Read Makassar Version – KITTA' MATANGKASA ROMA 12 Bible Online

ROMA 12 - Makassar Version – KITTA' MATANGKASA bible

ROMA 12

¹Sikamma sari'battangku! Sanna' baji'Na Allata'ala mae ri katte. Iaminjo saba'na nakupala' dudu ri kau ngaseng sollanna nupassareang sikontu batangkalennu a'jari koro'bang attallasa', siagang matangkasaka, kammayatompa nikarannuanga ri atinNa Allata'ala. Mustina kammaminjo caranu anynyomba mae ri Allata'ala.

²Teako amminawangngi ri atorang-atoranna anne linoa. Boli'mi kamma na Allata'ala ampa'jari berui sipa'-sipa' niaka ri kalennu, sollannu akkulle tappinra. Lanri kammanapi anjo nampa akkulle nuasseng apa Nakaerokanga Allata'ala — iamintu apa nikanaya baji', siagang sukkuka ganna'na, kammayatompa nikarannuanga ri atinNa Allata'ala.

³Le'ba'ma' Nasare passare malammoro'Na Allata'ala. Lanri kammanami anjo nakupakainga' ngasengko angkanaya: Teako pakatinggi dudui kalennu battu ri siratannaya. Parallui nupakatuna pa'mai'nu nampa nuparessa rolong kalennu; massing-massing tau parallui naparessa kalenna situru' pakkulle natarimaya battu ri Allata'ala lanri tappa'na ri Isa.

⁴ Anjo batangkalea jai anggotana. Massing-massing anggota batangkalea nia' ngaseng jama-jamanna.

⁵Kammatommi anjo ri katte ngaseng. Manna nakijai, mingka a'jari se're maki' batangkale lanri assileo' maki' lalang ri Isa Almasi. Siagang nipasisambung ngaseng maki' a'jari anggota-anggota lalang ri se'rea batangkale.

⁶ Massing nia' pakkulle untu' allayani Napassareang Allata'ala mae ri katte, tenaya nasangkamma ngaseng. Anjo pakkullea, passare battu ri Allata'ala lanri pangngamaseanNa mae ri katte. Lanri kammana, musti nipakei anjo pakkullea. Tau anggappaya passare untu' ambirittakangi biritta battua ri Allata'ala, musti nabirittakangi situru' pakkullena anjo biritta battua ri Allata'ala.

⁷Tau niaka pakkullena untu' antulungi paranna tau, musti natulung tojeng-tojengi paranna tau. Tau niaka pakkullena untu' angngajara', musti angngajara' tojeng-tojengi.

⁸Tau niaka pakkullena untu' ampakajarreki paranna tau, musti napakajarre' tojeng-tojengi paranna tau. Tau niaka pakkullena untu' assarei apa-apanna paranna tau, musti lammoro' pa'maiki, situru' siratannaya assare ri paranna tau. Tau niaka pakkullena untu' ammimping, musti ammimping tojeng-tojengi. Tau niaka pakkullena untu' ampappicinikangi pangngamaseanna mae ri paranna tau, musti napappicinikangi anjo pangngamaseanna situlusu' pa'mai'na mae ri paranna tau.

⁹Angngamaseangko siagang ci'nong pa'mai'. Musti nukabirisi gau' ja'dalaka, siagang anna'gala' jarrekko mae ri apa-apa bajika.

¹⁰Musti massing sikamaseang duduko sangkamma tau assari'battanga lalang se're balla'; kammayatompa massing sipirioloiko assare sallang.

¹¹Rajengko anjama-jama. Teako kuttui. Anjamako untu' Batara lalang sumanga' battua ri RohNa Allata'ala.

¹²Musti rannui pa'mai'nu ma'minasa ri Batara; sa'barakko lalang kasusaanga, siagang teako lanrei appala' doang.

¹³Tulungi parannu tu Karisteng ampa'gannaki kaparalluanna, siagang pakate'nei atinnu antarimai julu tappa'nu tenaya nuassengi ke'nanga antama' ri balla'nu.

¹⁴ Pappalakkangi barakka' mae ri Allata'ala tau pallaka panggaukanna mae ri kau. Pappalakkangi barakka', tea' laloko sarei kana-kana pattunra.

¹⁵Amminawangko rannu siagang tau rannua; siagang amminawang tongko angngarru' siagang tau angngarruka.

¹⁶ Massing assiamakko siagang assibajikiko. Teako tinggi langgai, mingka pakatunai kalennu sangkamma tau tunaya. Teako angkanai kalennu cara'de' dudu ri sitojennaya.

¹⁷Punna nia' tau a'gau' ja'dala' mae ri kalennu, teako balasaki siagang kaja'dallang. Gaukangi apa nakanaya ngaseng taua baji'.

¹⁸Usahakangi sollannu akkulle assiama' ngaseng siagang taua lalang tallasa'nu.

¹⁹ Sikamma sari'battangku! Tea' laloko a'balasaki ri kaja'dallanna taua mae ri kau; boli'mi kamma na Allata'ala ampabattui hukkunganna. Nasaba' nia' tattulisi' lalang ri Kittaka angkanaya, “Nakana Batara, iNakkemi lambalasaki panggaukanna taua. INakkemi langhukkungi.”

²⁰ Jari, punna cipuru' musunnu sarei kanre; na punna turerei, sarei je'ne' inung. Nasaba' punna kamma anjo panggaukannu mae ri ia, ma'nassa latu'guru' siri'-siri'mi anjo musunnu.

²¹Teako pa'biangi kalennu nibeta ri kaja'dallanga, passangalinna musti nubetai anjo kaja'dallanga siagang panggaukang baji'.