Read Makassar Version – KITTA' MATANGKASA LAMPA-LAMPANA 21 Bible Online

LAMPA-LAMPANA 21 - Makassar Version – KITTA' MATANGKASA bible

LAMPA-LAMPANA 21

¹Assijama'-jamakki maki' siagang anjo pamimping-pamimping jama'aka ri Efesus. Le'baki anjo a'lampa maki' ambokoi ke'nanga. Assombala' maki' annarrusu' mange ri pulo Kos; ammukona battu maki' mange ri pulo Rodos. Battu anjoreng annarrusu' maki' assombala' mange ri palabuhang Patara.

²Ri Patara, anggappa maki' kappala' eroka mange ri Fenisia. Jari nai' maki' ri anjo kappalaka kinampa a'lampa.

³Assombala' maki sa'genna nicini'mo pulo Siprus ri ba'leang kairinta; mingka annarrusu' maki' assombala' mange ri Siria. Battu maki' mange ri Tirus. Nakinaummo ri bontoa anjoreng, lanri lanabongkara'mi apa-apa naeranga anjo kappalaka.

⁴Mange maki' angkunjungi tau tappaka ri Isa anjoreng ri tampaka, nampa ammantang maki' siagang ke'nanga sidaminggu sallona. Lanri pappijo'jo'Na RohNa Allata'ala napakainga'mi ke'nanga Paulus, sollanna tena na'lampa Paulus mange ri Yerusalem.

⁵Mingka ri wattunna lala'busu'mo wattunta lammantang anjoreng, a'lampa maki' ambokoi ke'nanga, nanipannarrusu' lampata. Amminawang ngasemmi ke'nanga massing sipammanakang angngantarakki' sa'genna assulu' ri pantaranganna kotaya. Anjoreng ri biring tamparanga, akkulantu' ngaseng maki' appala' doang.

⁶Le'baki anjo assijama'-jamakki maki', kinampa nai' ri kappalaka; nammotere' ngaseng tommo ke'nanga.

⁷Annarrusu' maki' assombala' battu ri Tirus sa'genna mange ri Ptolemais. A'lampa maki' angkunjungi sikamma tau tappaka ri Ptolemais, untu' ampabattui sallanta. Ammantang maki' anjoreng siallo siagang ke'nanga.

⁸ Ammukona a'lampa maki' pole, nakibattumo mange ri Kaisarea. Anjoreng, mange maki' ri se'reang pabiritta Kabara' Baji' niarenga Filipus. Ammantang maki' ri balla'na. Anne Filipus, iami kalase'renna anjo tau tujua le'baka nipile ri Yerusalem.

⁹Nia' appa' ana' tulolona le'ba' nisare pakkulle ri Allata'ala ampa'la'bangi Kabara' Baji' battua ri Allata'ala.

¹⁰ Ri wattunta pirangallo aremo ammantang anjoreng, nia'mo battu sitau na'bi niarenga Agabus; anne Na'bi Agabus battu anjorengi ri Yudea.

¹¹Battui mae ri kambe nampa naalle passikko' aya'na Paulus. Napakemi anjo passikko' ayaka ansikkoki lima kalenna siagang bangkeng kalenna nampa nakana, “Iaminne Napaua RohNa Allata'ala: Anne patanna passikko' ayaka lanisikko' kammaminne ri tu Yahudia ri Yerusalem, nampa nipassareang mae ri bansa maraenga.”

¹²Nilangngere'na anjo bicara kammaya, nipala'mi siagang sikontu tau tappaka ri Kaisarea, sollanna tena na'lampa Paulus mange ri Yerusalem.

¹³Mingka appialimi Paulus angkana, “Apa matu-matunnu angngarru' kamma ngaseng, sa'genna a'jari ancuru' kusa'ring atingku? Kamma-kamma anne sadiama'; teako angkana nijakkala' bawang, mingka sadiama' ba'lalo mate lanri Batara Isa.”

¹⁴Taerokai Paulus ampilangngeri kananna ikambe, jari ammari maki' ampisangkai Nikanamo: “Boli'mi kamma naero'Namo bawang Batara anjari.”

¹⁵Le'bakki' ammantang siapa are sallona anjoreng, nipasadiami apa-apanta, kinampa a'lampa mange ri Yerusalem.

¹⁶Nia'mo siapa are sari'battanga ri Kaisarea amminawang todong angngantarakki', mange ri balla'na Manason, nasaba' anjoreng maki' a'bangngi-bangngi. (Anne Manason tau battu ri Siprus, siagang sallomi a'jari tappa' ri Isa.)

¹⁷Ri wattunta battu mange ri Yerusalem, nitarima baji' maki' ri sikamma sari'battanga anjoreng.

¹⁸Ammukona, a'lampa maki' siagang Paulus mange angkunjungi Yakobus; nia' ngaseng tongi pamimping-pamimping jama'aka anjoreng.

¹⁹Le'bakki' massing sijamakki, nacaritami Paulus mae ri ke'nanga sikontu apa le'baka Nagaukang Allata'ala lalang ri kalenna ri tangnga-tangngana bansa-bansa maraenga.

²⁰Le'baki nalangngere' ke'nanga anjo caritana Paulus, ammuji-muji ngasemmi ke'nanga mae ri Allata'ala. Nampa nakanamo ke'nanga ri Paulus, “Paulus! Parallui nuasseng sari'battang, angkanaya assa'bu-sa'bumi tu Yahudi a'jari tappa' ri Isa. Najarre' ngaseng ke'nanga angkatutui sikamma parentaNa Allata'ala, le'baka napabattu Musa.

²¹Na kamma-kamma anne nalangngere'mi ke'nanga angkanaya le'ba'mi nuajara' sikamma tu Yahudi niaka ammantang ri tangnga-tangngana bansa maraenga, sollanna nabokoimo ke'nanga anjo sikamma parentaNa Allata'ala napabattua Musa. Nupakainga'mi ke'nanga sollanna tenamo nanasunnaki ana'-ana'na ke'nanga, yareka tenamo nanaturuki ke'nanga ada'-ada'na tu Yahudia.

²²Kamma-kamma anne tantu naassemmi anjo sikamma tu Yahudi tappakamo angkanaya niakko anrinni. Jari, apamo lanigaukang kamma-kamma anne?

²³ Bajikangang pilangngerimi anne pappakainga'na ikambe. Nia' appa' tau anrinni le'bakamo a'janji ri Batara.

²⁴Jari a'lampamako siagang ke'nanga mange appare' acara massing antangkasi ngasengi kalennu. Siagang tanggongimi ongkoso'na ke'nanga sollanna akkulle nicukkuru' ke'nanga. Punna nugaukangi anjo kammaya, la'nassami mae ri taua angkanaya tena nakamma tojeng anjo kabara' nalangngereka ke'nanga; nasaba' manna ikau nugaukang tonji sikamma parentaNa Allata'ala, situru' apa le'baka napabattu Musa.

²⁵ Mingka anjo bansa maraenga siagang tappakamo ri Isa, le'ba'mi nikiringi sura' ke'nanga, ampauangi apa le'baka nitappuki, angkanaya: takkulleai ke'nanga angkanrei kanre le'baka nipassareang mae ri barhalaya, takkulleai ke'nanga angnganre cera', yareka takkulleai ke'nanga angnganre olo'-olo' mate niaccekang; siagang takkulleai ke'nanga anggaukangi nikanaya gau' assalimara'.”

²⁶Jari a'lampami Paulus siagang anjo appaka tau. Ammukona, appare'mi acara ke'nanga sollanna akkulle massing natangkasi ngaseng kalenna ke'nanga. Le'baki anjo antama'mi ke'nanga ri Balla'Na Batara ero' ampaui angkanaya pirangallopi nampa le'ba' anjo acara pannangkasi kalea. Kammayatompa angngerammi ke'nanga koro'bang, eroka massing napassareang ke'nanga.

²⁷Ri wattunna lala'busu'mo anjo wattu tuju alloa, nia'mo siapa are tu Yahudi battu ri daera Asia anciniki Paulus lalang ri Balla'Na Batara. Napakabambammi ke'nanga tau jaia, nampa nata'gala' Paulus.

²⁸Nakkio' ke'nanga angkana, “He, tu Israelka, bantu saiki'! Iaminne tau le'baka a'lampa mange-mange angngajaraki sikontu taua pangngajarang angngewai bansa Israelka, siagang andakkai sikamma parentaNa Allata'ala, le'baka napabattu Musa; kammayatompa nahina tongi anne Balla'Na Batara. Na kamma-kamma anne ba'lalo naerammi bansa-bansa maraenga antama' ri Balla'Na Batara, anra'ma'-ra'massi anne tampa' matangkasaka!” (

²⁹ Kammaminjo kananna ke'nanga lanri nacini'mi Trofimus anjo tu Efesuska assiagang Paulus ri kotaya; na nakapammi ke'nanga angkanaya naerang tommi Paulus anjo taua antama' ri Balla'Na Batara.)

³⁰A'jari sanna'mi ricuna taua ri sikontu anjo kotaya, siagang assilari-larimi mange a'lipung. Najakkala'mi ke'nanga Paulus, nampa nare'resang assulu' ri Balla'Na Batara. Anjo wattua nitongko'mi linta' pakke'bu' Balla'Na Batara.

³¹Lalang ero'na anjo sikamma tau apparicua ambunoi Paulus, nia'mo tau lari mange ri komandang pasukanna tantara Roma. A'laporo'mi anjo taua angkanaya sanna' ricuna taua ri sikontu kota Yerusalem.

³²Akkio'mi linta' siapa are tantara siagang siapa are perwira anjo komandang pasukanga. Le'baki anjo akkaro-karomi ke'nanga mange anjoreng ri tampa' karicuanga. Nacini'na anjo tau jaia battu anjo komandanga siagang pasukanna, ammarimi ke'nanga amba'ji Paulus.

³³Mangemi anjo komandanga ri Paulus nampa najakkala', nampa nasuro taua ansikkoki limanna. Le'baki anjo akkuta'nammi anjo komandanga angkana inai tau anjo Paulus, siagang apa le'ba' nagaukang.

³⁴A'rupa-rupami batena appiali anjo tau jaia. Teaimi sipato' ricuna anjo taua. Sa'genna takkulleami napahang anjo komandanga angkanaya apa sitojenna le'ba' kajariang. Jari nasuro erammi Paulus mange ri kantoro' tantaraya.

³⁵Ri wattunna narapi'mo tuka'-tukaka, a'jallo' lompo ngasemmi anjo tau apparicua. Sa'genna musti niangka' mami Paulus ri anjo pasukanga.

³⁶Nipinawammi ke'nanga ri sikamma anjo tau apparicua. Akkiok-kio'mi anjo tau apparicua angkana, “Allei buno!”

³⁷Ero'namo antama' ke'nanga ri kantoro' tantaraya, nakanamo Paulus ri anjo komandanga, “Maka akkulleja' a'bicara siagang ikatte komandang?” Akkuta'nammi anjo komandanga nakana, “Akkulleko a'bicara Yunani?

³⁸Jari punna kamma, teai ikau anjo tu Mesir le'baka angngewai pamarentaya pirangalloang nampa lari angngerang patassa'bu tau pangaco siagang sanjata antama' ri parang lompoa?”

³⁹Appialimi Paulus nakana, “Inakke tu Yahudia'; kota pammantangangku ri Tarsus, kota lompoa ri daera Kilikia. Kitulunga' nakisarea' kasampatang a'bicara mae ri anjo taua ngaseng.”

⁴⁰Nisaremi kasampatang a'bicara Paulus. Ammentemmi ri tuka'-tukaka nampa naangka' limanna a'jari pammatei ri taua angkana eroki a'bicara. Sannang ngasemmi taua. Le'baki anjo a'bicarami Paulus mae ri ke'nanga lalang bicara Ibrani, nakana,