Read Makassar Version – KITTA' MATANGKASA LAMPA-LAMPANA 28 Bible Online

LAMPA-LAMPANA 28 - Makassar Version – KITTA' MATANGKASA bible

LAMPA-LAMPANA 28

¹Ri wattunta salama' ngasemmo battu nai' ri bontoa, nampami niasseng angkana Malta arenna anjo puloa.

²Sanna' ngaseng baji'na tuma'buttana anjo puloa mae ri kambe. Natarima maki' baji'-baji' siagang naparinrang maki' pepe' nasaba' appakkaramulami turung bosia kammayatompa sanna' tommo dinginna pakkasiaka.

³Appasse'remi Paulus kayu-kayu, nampa napadongko' anjo kayua rate ri pepeka. Ri wattunna napadongko' anjo kayua ri pepeka, ti'ring nia'mo sikayu ulara' assulu' napakamma bambanna anjo pepeka. Nanitotto'mo limanna ri anjo ularaka.

⁴Nacini'na tuma'buttaya anjoreng ri anjo puloa ta'gentung anjo ularaka ri limanna Paulus, massing nakanamo ke'nanga, “Ma'nassa pabuno tau anne taua. Nasaba' manna pole ta'lappasa'mi battu ri bahaya ri tamparanga, mingka tena nikellai attallasa' ri Dewi Kaadelanga.”

⁵Mingka nasoeammi Paulus anjo ularaka antama' ri pepeka siagang tena sikali manna sike'de' pa'risi'na nakasia'.

⁶Napikkiriki tuma'buttaya anjoreng angkanaya tasalloami nakkambang limanna Paulus, yareka anra'ba naung nampa mate. Mingka sallo-sallomi ke'nanga attayang natenaja apa-apa kajariang ri kalenna Paulus. Jari appakkaramulami amminra pikkiranna ke'nanga, nampa nakana rewata kutadeng anjo Paulus.

⁷Tena nabella anjoreng ri tampaka, nia' buttana tuniarenga Publius, iamintu kapala sukuna taua ri anjo puloa. Natarima baji' maki' Publius, napare' kamma toananna tallungallo sallona.

⁸Anjo wattua sitabangi nataba garring rammusu' manggena anjo Publius. Jari a'lampami Paulus antoaki anjo tau garringa. Napadongko'mi limanna irateanganna anjo tau garringa nampa appala' doang, sa'genna a'jari baji'mo silalonna anjo taua.

⁹Lanri nia'na anjo kajarianga, nierang ngasemmi sikamma tau garringa ri anjo puloa mae ri Paulus. Naniballei ngasemmo ke'nanga sa'genna a'jari baji'.

¹⁰Jaimi hadia nasareangki' ke'nanga. Na ri wattunta ero'mo a'lampa assombala' battu ngasemmi ke'nanga mange ri kappalaka ampangngerangangki' sikamma apa-apa niparalluia sallang ri tangngana dolanganga.

¹¹Tallum bulangki' ammantang anjoreng, nampa a'lampa maki' ambokoi anjo puloa. Nai' maki' ri se'reang kappala' battu ri Aleksandria, niaka ammantang anjoreng ri palabuhanna anjo puloa lalanna wattu dinginga. Anjo kappalaka ammakei gambara' “Rewata Kambara'na Kastor siagang Poluks.”

¹²Ammantang maki' tallungallo ri palabuhanna kota Sirakusa.

¹³Battu anjoreng maki' assombala' pole antulakkangi biring tamparanga sa'genta battu mange ri kota Regium. Ammukona, appakkaramulami battu anging battu timboroka, sa'genna lalang ruangallona anrapi' maki' mange ri kota Putioli.

¹⁴Anjoreng ri kota Putioli assigappa maki' siagang siapa are tu tappa' ri Isa. Nakio' maki' ke'nanga mange ri balla'na. Nakiammantammo siagang ke'nanga sidaminggu sallona. Le'baki anjo a'lampa maki' mange ri kota Roma.

¹⁵Anrapi'mi kabaratta mange ri sikamma sari'battang tappaka ri Isa ri Roma. Jari battumi ke'nanga sa'genna ri Pasara' Apius siagang Pasanggarahang Tallu, ero' anruppaiki'. Ri wattunna assibuntulu'mo Paulus siagang ke'nanga, appala' sukkuru'mi Paulus mae ri Allata'ala. A'jari sannammi pa'mai'na.

¹⁶Ri wattunna battu mange ri Roma nipa'biammi Paulus ammantang akkale-kale siagang nijagai ri sitau tantara.

¹⁷Narapiki tallungallo nia' ri Roma, nasuro kio'mi Paulus pamimping-pamimpinna tu Yahudia anjoreng. A'rappunganna ngasemmo ke'nanga, nakanamo Paulus mae ri ke'nanga, “Sikamma sari'battangku! Tena apa-apa kasalangku mae ri bansata, yareka mae ri ada'-ada' nitarimaya battu ri boe-boeta. Mingka manna natena salaku nijakkala' tonja' ri Yerusalem, nampa nipassareanga' mae ri tu Romaya.

¹⁸Le'baki niparessa parkaraku, ero'mi ke'nanga allappassanga', nasaba' ma'nassa tena manna sirupa gau' sala kugaukang ampassiratanga' nihukkung mate.

¹⁹ Mingka lanri annuntu'na tu Yahudia, tarpassa kupala'mi sollanna ri pangadelanna Karaeng Roma niadeli anne parkaraku. Mingka nakupala' kammaya, teai lanri erokku antuntuki bansaku.

²⁰Jari iaminjo saba'na nakuero' angngagang ngasengko assibuntulu' siagang angngagang ngasengko a'bicara. Nasaba' iaji nanisikkoka' kapassabakkang Karaeng Mappasalama' salloamo naminasai bansa Israel.”

²¹Nakanamo ke'nanga ri Paulus, “Tena le'bakapaki' annarima sura' manna silawara' battu ri Yudea ri passala'na batangkalennu. Siagang tenapa manna sitau battu mae anrinni angngerangi kabara'nu, yareka ambicara kodiko.

²²Mingka ero' tonjaki' anne allangngereki anjo apa nupatappaka, nasaba' nalangngere'mi ikambe antekamma batena nicalla anjo ajarang nupatappaka.”

²³Jari appattantumi ke'nanga siagang Paulus se're allo untu' a'rappungang pole. Anjo alloa jai tau battu mange ri pammantanganna Paulus. Battu ri bari'basa' sa'genna karueng napakasingara'mi siagang napabattumi Paulus anjo biritta battua ri Allata'ala siagang Pamarentahanna. Napakemi Paulus apa-apa niaka tattulisi' lalang ri Kitta'na Musa siagang Kitta'na Na'bi-na'bia, ampakasingariangi ke'nanga sollanna a'jari tappa' ke'nanga mae ri Isa.

²⁴Nia'mo ke'nanga a'jari tappa' ri anjo apa napabattua Paulus, mingka nia' tommo tena natappa'.

²⁵Ri wattunna a'lampa ngasemmo ke'nanga ambokoi anjo tampaka massing sisalami panggappana ke'nanga. Nasaba' nakana Paulus mae ri ke'nanga, “Memang annaba sikali apa le'baka Napau RohNa Allata'ala lalang ri Na'bi Yesaya mae ri boe-boenu!

²⁶ Nakana RohNa Allata'ala, ‘A'lampako mange ampaui ri anne bansaya: Tuli lamallangngere'nu ngaseng, mingka tanupahangai; tuli lamaccini'nu ngaseng, mingka tanuassengai apa kajarianga.

²⁷Nasaba' a'jari pokkolo'mi pikkiranna anne bansaya, nijempammi tolinna ke'nanga, siagang nitongko'mi matanna ke'nanga. Nasaba' punna tena nakamma, mattantu lamaccini'ji matanna ke'nanga, lamallangngere'ji tolinna ke'nanga, lammahanji atinna ke'nanga, siagang lammotere'mi ke'nanga mae ri Nakke, nampa Kupa'jari baji' ke'nanga ammotere',’ kammaminjo kananNa Allata'ala.”

²⁸Kala'busanna, nakanamo Paulus, “Musti nuasseng ngasengi sari'battang, angkanaya nipabattumi anne kabara' kasalamakkang battua ri Allata'ala mae ri bansa-bansa maraenga. Nalanapinawammo ke'nanga anne kabaraka!” [

²⁹Le'baki akkana kamma Paulus, a'lampa ngasemmi anjo tu Yahudia, na'gea'-gea' para ia.]

³⁰Ruan taungi sallona ammantang Paulus ri Roma, ri balla' nasewaya kalenna. Sannang sikali nyawana antarimai sikamma tau niaka battu angkunjungi.

³¹Napabattumi siagang barani mae ri ke'nanga antekamma bateNa ammarenta Allata'ala, kammayatompa ri passala'na Isa Almasi. Nagaukammi Paulus sikammaya anjo siagang laloasa, tena tau anghalang-halangi.