Read Makassar Version – KITTA' MATANGKASA LAMPA-LAMPANA 27 Bible Online

LAMPA-LAMPANA 27 - Makassar Version – KITTA' MATANGKASA bible

LAMPA-LAMPANA 27

¹Le'ba'mi nitappuki angkanaya musti a'lampa maki' mange ri Italia. Jari nipassareammi Paulus siagang siapa are tahanang maraenga mae ri Yulius, iamintu perwira tantara Roma nigallaraka “Pasukanna Karaenga”.

²Nai' maki' ri kappalaka ri Adramitium nampa a'lampa maki' assombala'. Anjo kappalaka eroki assombala' mange ri sikamma palabuhang niaka ri daera Asia. Nia' tongi Aristarkhus angngagangki' irate ri anjo kappalaka. Anne Aristarkhus tau battu ri Makedonia.

³Ammukona, battu maki' mange ri Sidon. Anjo Paulus nikatutui bajiki ri Yulius. Nisarei kasampatang Paulus mange angkunjungi agang-aganna sollanna akkulle nisare ri ke'nanga apa-apa naparalluanga Paulus.

⁴Battu anjoreng ri Sidon nipatulusu'mi assombala'. Mingka lanri niruppaiki' ri anging, anjoreng maki' ri birinna pulo Siprus annarrusu' assombala', lanri ta'linrungi sike'de' ri anging anjoreng.

⁵Le'baki anjo assombala' maki' ri tamparang sidallekanga siagang Kilikia na Pamfilia, sa'genta battu mange ri Mira, pa'rasangang Likia.

⁶Anggappami perwiraya kappala' battu ri Aleksandria, eroka mange ri Italia. Jari nipalette' maki' ri anjo perwiraya mange anjoreng ri kappalaka.

⁷Pirangallo are sallota sanna' lansanta assombala'. Sanna' susata assombala' nampa akkulle nirapi' sa'genna kota Knidus. Nampa lanri kodina ija anginga, takkullea maki' annarrusu' assombala' situru' oloang nitujua uru-uruna. Jari a'lampa timboro'na maki' Pulo Kreta assombala', allalo ri Tanjung Salmone, sollanta ta'linrung ri anginga anjoreng.

⁸Sanna'mi susata assombala' antulakkangi birinna anjo puloa; sa'genta anrapi' mange ri se'reang tampa' niareng Palabuhang Ga'ga, tenaya nabella battu ri kota Lasea.

⁹Anjo wattua allalomi Allo Lompo Passiamakkanna tu Yahudia. Jai sikalimi wattu tappela', sa'genna tabajikami nisa'ring wattua assombala'. Jari nipakainga'mi ke'nanga ri Paulus, angkana,

¹⁰“Sikamma sari'battangku, turu' ri panggappaku, lompo sikali bahayana punna annarrusu' ijaki assombala'. Langgappaki' karugiang lompo. Teai poro karugiang barang-barang siagang kappala', mingka manna nyawata akkulle todong tappela'.”

¹¹Mingka tappakangangi anjo perwiraya mae ri jurumudia siagang kapiteng kappalaka, na mae ri kananna Paulus.

¹²Tena memang nabaji' napammantangi kappala' anjo palabuhanga punna wattu dinging. Iaminjo saba'na najaiangang ana'-ana' kappalaka erokangang a'lampaya pole assombala' ambokoi anjo palabuhanga. Eroki nausahai ke'nanga anrapi' mange ri Feniks nampa ammantang anjoreng sa'genna allalo wattu dinginga. Feniks, iamintu palabuhang ri Pulo Kreta a'dalle' mangei ri warakkanna sike'de' ri tampa' labuna alloa.

¹³Anjo wattua battu timboroki anginga siagang lammai nisa'ring battuna. Jari nakana ana'-ana' kappalaka akkullemi ke'nanga assombala' pole. Jari assombala'mi ke'nanga antulakkangi birinna Pulo Kreta.

¹⁴Mingka tasalloai, battumi anging lompoa — iamintu niarenga anging Battu Timboroka — battu rate ri bontoa,

¹⁵antunrungi kappala'na ikambe. Tena sikalimo nikkulle assombala', anruppai anjo anginga. Jari sa'bara' mamaki', nanilappassang mamo ammanyu' kappalaka nierang ri anging.

¹⁶Ri wattunta allalo ri se'reang pulo ca'di, ri timboranna pulo niarenga Kauda, ta'linrung maki' sike'de' ri anginga. Anjorenta teaimi sipato' susata angngurusuki linta' sikocina kappalaka.

¹⁷Le'baki nipanai' sikocia ri kappalaka, nipakajarre' tommi kappalaka; nisikko' siagang nipakaluki otere'. Mallakki' nianyukang mange anjoreng ri pammantangang ambawaya, iamintu kassi'na Sirtis. Jari nipanaummi sombalaka nampa nilappassang kappalaka ampinawangi anginga.

¹⁸Pila' sanna'mi lompona anginga. Sa'genna ammukona nipela'mi barang-baranga naung ri tamparanga.

¹⁹Allo ammukona pole napela' tommi ana'-ana' kappalaka pakkakasa'-pakkakasa'na kappalaka naung ri tamparanga.

²⁰Pirangallo aremi sallona tena nakiaccini' allo siagang bintoeng. Kammayatompa pila' a'jallo' tommi anginga. Kala'busanna, tappu' panrannuang maki' lasalama'.

²¹Siapa aremi sallona tena ngaseng nangnganre taua. Jari mangemi Paulus ammenteng ri tangnga-tangngana ke'nanga nampa nakana, “Sikamma sari'battangku! Ka'de' nupilangngeri kanangku natanibokoia Kreta, tenaja nalanikasia' ngaseng anne kapanrakanga siagang karugianga.

²²Mingka kamma-kamma anne kupala' dudui pole mae ri kau ngaseng, sollanna nupakalompo ngaseng pa'mai'nu. Tenapa manna sitau battu ri katte lamate. Iaji anne kappalaka bawang latappela'.

²³Nasaba' ri bangngia niaki malaeka'Na Allata'ala battu mae ri nakke, iamintu Allata'ala kusombaya, Allata'ala makoasaya mae ri kalengku.

²⁴Nakana anjo malaekaka, ‘Teako mallakki Paulus! Nasaba' lamangeko andallekang ri Karaenga ri Roma. Lanri kabajikanNa Allata'ala mae ri kau, nasikontu anne tau nuaganga assombala', lanipasalama' ngasengi passabakkang ikau.’

²⁵Lanri kammana minjo, sari'battangku ngaseng, parallui nupakalompo pa'mai'nu! Nasaba' tappaka' ri Allata'ala angkanaya laNapa'rupa ngasengi anjo kana le'baka Napabattu mae ri nakke.

²⁶Mingka lanianyukangki' sallang mange ri biring ri se'reang pulo.”

²⁷Ri bangngi makasampulona angngappa', ammawang-mawang mami kappalaka ri Tamparang Adria. Kira-kira ri wattu lantanna bangngia nakanamo pakkasia'na ana'-ana' kappalaka angkana a'reppese'mi kappalaka mange ri bontoa.

²⁸Jari naukkuru'mi siagang otere' nagentungi batu anjo tamparanga. Nania' tojeng mamo kira-kira patampulo metere' lantanna anjo tamparanga. Tasalloai naukkuru'mi pole ke'nanga tampa' nirapika, nania' mamo tallumpulo metere' lantanna.

²⁹Malla'mi ke'nanga gassingka tassambangi kappalaka mae ri batu karanga. Jari appanaummi ke'nanga appa' jangkara' ri bokona kappalaka. Na'minasamo ke'nanga sollanna linta'mo singara'.

³⁰Ero'mi a'lampa cokko-cokko anjo ana'-ana' kappalaka ambokoi kappalaka. Napanaummi ke'nanga sikocia, assara-sarai ero' appanaung jangkara' battu ri ulunna kappalaka.

³¹Mingka nakanamo Paulus ri anjo perwiraya siagang sikamma anjo tantara niaka ri kappalaka, angkana, “Punna tammantanga anjo ana'-ana' kappalaka anrinni ri kappalaka, tena ngaseng nulasalama' battu ri anne bahayaya.”

³²Jari mangemi tantaraya angkereki otere'na anjo sikocia, sa'genna ammanyu' anjo sikocia.

³³Ri wattunna a'birimmo ammumbamo alloa, nasuromi Paulus angnganre ngaseng taua. Nakana Paulus, “Sampulomi anggappa' allonna tuli attayang jako bawang lalang malla'nu, nanutangnganrea apa-apa.

³⁴Kupakaingakko sollannu angnganre sike'de'. Anne untu' kabajikannu ngaseng, sollannu anggappa ammotere' kagassingang. Nasaba' lasalama' ngasengko nutangngapa-apa.”

³⁵Le'baki akkana kamma Paulus, angngallemi roti nampa appala' sukkuru' mae ri Batara ri dallekanna ngaseng ke'nanga. Nampa napa'bage-bageang anjo rotia, nanakanre anjo rotia.

³⁶A'jari lompo ngasemmi ammotere' sumanga'na ke'nanga, siagang massing angnganre tommi ke'nanga.

³⁷Nia' ruambilangngang tujupulo angngannang jaina anjo taua ri kappalaka.

³⁸Le'baki angnganre ngaseng ke'nanga, napela'mi gandung niaka naerang anjo kappalaka naung ri tamparanga, sollanna a'jari ringang anjo kappalaka.

³⁹Ri wattunna singara'mo, accini'mi bonto ana'-ana' kappalaka, mingka tanaassengai ke'nanga angkana apa arenna anjo bontoa. Nia' nacini' ke'nanga bonto ca'di siagang birinna. Jari ero'mi ke'nanga angngerangi kappalaka mange anjoreng punna akkulleja.

⁴⁰Jari nipolommi otere'na ngaseng jangkaraka, nampa nilappassang tallang naung ri tamparanga. Nampa nalappassang ngaseng todong ke'nanga passikko' calagana anjo kappalaka. Le'baki anjo napanai'mi ke'nanga sombalaka ri ulunna kappalaka sollanna nierang ri anging kappalaka mange anjoreng ri birinna bontoa.

⁴¹Mingka ta'lappoi kappalaka mae ri kassi' rawanganna anjo tamparanga. Tassangkala'mi ulunna kappalaka sa'genna takkulleami a'gio'. Na ia bokona kappalaka ancuru'mi nitunrung ri bombang lompo.

⁴²Ero'mi anjo tantaraya ri kappalaka ambuno ngasengi sikamma tunitahanga, lanri nakamallakkangi angkana gassingka nia' tunitahang a'lange mange ri bontoa nampa lari.

⁴³Mingka nipisangkai ke'nanga ri perwiraya, lanri ero'na napasalama' Paulus. Nasuro ngasemmi tau akkullea a'lange a'lumpa' rolong naung nampa a'lange mange ri birinna bontoa;

⁴⁴ia maraenganga amminawang bokoi anna'gala' ri papang-papanga, yareka apa-apa maraenganna anjo kappala' ancurukamo. Kammaminjo bateta sa'genta akkulle salama' ngaseng battu mange ri bontoa.