Read Makassar Version – KITTA' MATANGKASA LAMPA-LAMPANA 20 Bible Online

LAMPA-LAMPANA 20 - Makassar Version – KITTA' MATANGKASA bible

LAMPA-LAMPANA 20

¹Ri wattunna a'jari sannammo ammotere' taua ri Efesus, napa'rappungammi Paulus anggota jama'aka nampa napakajarre' ke'nanga. Le'baki anjo appala' kanami, nampa a'lampa mange ri Makedonia.

²Nakunjungimi sikamma tau tappaka ri Isa ri daera Makedonia. Jaimi pappakainga' napauangi ke'nanga, siagang napakajarre'mi tappa'na ke'nanga. Le'baki anjo a'lampami mange ri Yunani.

³Tallum bulangi sallona ammantang anjoreng. Nampa ri wattunna apparuru ero' assombala' mange ri Siria, nia'mo kabara' angkanaya assikongkoloki tu Yunania ero' ambunoi. Jari a'giling a'lampa mangemi ammotere' angngolo ri Makedonia.

⁴A'lampami siagang Sopater, ana'na Pirus battua ri Berea; nia' tommi amminawang Aristarkhus, Sekundus tu battu ri Tesalonika, siagang Gayus, tu Derbe. Kammayatompa Timotius, Tikhikus siagang Trofimus, battua ngaseng ri daera Asia.

⁵A'jappa riolomi ke'nanga, nampa attayang ri Troas.

⁶Le'baki Passua'-suarrang Roti Tenaya Nammake Pa'gambang, a'lampa maki' assombala', ambokoi Filipi. Narapiki limangallo sallona, a'rappungang siagang ke'nanga ri Troas. Sidamingguki' ammantang anjoreng.

⁷Ri wattunna bangngi daminggu a'rappungang maki' ero' sipangnganreang ampakajarreki passari'battanganta. A'bicara memammi Paulus siagang sikamma tau hadereka, nasaba' ammukona ero'mi a'lampa. Sa'genna tangnga bangngi a'bicara iji Paulus.

⁸Anjo kamara' nipa'rappungia kamara' irateang. Jai lampu lalang ri anjo kamaraka.

⁹Nia'mo se're turungka ammempo ri jandelaya niarenga Eutikhus. Lanri tenapa nammari-mari a'bicara Paulus, ta'do'do' sikalimi anjo turungkaya. Tanasa'ringami kalenna nattinro ri jandelaya sa'genna tu'guru' naung battu rate ri loteng makatallua. Ri wattunna niangka', niassemmi angkana matemi anjo turungkaya.

¹⁰Mingka naummi Paulus, nanra'ba anrakaki anjo turungkaya. Nakanamo Paulus ri taua, “Teako batai, attallasa' iji!”

¹¹Le'baki anjo nai'mi ammotere' Paulus ri kamara' napa'rappungia ke'nanga. Nabage-bagemi rotia nampa para angnganre ke'nanga. Sa'genna bari'basa' a'bicara iji Paulus. Le'baki anjo a'lampami Paulus.

¹²Naerammi taua anjo turungka attallasa' poleanga ammotere' mange ri balla'na. Sannang ngasemmi nyawana ke'nanga siagang anggappami panynyaleori lompo ke'nanga.

¹³A'lampa riolo maki' mange ri kappalaka nampa kiassombala' mange ri Asos. Anjorempaki' antayangi Paulus ri kappalaka. Nasaba' le'ba'mi naatoro' Paulus angkana ia lanumalo ri bontoai mange ri Asos.

¹⁴Ri wattunta assigappamo ammotere' ri Asos, nai'mi Paulus ri kappalaka, nampa kiassombala' mange ri Metilene.

¹⁵Battu anjoreng assombala' maki' pole, sa'genna ammukona battu maki' mange ri tampa' sidallekanga siagang Khios. Ammembara'na anrapi' maki' mange ri Samos. Nasiallo pole battu maki' mange ri Miletus.

¹⁶Le'ba'mi napattantu Paulus angkana tena nalassengka ri Efesus sollanna tena nasallo dudu ammantang ri daera Asia. Eroki akkaro-karo battu mange ri Yerusalem sollanna narapikang allo lompo Pentakostaya.

¹⁷Battu ri Miletus, akkirimmi kabara' Paulus mae ri pamimping-pamimping jama'aka ri Efesus. Napasangi ke'nanga battu angngagangi assibuntulu' punna battu Paulus mange anjoreng.

¹⁸Ri wattunna assibuntulu'mo siagang ke'nanga, nakanamo Paulus ri ke'nanga, “Sikamma sari'battangku; nuasseng ngasemmi angkanaya antekamma bateku attallasa' ri tangnga-tangnganu pakkaramula ri uru battuku ri daera Asia.

¹⁹Kupa'jari tunami kalengku, siagang jaimi assolong je'ne' matangku ri wattunna kugaukang jama-jamanNa Batara. Kukasia'mi pa'risika lanri kaja'dallanna tu Yahudia mae ri nakke.

²⁰Nuasseng ngasemmi angkanaya tena nakumalla'-malla' ampauangko apa niaka matu-matunna mae ri kau. Kusareko pangngajarang lalang ri pa'rappunganna tau jaia, yareka massing ri balla'nu ngaseng.

²¹Baji' namae ri tu Yahudia, yareka mae ri bansa-bansa maraenga, tuli kupakainga' ngasemmi sollanna massing toba', battu ri dosa-dosana ke'nanga nabattu mae ri Allata'ala siagang tappa' mae ri Isa.

²²Kamma-kamma anne lakuturukimi parentaNa RohNa Allata'ala, nakua'lampa mange ri Yerusalem. Na takuassenga angkanaya apa lakajariang mae ri kalengku punna battua' mange anjoreng.

²³Iaji kuasseng angkanaya le'ba'ma' Nalambusiang RohNa Allata'ala angkanaya lanitarungkua' siagang lakukasiaki sessaya. Iaminjo Napauanga' Allata'ala ri wattungku a'lampa ri kota-kota le'baka kupa'lampai.

²⁴ Mingka takujampangiai anne tallasakku, assala' akkulle mamo kupa'le'ba' anjo tugasa' Napassareanga Batara Isa mae ri nakke; kammayatompa assala' akkullea' jarre' sa'genna kala'busang tallasakku ampa'la'bangi Kabara' Bajika, iamintu ri passala'na pangngamaseanNa Allata'ala.

²⁵Le'ba' ngaseng mako massing kukunjungi, siagang le'ba' ngaseng tommi kupabattu mae ri kau ri passala'na Allata'ala siagang PamarentahanNa. Kamma-kamma anne nia'mi ri pakkasiakku angkanaya iaminne kala'busangku assicini' siagang ikau ngaseng.

²⁶Jari kulambusiang mako kamma-kamma anne, angkanaya punna nia' ri kau anggappai kapanrakanga sallang, teaimi inakke pata sala.

²⁷Tena nakule'ba' ampilari tugasakku untu' ampakasingariangko sikontu apa eroka Nagaukang Allata'ala ri kau ngaseng.

²⁸Paralluko anjagai kalennu. Kammayatompa paralluko anjagai sikontu jamaah le'baka Napassareang RohNa Allata'ala mae ri kau untu' lanujagai; nasaba' le'ba' mako niangka' a'jari tummarakai ri anjo jama'aka. Parallui nujagai anjo jama'aNa Allata'ala, sanrapang pakalawaki anjagai gimbala'na; nasaba' le'ba'mi Napa'jari Allata'ala anjo jama'aka a'jari pisakaNa lanri kamateanNa Ana' KalenNa.

²⁹Punna a'lampa' sallang, ma'nassa laniaki battu kongkong romang nye'nyereka ri tangnga-tangnganu. Na anjo tau nujagaia la'jarimi sanrapang kanre-kanrena anjo kongkong romang nye'nyereka.

³⁰Ba'lalo lania' tau battu ri tangnga-tangnganu tonji ambirittakangi biritta salaya. Lappanggaukang kammai anjo ke'nanga sollanna akkulle tau tappakamo ri Isa a'jari sala oloang, nampa amminawang ri ke'nanga.

³¹Lanri kammana, paralluko a'jaga-jaga! U'rangi angkanaya tallun taungi salloku tammari-maria angngajarakko allo bangngi, siagang jaimi je'ne' matangku ammatti' lalang kugaukanna anjo jama-jamanga.

³²Kamma-kamma anne kupassareang mako mae ri Allata'ala, naporo Iami amparakai ngasengko, siagang nuporo anna'gala' jarre' ngaseng mae ri anjo kabara' pangngamaseanNa Allata'ala. Koasai Allata'ala ampakajarrekko siagang assareko barakka'-barakka'Na, le'baka Napasadia untu' sikontu umma'Na.

³³Manna sitau tania' le'ba' kupattayangi doe' yareka care-care.

³⁴Ikau ngaseng tonji angngassengi angkanaya battu ri posoku tonji anjama nakkulle kututuki kaparalluang allo-alloku siagang sikamma tau amminawang ri nakke.

³⁵Lalang ri kammana anjo, nakusare mako conto, angkanaya paralluki' anjama terasa', sollanna akkulle nitulung tu tenaya pakkullena. Nasaba' parallui niu'rangi apa le'baka Napau Isa, angkanaya, ‘La'bi te'neangangi nikanaya assare naia nikanaya annarima.’ ”

³⁶Le'baki a'bicara Paulus, akkulantu'mi siagang ke'nanga nampa appala' doang.

³⁷Angngarru' ngasemmi ke'nanga siagang naraka'mi Paulus nampa nalappassang na napasalama' a'lampa Paulus.

³⁸Sanna' ngaseng si'nana atinna ke'nanga, la'biangampa lanri nakanana Paulus angkanaya talasicinikami ke'nanga. Naantara'mi ke'nanga Paulus sa'genna nai' ri kappalaka.