Read Makassar Version – KITTA' MATANGKASA LAMPA-LAMPANA 3 Bible Online

LAMPA-LAMPANA 3 - Makassar Version – KITTA' MATANGKASA bible

LAMPA-LAMPANA 3

¹Ri se'reang allo a'lampai Petrus siagang Yohanes mange ri Balla'Na Batara. Anjo wattua tette' tallu ri karuenga, iamintu wattu passambayanganga.

²Anjoreng ri pakke'bu' lompoa, niarenga “Pakke'bu' Ga'gaya”, nia' sitau bura'ne peso'. Peso' memammi baku' nilassukanna. Allo-allona nierang anjo taua mange anjoreng untu' appala'-pala' ri tau eroka antama' ri Balla'Na Batara.

³Ri wattunna nacini' anjo tau pesoka angkana niaki Petrus siagang Yohanes ero' antama' ri Balla'Na Batara, appala'mi apa-apa ri ke'nanga.

⁴Najanjammi ke'nanga anjo tau pesoka, nampa nakana Petrus, “Cinikia'!”

⁵Nicinikimi ke'nanga ri anjo tau pesoka, na'minasa anjo tau pesoka lanisare apa-apa ri ke'nanga.

⁶Mingka nakanamo Petrus ri anjo tau pesoka, “Tena sikali doekku. Mingka apa niaka ri nakke, iaminjo lakusareangko: Lanri koasaNa Isa Almasi, battua ri Nazaret, kukana ri kau a'jappa mako!”

⁷Nampa nata'gala' Petrus lima kananna anjo tau pesoka, na nabantu ammenteng. Ajari kassa' memammi silalonna bangkenna anjo tau pesoka.

⁸A'lumpa'mi nai' nammenteng, siagang a'jappa anrai'-kalau'. Nampa antama' ri Balla'Na Batara siagang Petrus na Yohanes, a'lumpa'-lumpaka tojeng na mammuji-muji ri Allata'ala.

⁹Nicini'-cinikimi ri taua a'jappa' siagang ammuji-muji ri Allata'ala.

¹⁰Na naassennamo tau jaia angkanaya iaminjo papala'-pala' biasaya ammempo ri “Pakke'bu' Ga'gaya” ri Balla'Na Batara. Lannasa' sikalimi siagang takkajanna'mi ke'nanga anciniki anjo apa kajarianga ri kalenna anjo taua.

¹¹Tuli amminawammi anjo taua ri Petrus siagang Yohanes. Na ri wattunna battu ke'nanga ri tampa' niarenga “Tampa' Salomo”, battu ngasemmi taua allipungi ke'nanga napakamma lannasa'.

¹²Ri wattunna nacini' Petrus anjo tau jaia, nakanamo ri ke'nanga, “E, tu Israel, angngapa nulannasa' ngaseng anciniki? Angngapa naikambe tulusu' nujanjang? Barang nukana lanri kakoasanna ikambe yareka lanri mannurukinna ikambe ri Allata'ala nakkulle a'jappa' anne taua?

¹³ Allata'ala nasombaya Abraham, Ishak, Yakub, Allata'alana boeta, Iaminjo Allata'ala ampakalompoai Ana'Na, iamintu Isa. Iaminjo Isa le'baka nupassareang ri pamarentaya, siagang numusua ri dallekanna Pilatus, ri wattunna ero' nilappassang ri Pilatus.

¹⁴ Ia tau matangkasa' siagang tau baji', mingka nukabirisi siagang nupassai Pilatus allappassangi tu pabunoa untu' ikau sollanna nihukkung anjo Isa.

¹⁵Nubunoi anjo Isa, na sikontutojenna Iami kabattuanna katallassanga untu' sikontu rupataua. Mingka nipattallasa' poleammi ri Allata'ala battu ri kamateanga. Kalennami ikambe anciniki anjo apa kajarianga.

¹⁶Nucini'mi siagang nusa'bimi apa kajarianga ri kalenna anne tau pesoka. A'jari baji'mi siagang gassimmi ammotere' lanri tappaki mae ri Isa siagang kakoasanNa. Lanri tappa'na mae Isa, a'jari baji'mi ammotere' anne taua ri dallekannu ngaseng.

¹⁷Sikamma sari'battangku ngaseng! Kamma-kamma anne kuassemmi angkanaya anjo apa nugaukanga siagang pamimping-pamimpinnu mae ri Isa, apa tena ngaseng nanupahangi nanugaukangi.

¹⁸Na lanri kammana tomminjo, na'rupamo apa le'baka Napabattu riolo Allata'ala lalang ri na'bi-na'biNa, angkanaya musti lanisessai anjo Karaeng Mappasalama' nipa'janjianga.

¹⁹Lanri kammana minjo sari'battangku ngaseng, nuparallumo massing toba' battu ri dosa-dosanu, siagang ammotere' mako ri Allata'ala sollanna naNapammopporang dosa-dosanu.

²⁰Labattui Batara mae ri kau nalanukasia' kasannangang pa'maika. Siagang lanisuroi Isa ri Batara battu mae ri kau, nasaba' Iami le'ba' Napattantu Allata'ala a'jari Karaeng Mappasalama'nu.

²¹Musti ammantangi ri suruga sa'genna le'ba' ngaseng Napa'jari beru linoa Allata'ala, situru' apa le'baka Napattantu Allata'ala lalang ri na'bi-na'biNa ri jammang riolo.

²² Le'baki Musa angkana, ‘Lania' sitau na'bi Nasuro Allata'ala battu mae ri kau, sangkammaya todong inakke Nasuroa' battu mae ri kau. Anjo na'bia tu battu tonji ri bansanu. Musti nupilangngeri ngasengi sikontu apa napaua anjo na'bia mae ri kau.

²³ Inai-nai taeroka ampilangngeri apa-apa napaua anjo na'bia, iami lanibuang assulu' battu ri passe'reanna umma'Na Allata'ala nampa nisessa.’

²⁴Sikamma na'bi-na'bi le'baka ampabattui kabara' battua ri Allata'ala, iamintu appakkaramula battu ri Na'bi Samuel sa'genna na'bi-na'bi maraengannaya ribokoanganna, le'ba' ngasemmi nakabarrang apa-apa lakajarianga ri anne jammanga.

²⁵ Sikontu anjo apa-apa Napa'janjianga Allata'ala lalang ri na'bi-na'biNa, untu' ikau ngaseng. Lalang ri anjo parjanjiang Napareka Allata'ala mae ri boe-boenu, kammai anne kananNa Allata'ala mae ri Abraham, ‘Battu lalangi ri sossorannu nalaKubarakkaki sikontu bansaya ri anne linoa.’ Jari anjo parjanjianga untu' ikau ngaseng todong.

²⁶Iaminjo saba'na naNapattantumo Ana'Na Nasuro rolong battu mae ri kau, sollanna naNabarakkakiko. Ia bateNa ambarakkakiko, iamintu Napa'jari tobakko battu ri kaja'dallanga lalang ri katallassannu.”