Read Makassar Version – KITTA' MATANGKASA LAMPA-LAMPANA 26 Bible Online

LAMPA-LAMPANA 26 - Makassar Version – KITTA' MATANGKASA bible

LAMPA-LAMPANA 26

¹Nakanamo Agripa mae ri Paulus, “Kamma-kamma anne nisareko kasampatang a'bicara, untu' ampakasingaraki kalennu punna tena nusala.” Jari naangka'mi limanna Paulus nampa a'bicara kamma anne.

²“Tunipakala'birika Karaeng Agripa! Kubilang upa' sikali kusa'ring kalengku, lanri akkulleku a'bicara ri dallekang mala'biritta ri passala' sikammaya anjo apa-apa napappituduanga tu Yahudia mae ri nakke;

³la'biangampa pole nasaba' kiasseng sikali ada'-ada'na siagang passa'-passala'na katallassanna tu Yahudia. Lanri kammana minjo, kupalaki pa'mai' bajitta nakipilangngeri baji'-baji' anne apa eroka kupakasingara'.

⁴Naasseng ngasengi sikamma tu Yahudia angkana antekamma katallassangku appakkaramula ri wattungku rungka. Naassengi ke'nanga angkanaya appakkaramula ri wattungku a'jari tau rungka, nia'ma' ri tangnga-tangngana bansaku ri Yerusalem.

⁵ Sallomi naasseng ke'nanga angkanaya antekamma katallassangku. Na punna ero' ke'nanga, akkullei ke'nanga a'jari sa'bi angkanaya riolo iji nakuattallasa'mo sangkamma tu Farisi, siagang kuturuki ngasemmi sikontu atorang-atorang kaminang terasaka lalang ri agamana ikambe.

⁶Na kamma-kamma anne niakka' ammenteng anrinni niadeli passabakkang tappakka' mae ri janjinNa Allata'ala mae ri boe-boena ikambe.

⁷Ia tomminjo janjia le'ba' naminasai dudu sampuloa anrua suku bansa Israel. Sa'genna assambayang ke'nanga ri Allata'ala allo bangngi. Na lanri tappakku mae ri anjo janjia, Karaeng Tunipakala'birika, iaminjo nakunapassala mamo tu Yahudia.

⁸Angngapa natakkullea tappa' sikamma sari'battangku tu Yahudia angkanaya laNapattallasa' poleangi ammotere' Allata'ala tau matea?

⁹ Uru-uruna, manna inakke kukana tonja musti nigaukangi sikamma apa nikullea nigaukang angngewai anjo Isa battua ri Nazaret.

¹⁰Na memang iaminjo le'baka kugaukang ri Yerusalem. Lanri sura' koasa battu ri imang-imang kapalaya, jai sikalimi tau jarre' tappa'na ri Allata'ala le'ba' kupantama' ri tarungkua. Ba'lalo, kusitujui tongi sollanna nihukkung mate ke'nanga.

¹¹A'mole-mole sikali kusessa ke'nanga ri sikamma balla' sambayanga, lanri ero'na kupassa ke'nanga ambokoi anjo apa napatappaka ke'nanga. Lanri bambanna nyawaku mae ri ke'nanga, sa'genna manna mange ri kota-kota maraenga a'lampa tonja' angngondangi ke'nanga anjoreng.”

¹²“Iatommi anjo pattujungku nakua'lampamo mange ri Damsyik siagang angngerang sura' koasa battu ri imang-imang kapalaya.

¹³Na ri wattungku ri tangngana aganga, Karaeng Tunipakala'birika, kira-kira ri attangngana alloa, nia'mo kucini' singara' battu rate ri langika, singaranganga cayana namatanna alloa. Accayami anjo singaraka angkulilingia' siagang sikamma anjo tau kuaganga a'rurung.

¹⁴Tu'guru' ngaseng maki' naung ri buttaya. Nampa nia'mo kulangngere' sa'ra a'bicara mae ri nakke lalang bicara Ibrani nakana, ‘Saulus, Saulus! Angngapa natuli nusessa kamma duduA'? Ikau tonji langkasiaki pa'risika punna tuli nuewana pimpinanNa a'jaria karaennu.’

¹⁵Jari kukanamo, ‘INaiki' antu Karaeng?’ Appialimi Batara Nakana, ‘INakkemi Isa, tuli nusessaya.

¹⁶Ambangungko siagang ammentengko nai'! Kupappicinikangi KalengKu lanri erokko Kupicinikiang angkana apa saba'na naKuangkakko a'jari palayangKu. Musti nupa'la'bangi mae ri tau maraenga apa nucinika anne alloa. Iamintu passala'na KalengKu, siagang passala'na apa laKupicinikiangko sallang ri allo labattua.

¹⁷LaKulappassangko battu ri limanna bansa Israelka siagang bansa-bansa maraenga. LaKusuroko a'lampa mae ri ke'nanga,

¹⁸untu' ansungkeangi matanna ke'nanga, sollanna akkulle assulu' ke'nanga battu ri sassanga nampa antama' ri singaraka; sollanna ta'lappasa' ke'nanga battu ri pangngajara' salana Billisika, nampa nikoasai ke'nanga ri Allata'ala. Na lanri tappa'na ke'nanga mae ri Nakke, naKupammopporammo dosa-dosana siagang la'jarimi ke'nanga umma'Na Allata'ala nipilea.’ ”

¹⁹“Jari lanri kammana, Karaeng Agripa, tuli kuusahaimi nikanaya amminawang turu' mae ri anjo apa le'baka nipicinikianga' siagang kutarimaya battu ri Allata'ala.

²⁰ Kupaumi silambusu'na mae ri taua angkanaya musti toba' ngasengi ke'nanga battu ri massing dosa-dosana. Musti napassareangi tallasa'na ke'nanga mae ri Allata'ala. Siagang musti napa'butti lalang ri katallassanna ke'nanga, angkanaya ma'nassa toba' tojeng-tojemmi battu ri dosa-dosana ke'nanga. Uru-uruna anjorengi ri Damsyik kupau anne passalaka. Le'baki anjo nampa ri Yerusalem, siagang ri sikontu Yudea, ri tangnga-tangngana bansa maraenga.

²¹Jari iaminjo saba'na nanajakkalaka' tu Yahudia ri Balla'Na Batara, siagang naero'mo ke'nanga ambunoa'.

²²Mingka sa'genna kamma-kamma anne tuli nijagaia' ri Allata'ala, sa'gengku akkulle ammenteng anrinni, a'jari sa'bi mae ri sikamma taua — baji' natau lompo kammayatompa tau ca'dia. Anne apa kupaua tena le'ba' sisalana siagang apa-apa le'baka nasero kana na'bi-na'bia siagang Musa;

²³ iamintu angkanaya musti sessai anjo Karaeng Mappasalama' le'baka Napa'janjiang Allata'ala, siagang Iami la'jari tau uru-uru attallasaka ammotere' battu ri kamateanga. Sollanna lanri kammana anjo, akkullemi Napabattu kasalamakkanga, baji' namae ri tu Yahudia, kammayatompa mae ri bansa-bansa maraenga.”

²⁴Lalang a'bicara kammana Paulus ampakasingaraki kalenna, ammarrammi Festus nakana, “Pongoro' mako antu Paulus! Napa'jari pongoro' mako anjo pangngassengannu jai dudua!”

²⁵Mingka appialimi Paulus nakana, “Tena nakupongoro', karaeng. Anjo bicara kupaua sangnging bicara annaba, siagang sangnging battu ri pikkirang baji'.

²⁶Kalenna Karaeng Agripa angngasseng bajiki sikamma anjo passalaka. Iaminjo saba'na nakubarani a'bicara silambusu'na ri dallekanna karaenga. Tappaka' angkanaya tena manna sirupa anjo passalaka tanaassengapa karaenga, nasaba' tena nanjoreng ri tampa' kacokkoanga kajariang sikamma anjo passalaka.

²⁷Tunipakala'birika Karaeng Agripa, maka tappakki' mae ri anjo apa-apa le'baka napau na'bi-na'bia? Pakkasiakku kukana tappakki' Karaeng!”

²⁸Nakanamo Agripa mae ri Paulus, “Nukana gampanga' lanupa'jari tu Karisteng silalonna?”

²⁹Appialimi Paulus nakana, “Ri wattu silalonna yareka lalang wattu salloa, appala' doanga' mae ri Allata'ala sollanna ikatte siagang sikamma tau hadereka appilangngeri anne alloa, akkulle ngasengki' ajari sangkamma inakke — pantaranganna anne rante assikkoka'!”

³⁰Kala'busanna ammentemmi Karaenga, Guburnurka, Bernike, siagang sikamma tau hadereka.

³¹Battui ke'nanga assulukang, massing nakanamo para ia ke'nanga, “Anjo taua tena sikali panggaukang sala nagaukang ampassiratangai nihukkung mate yareka nitarungku.”

³²Nakanamo Agripa ri Festus, “Anjo taua akkullemi nilappassang ka'de' tena nanapalaki niadeli parkarana ri pangadelanna Karaenga ri Roma.”