Read Makassar Version – KITTA' MATANGKASA LAMPA-LAMPANA 22 Bible Online

LAMPA-LAMPANA 22 - Makassar Version – KITTA' MATANGKASA bible

LAMPA-LAMPANA 22

¹“Ikatte ngaseng bapa'-bapaka, siagang sari'battanga ngaseng! Eroki kupakasingara' kalengku mae ri katte ngaseng. Jari pilangngerimi anne kanangku!”

²Nalangngere'na anjo tau jaia a'bicara Ibrani Paulus, pila' sannang ngasemmi ke'nanga. Jari nasambummi pole bicaranna Paulus nakana,

³ “Inakke tu Yahudia'. Anjorenga' ri kota Tarsus, ri pa'rasangang Kilikia nilassukang. Mingka anrinnia' ri Yerusalem nipakalompo. Siagang anrinnia' niajara' baji' ri guru lompoa Gamaliel ri passala' atorang-atorang le'baka napassareang Musa ri boe-boeta. Sangkamma ikau ngaseng niaka anne alloa anrinni, sanna' todong rajengku anynyomba mae ri Allata'ala.

⁴ Le'baki kusessa sa'genna mate tau tappaka mae ri anjo pangngajarang berua. Kujakkala' ngasengi ke'nanga, bura'ne baine, nampa kupantama' ri tarungkua.

⁵Kalenna imang lompoa siagang sikontu anggotana Pangadelang Agamaya akkulle a'jari sa'bi angkanaya tena ku'balle-balle. Nasaba' iaminjo ke'nanga le'ba' assarea' sura' koasa, kueranga mae ri tu Yahudi niaka ri Damsyik. Anjo sura' koasaya akkullei kupare' panna'gallang untu' anjakkalaki sikamma tau tappaka mae ri anjo pangngajarang berua, ri Damsyik, nampa kuerang ke'nanga mange ri Yerusalem sollanna nihukkung.”

⁶“Ri wattu lalang a'lampaku siagang la'birimmo battu mange ri Damsyik, kira-kira ri wattu attangngana alloa, ti'ring nia'mo caya tassioro' battu ri langika angkulilingia'.

⁷Anra'bama' naung ri buttaya napakamma. Nampa nia' kulangngere' sa'ra angkana mae ri nakke, nakana, ‘Saulus, Saulus! Angngapa nanusessa kamma duduA'?’

⁸Jari akkuta'namma' angkana, ‘InaiKi' antu, Batara?’ Appialimi anjo sa'raya angkana, ‘INakkemi Isa, tu Nazaretka, sannaka nusessana.’

⁹Sikamma tau niaka kuagang a'jappa anjo wattua nacini' ngaseng tongi anjo cayaya; mingka tanalangngerai ke'nanga anjo sa'ra a'bicaraya mae ri nakke.

¹⁰Akkuta'namma' pole angkana, ‘Apa musti kugaukang Batara?’ Appialimi Batara angkana, ‘Ambangungko nai' nampa antamakko ri kota Damsyik. Anjoreng pako sallang lanipauang sikontu apa eroka Nasuro gaukang Allata'ala ri kau.’

¹¹A'jari butama' anjo wattua napakamma sioro'na anjo cayaya. Jari nirenreng mama' ri agang-agangku antama' ri Damsyik.

¹²Anjoreng ri Damsyik nia' sitau niareng Ananias. Anjo taua sanna' baji'na. Tutui anggaukangi sikamma parentaNa Allata'ala, le'baka napassareang Musa mae ri katte. Sanna' nipakala'biri'na ri sikontu tu Yahudi niaka ammantang ri Damsyik.

¹³Battumi antoakka'. Ammentemmi ri sa'ringku nampa nakana, ‘Sari'battangku Saulus, kamma-kamma anne accini' poleang mako!’ Anjo wattua assailema', nakucini'mo Ananias.

¹⁴Nampa nakanamo pole Ananias mae ri nakke, ‘Napile mako Allata'alana boe-boeta, sollanna nuasseng ero'Na. Kammayatompa sollanna nucini' Isa, AtanNa Allata'ala anggaukangai ero'Na Allata'ala, kammayatompa nulangngere' kalennu sa'ranNa Isa.

¹⁵La'jari sa'biko ampa'la'bangi anjo apa le'baka nucini' siagang nulangngere', mae ri sikontu rupataua.

¹⁶Kamma-kamma anne tea' mako sallo-salloi pole attayang. Ambangung mako nai', nanupassareang kalennu nije'ne'. Appala' popporo' mako mae ri Batara, sollannu nipammopporang ri dosa-dosanu.’ ”

¹⁷“Ammotere'ma' mange ri Yerusalem. Na ri wattungku sitabang appala' doang ri Balla'Na Batara, battumi RohNa Allata'ala angkoasai kalengku.

¹⁸Kucini'mi Batara; Nakana mae ri nakke, ‘A'lampako linta' ambokoi Yerusalem. Nasaba' taerokai taua anrinni antarimai kasa'biannu mae ri Nakke.’

¹⁹Kukanamo, ‘O Batara, baji' ngaseng naassenna ke'nanga angkanaya le'bakka' antama' ri sikamma balla' sambayanga anjakkalaki ke'nanga, siagang amba'ji sikamma tau tappaka mae ri Katte.

²⁰ Kammayatompa ri wattunna nibuno anjo sa'binTa Stefanus, nia' tonga' anjoreng siagang kusitujui tongi nanibuno. Ba'lalo inakkemi anjagai pakeanna sikamma tau ambunoai.’

²¹Mingka Nakanamo pole Batara mae ri nakke, ‘A'lampamako, nasaba' laKusuroko a'lampa mange ri tampa'-tampa' bellaya, mange ri bansa-bansa maraenga.’ ”

²²Appilangngeri ngasengi anjo tau jaia ri wattunna a'bicara Paulus. Mingka nalangngere'na ke'nanga anjo kala'busang kananna Paulus, ammarrang-marrammi ke'nanga angkana, “Bunoi anjo tau kammaya. Tena nasiratang attallasa'!”

²³Lalang ammarrang-marranna ke'nanga, napakape'-kape' tommi jubana ke'nanga sa'genna sanna'mo jaina limbu'bu' a'gapullung nai' ri langika.

²⁴Jari nisuro erammi Paulus ri anjo komandang pasukang Roma mange ri kantoro' tantaraya. Niparessa terasa'mi anjoreng, ero' niasseng angkanaya apa saba'na nammarrang-marrang kamma anjo tu Yahudia mae ri ia.

²⁵Mingka ri wattunna le'ba'mo nisikko' Paulus nampa lanicambo', nakanamo Paulus ri anjo perwira niaka ammenteng anjoreng, “Maka akkullei nicambo' bansa Romaya punna tenapa nale'ba' niadeli?”

²⁶Nalangngere'na anjo perwiraya akkana kamma Paulus, a'lampami anjo perwiraya mae ri komandang pasukanga na nakana, “Apa anne kigaukanga bapa'? Anne taua tau bansa Roma!”

²⁷A'lampami anjo komandanga mae ri Paulus, na nakuta'nang Paulus angkana, “Bedeng, kammatojengi angkana ikau bansa Romako?” Nakanamo Paulus, “Iye', inakke bansa Roma memanga'.”

²⁸Nakanamo pole anjo komandanga, “Inakke sanna' jaina kubayara' nampa akkullea' a'jari bansa Roma!” Appialimi Paulus nakana, “Mingka inakke ri wattu nilassukangku memanji nakua'jari bansa Roma memammo.”

²⁹Anjo wattua ammono'boko ngasemmi anjo tantara eroka amparessai Paulus. Kammayatompa anjo komandanga a'jari malla' tommi lanri le'ba'namo nasikko' Paulus, padahala' anjo Paulus bansa Roma paleng.

³⁰Ero' dudumi anjo komandang pasukang Romaya angngassengi angkanaya passabakkang apa sitojenna nanipasala Paulus ri anjo tu Yahudia. Jari ammukona nakio'mi imang-imang kapalaya siagang anggota-anggotana Pangadelang Agamaya sollanna a'rappungang ke'nanga. Nampa nala'gasi passikko'na Paulus, nanaerang mange ri dallekanna ngaseng ke'nanga.