Read Makassar Version – KITTA' MATANGKASA ROMA 13 Bible Online

ROMA 13 - Makassar Version – KITTA' MATANGKASA bible

ROMA 13

¹Yangasenna taua musti mannuruki mae ri pamarentaya; nasaba' tena pamarenta tabattua ri Allata'ala kakoasanna. Siagang anne pamarenta ri kamma-kammaya anne, napajappai kakoasanna situru' Napassuroanga Allata'ala.

²Lanri kammanami anjo, napunna nia' tau angngewai pamarentaya, sangkamma le'ba'mi angkanaya naewai anjo apa le'bakamo Napattantu Allata'ala. Na inai-nai appanggaukang kamma anjo iami langgappa hukkungang.

³Nasaba' inai-nai a'gau' baji' tena naparallu malla' mae ri pamarentaya. Iaji tau a'gau' kodia musti malla'. Punna erokko tena numalla' ri pamarentaya, musti a'gau' bajikko, nanuanggappa pammuji.

⁴Nasaba' anjo pamarentaya atanNa Allata'ala, anjamaya untu' kabajikannu. Mingka punna a'gau' ja'dalakko, memang musti mallakko mae ri pamarentaya; nasaba' tena naporo nia'naja koasana anghukkungi taua. Iami atanNa Allata'ala, ampabattuai hukkunganNa Allata'ala mae ri tau a'gau' ja'dalaka.

⁵Lanri kammanami anjo namusti mannurukiko mae ri pamarentaya — teai lanri teanuja bawang nihukkung, mingka lanri ero'na memang todong pa'mai'nu.

⁶ Lanri kammana tommi anjo nanua'bayara' sima; nasaba' anjo pamarentaya pagaweNa Allata'ala ampajappayai anne tugasa'na memang.

⁷Jari bayaraki mae ri pamarentaya apa siratanga nubayara' ri ia. A'bayarakko sima punna siratangko a'bayara' sima; siagang a'bayarakko sussung punna siratangko a'bayara' sussung. Musti nubilang lompoi tau siratang nubilang lompo siagang musti nupakala'biriki tau siratanga nupakala'biri'.

⁸Teako kainrangangi apa-apa mamo manna pole ri nai, pantaranganna kainrangang pangngamaseanga ri massing para ikau. Nasaba' inai-nai angkamaseangi paranna tau, sangkammami angkanaya nagaukang ngasemmi apa-apa Napassuroanga Allata'ala le'baka napabattu Musa.

⁹ Nasaba' anjo hukkung-hukkung agama Yahudi angkanaya: Teako assalimaraki; teako ammunoi; teako a'lukkaki; teako cinnai ri apa-apanna parannu tau; yangasenna anjo siagang hukkung-hukkung maraengannaya pole, le'ba'mi nipakabodo a'jari se're hukkung, iamintu, “Kamaseangi parannu tau, sangkamma todong nukamaseanna batangkalennu.”

¹⁰Inai-nai angkamaseangi paranna tau, tena olona la'gau' ja'dala' ri paranna tau. Jari inai-nai angkamaseangi paranna tau, sangkammami angkanaya nagaukang ngasemmi sikamma apa napassuroanga hukkung agamaya.

¹¹Pantaranganna ngaseng anjo pole, nuassengi angkanaya iaminne ri wattu kamma-kammaya anne nusiratang ambangung battu ri tinronu. Nasaba' kamma-kamma anne pila' ambaniangammi wattunta lanipasalama', naia ri wattu beru appakkaramulata a'jari tappa'.

¹²A'birimmi allalo bangngia; natasalloami nasingara'. Jari, baji' maki' ammari anggaukangi gau'-gau' sassanga. Parallui nipipakei kalenta sanjata singaraka.

¹³Musti nigaukangi apa-apa mala'birika, sangkamma biasaya nagaukang taua ri wattu singaraka; teako alla'bi dudu batenu assua'-suara', yareka teako ta'liwakki batenu angnginung sa'gennu nasa'ring. Teako assalimaraki, yareka teako appanggaukang kammai tu tena nungngasseng atorang. Teako assiba'ji, yareka teako assereati.

¹⁴Boli'mi kamma na Batara Isa Almasi ampattantui apa siratanga nugaukang. Siagang teako mannuruki ri sipa'-sipa'na tau dorakaya sollanna nupasukku' nakacinnaia hawa napasunu.