Read Makassar Version – KITTA' MATANGKASA ROMA 15 Bible Online

ROMA 15 - Makassar Version – KITTA' MATANGKASA bible

ROMA 15

¹Ikatte tau tappa' tojeng-tojenga ri apa nipatappaka musti sa'barakki' punna akkabaratangi tau lammaya tappa'na mae ri katte. Takkulleaki' kasannangang kalenta bawang niboya.

²Mingka ikatte musti nipakasannangi atinna paranta tau untu' kabajikanna, sollanna pila' katambang jarre'na tappa'na mae ri Allata'ala.

³ Nasaba' manna Almasi teai kasannangang KalenNa Nanawa-nawa. Nia' tattulisi' lalang ri Kittaka angkanaya, “Sikontu paccalla lamangea ri kalennu, tu'guru' mange ngasemmi ri Nakke.”

⁴Sikontu anjo apa-apa niaka tattulisi' lalang ri Kittaka, lanipake ngasengi untu' angngajarakki'. Nasaba' anjo pappilajarang nitarimaya battu ri Kittaka naajarakki' a'jari sa'bara' siagang a'jari majarre' sanggenta akkulle manrannuang mae ri Allata'ala.

⁵Poro Allata'ala, akkullea assarei kasa'barrang siagang panynyaleori rupataua, antulung ngasengko sollannu akkulle a'julu ati, mannuruki ri katallassanNa Isa Almasi.

⁶Lalang ma'julu atinu nukkulle assama-sama mammuji mae ri Allata'ala, ManggeNa Batarata Isa Almasi.

⁷Lanri kammana, paralluko massing sitarima siagang te'ne pa'mai', sangkamma nitarimanu todong ri Almasi untu' ampakala'biriki Allata'ala.

⁸Nasaba', u'rangi, le'ba'mi Nalayani Almasi tu Yahudia, lanri ero'Na Napappicinikang angkanaya ma'nassa jarreki Allata'ala ri janjinNa, naNarupaimo anjo janjinNa mae ri boe-boeta.

⁹ Napa'jari tommi Isa bansa-bansa maraenga appakala'biri' mae ri Allata'ala, lanri baji' pa'mai'Na Allata'ala mae ri ke'nanga. Nia' tattulisi' lalang ri Kittaka, angkanaya, “Lanri kammanami anjo nakulamammuji-muji mae ri Katte ri tangnga-tangngana bansa-bansaya, lamakkelonga' mammuji-muji mae ri arenTa.”

¹⁰ Nia' todong pole tattulisi' angkanaya, “Ma'rannu-rannuko siagang umma'Na Allata'ala Napilea, ikau bansa-bansaya!”

¹¹ Siagang nakana pole, “Pujimi Allata'ala, ikau sikontu bansa-bansaya, sikontu rupataua parallui mammuji mae ri Ia!”

¹² Siagang kammami anne napaua pole Na'bi Yesaya, “Battu ri sossoranna Isai nia' lammumba sitau lammarentaya mae ri bansa-bansaya; Iami lanapanrannuangi anjo bansa-bansaya.”

¹³Allata'alami tampa' panrannuannu. Poro Nabonei pa'mai'nu sikontu karannuang siagang salewangang, lanri tappa'nu mae ri Ia, sollanna lanri koasa RohNa Allata'ala nanupila' manrannuang mae ri Allata'ala.

¹⁴Sikamma sari'battangku! Tappaka' angkanaya jai apa-apa baji' ri kau ngaseng. Jai todong apa-apa nuasseng, siagang akkulleko massing siajara'.

¹⁵Mingka nia'ija apa-apa maraengang parallu kuterassi kupakaingakkangko anrinni ri suraka, situru' tugasa' Napassareanga Allata'ala mae ri nakke.

¹⁶Napa'jarima' palayanNa Isa Almasi, sollangku nisuro mae ri bansa pantaranganna bansa Yahudia, iamintu bansa-bansa maraenga. Nipa'jarima' imang sollanna kubirittakang Kabara' Baji' battua ri Allata'ala mae ri ke'nanga, sollanna akkulle ke'nanga nitarima a'jari koro'bang mae ri Allata'ala. Kuminasai ke'nanga nanitangkasi ri RohNa Allata'ala, sollanna akkulle a'jari koro'bang matangkasa' mae ri Allata'ala.

¹⁷Jari, lanri assileo'mi katallassangku siagang Isa Almasi, akkullemi kukalompoang pa'mai' jama-jamangku untu' Allata'ala.

¹⁸Iaji nakubarani akkana kamma lanri inakkena Napake Isa Almasi ampappicinikangi apa Nagaukanga Isa, iamintu Napa'jari mannurukimi bansa-bansa maraenga mae ri Allata'ala. Kugaukammi anjo lalang kana-kana siagang panggaukang;

¹⁹kammayatompa ilalang gau'-gau' appakalannasaka, siagang sukkaraka antama' ri akkala'na rupataua; yangasenna anjo koasaNa RohNa Allata'ala anggaukangi. Le'ba' ngasemmi kubirittakang sikamma Kabara' Baji' ri passala'na Isa Almasi mae ri taua, appakkaramula battu ri Yerusalem sa'genna ri Ilirikum.

²⁰Ia pa'minasangku iamintu poro akkullea' ambirittakangi Kabara' Baji' battua ri Allata'ala ri tampa'-tampa' tenayapa nale'ba' nalangngere' taua passala'na Isa Almasi. Nasaba' tena nakuero' sanrapang tau ambangung irate ri pondasi le'bakamo napadongko' tau maraenga.

²¹ Nia' tattulisi' lalang ri Kittaka angkanaya, “Sikamma tau tenayapa nale'ba' anggappai birittaNa, lanacini'mi; siagang tau tenayapa nale'ba' allangngere', lanapahammi.”

²² Iami anjo saba'na nakua'mole-molemo ero' battu angkunjungi ngasengko, mingka tuli nia' halangang.

²³Mingka kamma-kamma anne le'ba'mi jama-jamangku anjoreng ri daera-daeraya. Attaung-taummi salloku tuli ero' angkunjungi ngasengko.

²⁴Sallang punna a'lampa' mange ri pa'rasangang Spanyol, erokka' assengka ri kota nupammantangia; nakuma'minasa sollanna akkulleki' assibuntulu', nakukkulle a'rannu-rannu sinampe' siagang ikau ngaseng. Napunna le'baki anjo, kuminasai sollanna akkulle ngasengko ambantua' untu' anjo pa'lampangku mange ri Spanyol.

²⁵ Mingka kamma-kamma anne erokka' a'lampa mange ri Yerusalem ampangngerangangi sumbangang untu' umma'Na Allata'ala niaka anjoreng.

²⁶Nasaba' le'ba'mi assamaturu' jamaah-jama'aka ri pa'rasangang Makedonia siagang Akhaya untu' assarei sumbangang sikamma sari'battang kasi-asia niaka ri alla'na umma'Na Allata'ala ri Yerusalem.

²⁷ Kammami anjo le'baka natappuki ke'nanga siagang te'ne pa'mai'. Nasaba' sikontutojenna siratang memang tongi ke'nanga antulungi sikamma sari'battang kasi-asi niaka ri Yerusalem; nasaba' battu anjoremmi ri bansa Yahudia anggappa bansa-bansa maraenga sikamma barakka'Na Allata'ala. Jari, siratang tongi anjo bansa-bansa maraenga antulungi bansa Yahudia siagang barakka' pa'barang-barangang.

²⁸Punna le'ba'mo kupa'le'ba' anne tugasakku, siagang le'ba'mi kupabattu anne sumbangang le'baka nipasse're untu' ke'nanga ri Yerusalem, ero'ma' a'lampa mange ri Spanyol nakuassengka ri kota nupammantangia.

²⁹Punna battua' sallang mae ri kau ngaseng, mattantu jai barakka' battu ri Isa Almasi lakupabattuangko.

³⁰Lanri Batarata Isa Almasi, siagang lanri pangngamaseang RohNa Allata'ala, sanna' kupala'na mae ri kau ngaseng sollannu amminawang ngaseng todong attojeng-tojeng siagang inakke appala' doang mae ri Allata'ala.

³¹Pappala' doanganga' sollangku akkulle ta'lappasa' battu ri limanna tau tenaya natappa' ri pa'rasangang Yudea; kammayatompa sollanna akkulle kupajappa tugasakku ampabattui anjo sumbanganga mae ri Yerusalem, siagang natarima baji' ke'nanga siagang te'ne pa'mai'.

³²Sa'genna, punna Nakaerokang Allata'ala, akkullea' battu mae ri kau ngaseng siagang baji'. Nakuakkulle anggappa panynyaleori ri tangnga-tangnganu ngaseng.

³³Poro Allata'ala, akkullea assarei salewangang rupataua, anrurungang ngasengko lalang ri katallassannu. Aming!