Read Makassar Version – KITTA' MATANGKASA LAMPA-LAMPANA 7 Bible Online

LAMPA-LAMPANA 7 - Makassar Version – KITTA' MATANGKASA bible

LAMPA-LAMPANA 7

¹Akkuta'nammi imang lompoa ri Stefanus, nakana, “Maka kamma ngaseng tojengi anjo napaua taua?”

² Appialimi Stefanus nakana, “Sikamma bapa'-bapaka siagang sari'battanga! Pilangngeri sai anne kanangku! Ri tenanapa na'lette' boeta Abraham battu ri pammantanganna ri Mesopotamia mange ri Haran, battui Allata'ala mala'birika mae ri ia, angkana,

³‘Bokoi anne pa'rasangannu siagang bija-bijannu. A'lampako mange ri pa'rasangang laKujo'jokangako sallang.’

⁴ Jari a'lette'mi Abraham battu ri pa'rasangang Kasdim mange ri Haran. Ri wattunna matemo manggena Abraham, nipalette'mi Abraham ri Allata'ala mae anrinni, ri pa'rasangang nupammantangia ngaseng kamma-kamma anne.

⁵ Anjo wattua, manna sike'de' tania' anne pa'rasanganga Napassareanga Allata'ala mae ri Abraham a'jari pa'rasanganna; manna sipala' bangkeng tania' nipassareang mae ri ia. Mingka a'janji Allata'ala angkanaya laNapassareangi mae ri Abraham siagang sossoranna anne pa'rasanganga, a'jari pa'rasanganna. Anjo wattua tena ana'na Abraham.

⁶ Mingka iaminne kananNa Allata'ala ri ia, ‘Lammantangi sossorannu a'jari tu battu-battu ri pa'rasanganna taua. Lanipa'jari atai ke'nanga ri patanna anjo pa'rasanganga, siagang lanigau' pallaki ke'nanga patambilangngang taung sallona.

⁷ Mingka laKuhukkungi anjo bansa ampa'jari atayai ke'nanga, nampa assulu' ke'nanga battu anjoreng ri pa'rasanganga. Nampa lanynyombai ke'nanga mae ri Nakke anrinni ri tampaka.’

⁸ Le'baki akkana kamma Allata'ala, Napa'jari assami anjo janjinNa lalang pangngadakkang sunnaka. Jari ri wattunna lassu' ana'na Abraham, iamintu Ishak, nasunna'mi anjo ana'na ri wattunna sagantuju allomo umuru'na. Nampa ribokoanganna sallang nasunna' tommi ana'na Ishak, iamintu Yakub. Nakamma tomminjo Yakub, nasunna' tongi anjo ana'na sampuloa anrua, a'jaria boe-boena bansa Yahudia.

⁹ Na anjo boe-boeta assereati mae ri Yusuf, sa'genna nabalukang anjo Yusuf a'jari ata ri Mesir. Mingka nirurungangi Yusuf ri Allata'ala,

¹⁰ nanitulung battu ri sikontu kasusaanna. Nisarei ri Allata'ala kabajikang pa'mai' siagang kacara'dekang ri wattunna andallekang ri Firaun karaenga ri Mesir. Sa'genna niangka' a'jari Tumalompo ri pa'rasangang Mesir, siagang tukoasa ri Balla' Lompona Karaeng Firaun.

¹¹ Nampa nia' se're wattu nanaalle kacipurang lompo tuma'buttaya ri sikontu pa'rasangang Mesir siagang pa'rasangang Kanaan, sa'genna sanna' ngaseng pa'risi'na katallassanna taua. Takkulleami anggappa apa-apa lanakanre boe-boeta.

¹²Jari ri wattunna nalangngere' Yakub angkana nia' gandung ri Mesir nasuromi ana'-ana'na, iamintu boe-boeta a'lampa mange anjoreng, maka sikalina.

¹³ Ri wattunna a'lampa pole ke'nanga maka pinruanna, napappiassengammi kalenna Yusuf mae ri anjo sari'battanna ngaseng. Nampami anjo wattua naasseng karaeng Mesir bija-bijanna Yusuf.

¹⁴ Nampa appasang Yusuf mae ri manggena, iamintu Yakub, sollanna ero' a'lette' siagang sikontu bija-bijanna mae ri Mesir — yangasenna nia' tujupulo allima tau jaina.

¹⁵ A'lette'mi Yakub mae ri Mesir. Nanjoremmo mate siagang boe-boeta.

¹⁶ Nampa ri bokoang allo nipalette'mi jera'na ammotere' mange ri Sikhem, iamintu jera' le'baka naballi riolo Abraham battu ri bansa Hemor ri Sikhem.

¹⁷ Ri wattunna la'birimmo narapi' wattunna laNarupai janjinNa Allata'ala mae ri Abraham, pila' katambammi jaina bansata ri pa'rasangang Mesir.

¹⁸Kale'bakkanna nia'mo se're karaeng maraeng ammarenta ri Mesir, tenaya naassengi anjo Yusuf.

¹⁹ Anjo karaenga napare' karek-karenammi bansata, siagang sanna'mi nakapallakkina boe-boeta. Napassami boe-boeta ampelaki ana'-ana' lolona punna lassu' sollanna nibawang-bawangngang na mate anjo ana' loloa.

²⁰ Iaminjo wattua nanilassukangi Musa; sanna' ga'gana ri wattunna ana' lolo. Tallum bulangi sallona niparakai cokko-cokko ri balla'na tau toana;

²¹ ri wattunna nipela' naung ri je'neka, nirappummi ri ana' tulolona Firaun, nampa naparakai sangkamma ana' kalenna.

²²Sikamma pappilajaranna bansa Mesirka nipangngajarrang tommi mae ri ia. Na'jarimo tau sannaka lompona koasana, baji' lalang kana-kananna kammayatompa lalang panggaukanna.

²³ Ri wattunna patampulo taummo umuru'na Musa, nakku'mi lalang atinna, ero' mange anciniki antekamma katallassanna bansana, iamintu bansa Israel.

²⁴Na nia'mo sitau bansana narapikang nisessa ri tu Mesir; naallemi anjo tu nisessaya, nampa nabuno anjo tu Mesirka.

²⁵Nakapangi Musa angkanaya lanapahangi bansana angkanaya lanipakei kalenna ri Allata'ala untu' allappassangi anjo bansana. Mingka tanapahangai ke'nanga.

²⁶Ammukona nia'mo pole narapikang rua tu Israel assiba'ji. Naallemi nasa'lakki nampa napa'dame ke'nanga. Nakana ri ke'nanga, ‘Ikau antu tau assari'battangko. Apa saba'na nuero' assiba'ji?’

²⁷Mingka nisorongammi Musa mae ri biring, ri anjo tau amba'jiai aganna, nampa nakana, ‘Inai angngangkakko a'jari pamimping siagang a'jari haking mae ri kambe?

²⁸Erottongko ambunoa' sangkamma anjo tu Mesir nubunoa subangngi?’

²⁹ Nalangngere'na Musa kananna anjo taua, larimi Musa battu ri Mesir, nampa mange ri pa'rasangang Midian. Anjoremmi anggappa rua ana'.

³⁰ Patampulo taung ribokoanganna, nia'mo sitau malaeka' battu mae ri Musa, ri wattunna nia' ri parang kassika, ri ampi'na Bulu' Sinai. Battui anjo malaekaka lalang ri pepe' rompo' a'rinraya.

³¹Lannasa'mi Musa anciniki anjo apa kajarianga. A'reppese'mi mange anjoreng ero' angngassengi anjo apa kajarianga. Nampa nia'mo nalangngere' sa'ranNa Batara angkana,

³²‘INakke minne Allata'alana boe-boenu; iNakkemi Allata'alana Abraham, Ishak, siagang Yakub.’ Annekkere'mi Musa napakamma malla'. Tenamo nabarani pole accini' mae anjoreng ri rompoka.

³³Nakanamo pole Batara, ‘Pasuluki pa'la'pa' bangkennu, nasaba' antu butta nupammantangia ammenteng, butta matangkasa'.

³⁴Kucini'mi siagang Kuparhatikammi antekamma pa'risi'na katallassanna ummakKu ri Mesir. Kulangngere'mi kunrarenna ke'nanga, naKunaummo ero' allappassangi ke'nanga. Kamma-kamma anne, mae mako! LaKusuroko ammotere' mange ri Mesir.’

³⁵ Iaminne Musa, tenaya niakui ri bansa Israel, siagang nisorongbokoa angkana, ‘Inai le'ba' angngangkakko a'jari pamimping siagang a'jari haking mae ri kambe?’ Mingka sitojenna, iami nisuro ri Allata'ala a'jari pamimping siagang appasalamaka, lanri bantuanna anjo malaeka' battua mae ri ia lalang ri anjo rompo' a'rinraya.

³⁶ Iaminjo Musa ampimpingi bansa Israel assulu' battu ri Mesir; iami anggaukangi anjo gau'-gau' appakalannasaka ri Mesir, ri Tamparang Ejaya, kammayatompa ri parang lompoa patampulo taung sallona.

³⁷ Ia tomminjo Musa angkanaya ri bansa Israel, ‘LaNasareko Allata'ala sitau na'bi nipilea battu ri tangnga-tangnganu, sangkammaya bateku Napilei.’

³⁸ Musa tommi niaka ri tangnga-tangngana bansa Israel ri parang kassika, a'jaria tetena malaeka' naaganga a'bicara ri Bulu' Sinai siagang boe-boeta. Iami antarimayai battu ri Allata'ala kabara' katallassanga eroka nipabattu mae ri katte.

³⁹Mingka manna nakamma, taerokai boe-boeta anturuki kananna. Nisorongbokoi ri ke'nanga, siagang erokangangi ke'nanga ammotereka mange ri butta Mesir.

⁴⁰ Nakana ke'nanga mae ri Harun, ‘Papparekang maki' rewata maraenganga, sollanna napimpingki' anjo rewataya. Nasaba' taniassengami apa kajarianga ri anjo Musa, angngerangaki' assulu' battu ri Mesir!’

⁴¹ Anjo wattua appare'mi ke'nanga se're patung ana' sapi. Nampa angngerang ke'nanga koro'bang mae ri anjo patunga; siagang assua'-suara'mi ke'nanga untu' ampakalompoi anjo apa napare' kalennaya ke'nanga.

⁴² Jari nibokoimi ke'nanga ri Allata'ala siagang nibalang parekammi ke'nanga anynyomba mae ri sikamma bintoeng-bintoeng niaka ri langika. Sicoco'mi anjo siagang apa niaka tattulisi' lalang ri kitta'na na'bi-na'bia. Kammaminne tattulisika, ‘E ikau tu Israelka! Teai untu' iNakke nanusamballe siagang nukoro'bangkang olo'-oloka ri wattunna patampulo taung ri parang lompoa.

⁴³Mingka balla'-balla'na rewata Molokh nuerang mange-mange siagang patunna bintoeng rewatanu, iamintu Refan; iaminjo patung nupareka, ero' nusomba. Iaminjo saba'na nalaKupelakko sa'gennu bella mange ri ba'leanna pa'rasangang Babel.’

⁴⁴ Balla' pammantanganNa Allata'ala ri wattunna battu mae ri rupataua niaki ri boe-boeta ri parang lompoa. Anjo pa'balla'-ballakanga nipareki situru' parentaNa Allata'ala mae ri Musa, siagang situruki panrala' le'baka Napappicinikang Allata'ala mae ri Musa.

⁴⁵ Nampa naerang boe-boeta siagang Yosua anjo pa'balla'-ballakanNa Allata'ala ri wattunna a'lampa ke'nanga ambunduki nampa naalle ke'nanga anne pa'rasanganga battu ri kakoasanna bansa-bansa nibongkaya ri Allata'ala battu ri dallekanna ke'nanga. Niaki anjoreng anjo pa'balla'-ballakanNa Allata'ala sa'genna jammang pamarentahanna Daud.

⁴⁶ Nipakasannammi atinNa Allata'ala ri Daud siagang napala'mi sollanna nikellai appare' se're Balla' Sambayang untu' Allata'ala, nisombaya ri Yakub.

⁴⁷ Mingka Salomomi ambangungi anjo ballaka untu' Allata'ala.

⁴⁸Mingka tena nammantang Allata'ala Kaminang Tinggia lalang ri balla' napareka rupataua; nasaba' nia' tattulisi' lalang ri Kitta'na na'bia angkanaya,

⁴⁹ ‘Langika a'jari empoang kala'birangKu, na linoa a'jari pa'dongkokang bangkengKu. Balla' apa eroka nupaentengangA'? Kemae tampa' laKupammari-maria?

⁵⁰Sai KalengKu ampa'jari sikontu apa niaka?’ kammaminjo kananNa Allata'ala.

⁵¹ Teai sipato' kapala batunu ngaseng, siagang teai sipato' sukkara'nu mannuruki ri Allata'ala! Teai sipato' tongolo'na tolinnu mae ri kana-kananNa Allata'ala! Sangkamma le'ba' ngasengko siagang boe-boenu; tuli erokko angngewa ri RohNa Allata'ala!

⁵²Maka nia' na'bi tanisessaya ri boe-boenu? Nabunoi ke'nanga tunisuroNa Allata'ala, le'baka ampabattui riolo dudu angkanaya labattui anjo Ata matojenNa Allata'ala. Na kamma-kamma anne le'ba'mi nupasikongkolang siagang nubuno anjo Ana'Na Allata'ala.

⁵³Le'ba'mi napabattu malaeka'-malaekaka sikamma parentaNa Allata'ala mae ri kau mingka taerokako anturuki!”

⁵⁴Kamma nalangngere'na anggota-anggota sidang Pangadelang Agamaya sikamma anjo napaua Stefanus, pa'risi' sikalimi nyawana ke'nanga siagang sanna' ngasemmi larrona mae ri Stefanus.

⁵⁵Mingka anjo Stefanus nikoasaimi ri RohNa Allata'ala, naccongamo nai' ri langika. Nacini'mi kala'biranNa Allata'ala, siagang nia'mi nacini' Isa ammenteng ri tampa' kakoasanNa, iamintu ri sa'ri kananNa Allata'ala.

⁵⁶Nakanamo Stefanus, “Ciniki, tassungkei kucini' surugaya na nia' Ana' Ma'rupataua ammenteng ri sa'ri kananNa Allata'ala!”

⁵⁷Natongko'mi tolinna anjo anggota-anggotana sidang pangadelang agamaya, siagang ammarrang-marrang, nampa assama-sama ke'nanga ambakkai Stefanus.

⁵⁸Nare'resammi ke'nanga Stefanus assulu' battu ri kotaya nampa namanang-manangngi nasambila batu. Naboli'mi pakeanna anjo tau ancinikai anjo apa kajarianga mae ri se'rea tu rungka niarenga Saulus.

⁵⁹Lalang nasambilana ke'nanga Stefanus, akkio'mi Stefanus, nakana, “O Batara Isa, Kitarimami nyawaku!”

⁶⁰Nampa akkulantu' siagang ammarrang lompo, nakana, “O Batara, teaKi' patanggongiangi anne dosaya mae ri ke'nanga.” Le'baki akkana kamma, matemi Stefanus.