Read Makassar Version – KITTA' MATANGKASA LAMPA-LAMPANA 8 Bible Online

LAMPA-LAMPANA 8 - Makassar Version – KITTA' MATANGKASA bible

LAMPA-LAMPANA 8

¹Na sannang todong nyawana Saulus ri nibunonamo Stefanus. Iatommi anjo alloa nappakkaramulamo niondang mange-mange jama'aka ri Yerusalem. Sa'genna tassia'-siara'mo sikamma tau tappaka ri sikontu daera Yudea siagang Samaria. TunisuroNa mami Allata'ala tena natassia'-siara'.

²Mangemi sikamma tau mallaka ri Allata'ala antarawangi maya'na Stefanus. Nakarrukimi ke'nanga Stefanus. Sanna' ngaseng si'nana atinna ke'nanga.

³ Mingka tuli usahaji pole Saulus ansessai jama'aka. A'lampai ri tasse're-se'reang balla', nanare'resang ngaseng assulu' tau tappaka. Nampa napantama' ke'nanga ri tarungkua.

⁴Sikamma anjo tau tappa' tassiaraka, massing napabattumi anjo Kabara' Baji' battua ri Allata'ala ri kere-keremae.

⁵A'lampami Filipus mange ri kota Samaria na napabattu passala'na anjo Karaeng Mappasalama' Napa'janjianga Allata'ala, mae ri tau niaka anjoreng ri Samaria.

⁶Ri wattunna nalangngere' taua a'bicara Filipus, siagang nacini' gau'-gau' appakalannasa' nagaukanga, jaimi ke'nanga amparhatikangi anjo apa napaua Filipus.

⁷Nasaba' assulu'mi roh ja'dalaka ammarrang kodi battu ri tau jai nasosoka setang, lanri nabongkai Filipus assulu'. Jai tommi tau peso' siagang tau tempang niballei na'jari baji'.

⁸Sanna'mi rannuna tau niaka ri Samaria.

⁹Anjoreng ri Samaria nia' se're tau bura'ne niareng Simon. Sallomi napakalanna'-lannasa' taua ri Samaria lanri jaina pangngissenganna. Nacaritami kalenna mae ri taua angkanaya ia tau sannaki porena.

¹⁰Jari sanna'mi niparhatikanna ri sikamma tau niaka ri anjo kotaya ri Samaria. Nakanamo ke'nanga, “Iaminne tau kagassinganNa Allata'ala, ia masahoroka nikana, ‘Kagassingang Malompoa.’ ”

¹¹Sallo sikalimi napakalanna'-lannasa' taua lanri pangngissengang baca-bacana. Sa'genna sanna'mi niparhatikanna ri taua.

¹²Mingka napabattumi Filipus mae ri ke'nanga ri passala' antekamma bateNa Allata'ala lampaentengi PamarentahanNa, siagang passala'na Isa Almasi, Karaeng Mappasalamaka. Tappa'mi ke'nanga mae ri anjo kabara' Baji' napabattua Filipus. Nije'ne'mi ke'nanga, bura'ne-baine.

¹³Manna Simon tappa' tommi. Na ri wattunna le'ba'mo nije'ne', amminawang tulimi ri Filipus. A'jari takkalanna'-lannasa'mi Simon napakamma anjo gau'-gau' appakalannasa' kajarianga.

¹⁴Nalangngere'mi sikamma tunisuroNa Allata'ala ri Yerusalem angkanaya natarimami taua ri Samaria kananNa Allata'ala. Jari nasuromi ke'nanga Petrus siagang Yohanes mange anjoreng.

¹⁵Ri wattunna battu Petrus siagang Yohanes mange anjoreng, napappala' doangammi anjo taua ri Samaria, sollanna nisare ke'nanga RohNa Allata'ala.

¹⁶Nasaba' tenapa manna sitau ri ke'nanga nikoasai ri RohNa Allata'ala; nampa nije'ne' ke'nanga lalang arenNa Isa Almasi.

¹⁷Naangka'mi limanna Petrus siagang Yohanes, irateanganna sikamma anjo tu Samariaya; jari natarimami ke'nanga RohNa Allata'ala.

¹⁸Nacini'mi Simon angkanaya lanri naangka'na limanna anjo tunisuroNa Allata'ala irateanganna ngaseng anjo taua, nanisaremo anjo taua ngaseng RohNa Allata'ala. Jari angngerammi doe' Simon mae ri Petrus siagang Yohanes,

¹⁹nampa nakana, “Sareang tomma' anjo koasa kammaya, sollanna punna kupadongko' limangku irateanganna taua, lanatarimami anjo taua RohNa Allata'ala.”

²⁰Mingka appialimi Petrus nakana, “Cilaka mako ikau siagang doe'nu! Nukana lakkullei niballi passareNa Allata'ala siagang doe'?

²¹Tena ha'nu kau lamminawang lalang ri jama-jamanna ikambe, nasaba' talambusai atinnu mae ri Allata'ala.

²²Lanri kammana, bokoimi anjo pikkirang ja'dala'nu, nampa nupala' ri Batara sollanna Napammopporangi anjo pikkirang ja'dala'nu.

²³Nasaba' kuassengi angkanaya sanna' assereatinu, siagang nipare' atako ri kaja'dallanga.”

²⁴Nakanamo Simon mae ri Petrus siagang Yohanes, “Tulunga', nakipala' ri Batara sollanna tena lalo manna sirupa kajariang mae ri nakke, anjo apa kipaua.”

²⁵Le'baki ke'nanga assare kasa'biang siagang napabattu kana-kananNa Batara, ammotere'mi Petrus siagang Yohanes mange ri Yerusalem. Na lalang a'jappana ke'nanga, napabattumi ke'nanga anjo Kabara' Bajika ri kampong-kamponga ri Samaria.

²⁶Nia'mo sitau malaeka' battu mae ri Filipus angkana, “A'lampako linta'! A'lampako timboro', ri agang battua ri Yerusalem mange ri Gaza.” Anjo aganga sinoi.

²⁷A'lampami Filipus. Anjo wattua nia' sitau pagawe balla' lompoa ri Etiopia, sitabang lalang pa'lampanna ammotere' mange ri pa'rasanganna. Anjo taua pagawe tinggi, anta'galakai sikontu pa'barang-baranganna Kandake, karaeng bainea ri Etiopia. Anjo taua battumi ri Yerusalem, untu' anynyomba ri Allata'ala. Na anjo wattua ammotere'mi siagang ratei a'dongko' ri karetana. Lalang ammempona rate ri karetana, sitabangi nabaca Kitta'na Na'bi Yesaya.

²⁹Nakanamo RohNa Allata'ala mae ri Filipus, “Mangeko anreppesi anjo karetaya.”

³⁰Mangemi Filipus a'reppese' ri anjo karetaya, nanalangngere'mo anjo taua ammaca Kitta' Yesaya. Akkuta'nammi Filipus ri anjo taua nakana, “Maka kipahanji battuanna anjo apa kibacaya?”

³¹Appialimi anjo taua nakana, “Antekamma lakkulle kupahang punna tena ampakasingarianga'?” Nampa nakio'mi Filipus nai' ri karetaya nammempo siagang.

³² Iaminne anjo aya'-aya' nabacaya ri Kittaka, “Sanrapangi gimbala' nieranga lamange nisamballe, sanrapangi ana' gimbala' tenaya nassa'ra punna nigoncingi bulunna, kamma tomminjo tamakkana-kanana.

³³Nihinai siagang nigau' tenai naadele'. Niallei nyawaNa battu ri linoa sa'genna tenanniakka manna sitau akkulle ancaritai antekamma passossoranNa.”

³⁴Nakanamo anjo pagawe tinggi battua ri Etiopia mae ri Filipus, “Pauang sabeka', inai napakkanai anne na'bia? Kalennaka, yareka tau maraeng?”

³⁵Appakkaramulami Filipus a'bicara. Napakemi anjo aya'-ayaka appakkaramula ancaritai Kabara' Bajika ri passala'na Isa Almasi, mae ri anjo pagawe tinggia.

³⁶Ri tangngana aganga; anrapi'mi ke'nanga mange ri se'reang tampa' niaka je'ne'na. Nakanamo anjo pagawea, “Ciniki, anjo mae nia' je'ne'! Apapi pole kakuranganna punna erokka' nije'ne'?” [

³⁷Nakanamo Filipus, “Punna tappa' tojeng-tojemmaki' ri atinta, akkulle maki' nije'ne'.” Nakanamo anjo pagawe tinggi battua ri Etiopia, “Tappa'ma' angkanaya anjo Isa, Ana'Na Allata'ala.”]

³⁸Nasuro pamantammi karetana. Nampa naung ke'nanga sipa'rua iamintu Filipus siagang anjo pagawea ri je'neka, nanije'ne' ri Filipus.

³⁹Ri wattunna assulu' ammotere' ke'nanga battu lalang ri je'neka, battumi RohNa Allata'ala angngallei Filipus. Tanicinikami Filipus ri anjo pagawe tinggi battua ri Etiopia. Sanna'mi rannuna nyawana anjo pagawe tinggia, nanapatulusu' pa'lampanna.

⁴⁰Ti'ring nia'mi Filipus ri Asdod. Na ri wattunna napatulusu' pa'lampanna napabattumi Kabara' Bajika ri passala'na Isa, ri sikamma kota-kotaya sa'genna battu mange ri Kaisarea.