompona rannuku, lanri nia'Nu anrurunganga'.’

²⁹Sikamma sari'battangku, boli'mi kamma nakupau silambusu'na ri passala'na Daud boeta ngaseng. Matemi Daud siagang le'ba'mi nitarawang; sa'genna kamma-kamma anne nia' iji jera'na ri tangnga-tangngata.

³⁰ Le'ba'mi a'janji siagang assumpa Allata'ala mae ri Daud, angkanaya nia' sallang kalase'renna sossoranna Daud laniangka' ri Allata'ala a'jari karaeng. Lanri naassenna Daud anjo janjia, siagang ia na'bi tongi,

³¹naasseng tommi apa laNagaukanga pole Allata'ala. Jari napaumi la'bi riolo angkanaya lattallasa' poleangi battu ri kamateanga anjo Karaeng Mappasalamaka, anjo Napa'janjianga Allata'ala. Nakana Daud, ‘Tena nanibalang parekangi ammantang ri linona tu matea; talaancurai siagang talala'busai BatangkalenNa.’

³²Iaminne Isa nipattallasa' poleanga ri Allata'ala battu ri kamateanga. Ikambe minne le'ba' anciniki anjo apa kajarianga.

³³Niangka'mi nai' ri empoang kaminang tinggia siagang nisaremi koasa ri Allata'ala, nampa Natarima RohNa Allata'ala, le'baka Napa'janjiang Manggea. Na anne apa nulangngereka siagang nucinika kamma-kamma anne iaminjo RohNa Allata'ala, Napaturunga mae ri kambe.

³⁴ Kalenna Daud tanaikai ri suruga, mingka angkanai Daud, ‘Nakana Batara mae ri Bataraku:

³⁵Ammempo maKo ri sa'ri kanangKu,[1] sa'genna Kusuro ngaseng akkulantu' musu-musunNu ri dallekanNu!’

³⁶Iaminjo saba'na namusti naasseng tojeng-tojeng sikontu bansa Israel angkanaya anjo Isa, le'baka nusalli', Iatommi anjo Isa le'baka Naangka' Allata'ala a'jari Batara siagang Karaeng Tumappasalamaka!”

³⁷Nalangngere'na ngaseng ke'nanga anjo napaua Petrus, sanna' ngasemmi dinging-dinginna atinna ke'nanga. Jari akkuta'nammi ke'nanga ri Petrus siagang anjo tunisuro maraenganga, angkana, “Jari apamo musti nigaukang anne, sari'battang?”

³⁸Appialimi Petrus nakana, “Toba' ngaseng mako battu ri dosa-dosanu. Siagang musti massing nije'ne' ngasengko lalang arenNa Isa Almasi, sollanna nipammopporang dosa-dosanu. Nampa lanutarima passareNa Allata'ala, iamintu RohNa Allata'ala.

³⁹Nasaba' anjo Napa'janjianga Allata'ala untu' ikau ngaseng siagang sossorannu, kammayatompa untu' tau battua ri pammantangang bellaya — iamintu sikontu tau Nakioka Allata'ala Batarata battu mae ri Ia.”

⁴⁰Kammaminjo napakasingaraka Petrus mae ri ke'nanga. Siagang ilalang a'rupa-rupa bicara maraengang, napakainga' tommi ke'nanga sollanna napakabella kalenna ke'nanga battu ri anne bansa ja'dalaka laNahukkunga sallang Allata'ala.

⁴¹Jaimi tau tappa' mae ri anjo napaua Petrus, nampa nije'ne'mo ke'nanga. Jari anjo alloa katambammi jaina tau tappaka a'jari tallussa'bu tau.

⁴²Tuli attojeng-tojemmi ke'nanga appilajara' ri tunisuroNa Allata'ala. Siagang tuli a'rappungammi ke'nanga appala' doang siagang sipangnganreang.

⁴³Jai sikali gau'-gau' appakalannasa' nagaukang tunisuroNa Allata'ala. Sa'genna jaimi tau a'jari lannasa' siagang a'jari malla'.

⁴⁴ Tuli ma'julu ati ngasengi anjo tau tappaka. Punna nia' apa-apanna ke'nanga, napassama-samai napake.

⁴⁵Nabalukammi apa-apanna siagang pa'barang-baranganna ke'nanga, nampa nabage-bage ballinna ke'nanga situru' massing kaparalluanna ke'nanga.

⁴⁶Allo-allona ke'nanga tuli a'rappungang ri Balla'Na Batara; kammayatompa a'le'ba'-le'basaki ke'nanga assama-sama angnganre ri balla'na. Na rannu pa'mai' siagang tuna pa'mai' ngasengi ke'nanga.

⁴⁷Siagang tuli mammuji-muji ke'nanga ri Allata'ala, na ningai ngaseng ri tau jaia. Pila' mange allo pila' katambangi jaina ke'nanga, lanri pila' Natambai Allata'ala tau nipasalamaka mae ri ke'nanga.