Read Makassar Version – KITTA' MATANGKASA LAMPA-LAMPANA 6 Bible Online

LAMPA-LAMPANA 6 - Makassar Version – KITTA' MATANGKASA bible

LAMPA-LAMPANA 6

¹Pila' sallo, pila' jaimi tau tappa' ri Isa. Anjo wattua a'jari tenamo nasannang nyawana tau tappa' bansa Yahudi a'bicara Yunania mae ri tau tappa' bansa Yahudi totoka. Nakanamo a'bicara Yunania, “Sikamma bai'-baine janda niaka ri kambe tanibageiyai ongkoso' kaparalluang allo-allo nipa'bage-bageanga mae ri taua.”

²Jari anjo sampuloa anrua tunisuro napa'rappungammi sikontu tau tappaka, nampa nakana ri ke'nanga, “Tabajikai punna lammari ikambe ampabattui kananNa Allata'ala, lanri langngurusu'na passala' apa-apa lanikanrea.

³Jari, bajiki punna nupileimo battu ri kau ngaseng tuju tau baji' ampea siagang nikoasaia ri RohNa Allata'ala, akkullea nisare jama-jamang, langngatoroki anne passala' apa-apa lanikanrea;

⁴nasaba' eroka lanajama ikambe iamintu appala' doanga siagang ampabattui kana-kananNa Allata'ala.”

⁵Assamaturu' ngasemmi ke'nanga ri anjo apa napaua anjo sikamma tunisuroNa Allata'ala. Napileimi ke'nanga tuniarenga Stefanus, sannaka tappa'na ri Isa, siagang nikoasaia ri RohNa Allata'ala. Maraengannaya nipile tommi: Filipus, Prokhorus, Nikanor, Timon, Parmenas, siagang Nikolaus battua ri Antiokhia. Anne Nikolaus teai tu Yahudi, mingka antama'mi agama Yahudi.

⁶Nierammi anne tujua tau mae ri sikamma tunisuroNa Allata'ala, nampa nipappala' doangang siagang nipappalakkang barakka' ri Batara.

⁷Kammaminjo, napila' a'la'bammo kabara' battua ri Allata'ala, siagang pila' katambammi jaina tau tappaka ri Isa anjoreng ri Yerusalem. Na jai tommo imang-imang a'jari tappa' ri Isa.

⁸Anjo Stefanus sanna' nibarakkakina ri Allata'ala; sa'genna jai sikalimi gau'-gau' appakalannasa' nagaukang ri tangnga-tangngana tau jaia.

⁹Mingka nia'mo siapa are tau angngewai; iamintu anggotana ngaseng balla' sambayang niarenga Balla' Sambayanna Tu Bebasaka. Anggota-anggotana anjo balla' sambayanga, iamintu tu Yahudi battua ri Kirene siagang Aleksandria. Sipammemtengammi ke'nanga siagang tu Yahudi battua ri Kilikia siagang Asia, anggea'-geakki Stefanus.

¹⁰Mingka tanakulleai ke'nanga ampitompoki anjo kana napaua Stefanus, nasaba' le'ba'mi nisare Stefanus kacara'dekang ri RohNa Allata'ala, untu' a'bicara.

¹¹Lanri kammana, nia'mo siapa are tau nasare doe' ke'nanga, nampa nasuro appau angkana, “Le'baki anjo taua a'bicara anghina-hinai Musa siagang Allata'ala!”

¹²Kammaminjo batena ke'nanga angkompa-kompa salai sa'genna nassu tau jaia, pamimping-pamimpinna tu Yahudia, kammayatompa guru-guru agamaya. Mangemi ke'nanga anjakkalaki Stefanus, nampa naerang mange andallekang ri pangadelang agamaya.

¹³Siagang naerang tommi ke'nanga battu andallekang sa'bi-sa'bi a'balle-ballea, ero' ambattalli Stefanus. Nakanamo anjo sa'bi-sa'bia, “Anne taua tuli nahinai Balla'Na Batara matangkasaka, siagang nahinai sikamma parentaNa Allata'ala napabattua Musa.

¹⁴Le'baki nalangngere' ikambe angkana anne taua, angkanaya anjo Isa tu battua ri Nazaret, laNarumbangi anne Balla'Na Batara, nampa Napinra ngaseng pangngadakkang le'baka napassareang Musa mae ri katte!”

¹⁵Nicinikimi Stefanus ri sikontu tau niaka hadere' lalang ri anjo sidang Pangadelang Agamaya. Na anjo wattua, attanja' kammami malaeka' nicini' rupanna Stefanus.