Read Makassar Version – KITTA' MATANGKASA ROMA 4 Bible Online

ROMA 4 - Makassar Version – KITTA' MATANGKASA bible

ROMA 4

¹Jari punna kamma, apa lanikana ri passala'na Abraham, boena bansata? Antekamma pangalamanna?

²Punna lanri apa-apa nagaukanga nakkulle nitarima ri Allata'ala a'jari tau nikarannuang ri atinNa Allata'ala, tantu nia'ja alasanna untu' latinggi pa'mai'. Mingka takkulleai tinggi pa'mai' ri dallekanNa Allata'ala.

³ Nia' tattulisi' lalang ri Kittaka angkanaya, “Tappaki Abraham ri Allata'ala; na lanri tappa'na ri Allata'ala, nitarimami a'jari tau nikarannuanga ri atinNa Allata'ala.”

⁴Inai-nai anjama, annarimai gaji; na anjo gajina teai passare, passangalinna ha'na memang todong.

⁵Mingka nia' tau tena nausaha kalenna napare' panna'gallang; passangalinna napappirannuangi kalenna mae ri Allata'ala, nasaba' Allata'alami allappassangi tau dorakaya battu ri dosa-dosana. Lanri iaminjo tappa'na nanitarimamo anjo taua a'jari tau nikarannuang ri atinNa Allata'ala.

⁶Kamma tomminjo panggappana Daud; iaminjo saba'na nanapabattumo sallang mate'nena Daud mae ri tau nitarimaya a'jari tau nikarannuang ri atinNa Allata'ala, Natanijampangia panggaukang-panggaukang salana ke'nanga. Kammaminne kananna Daud,

⁷ “Salamakko ri mate'nea tau nipammopporanga salana siagang dosa-dosana siagang le'baka nitarawang ri Allata'ala dosa-dosana!

⁸Salamakko ri mate'nea tau tenaya nanituntuki dosa-dosana ri Batara!”

⁹Maka tau mannurukiaji bawang ri atorang sunnaka natuju anne sallang mate'nea? Yareka natuju tongi tau tenaya namannuruki ri atorang sunnaka? Le'ba'mi kupau riolo, angkanaya nitarimami Abraham a'jari tau nikarannuang ri atinNa Allata'ala, lanri tappa'na Abraham mae ri Allata'ala.

¹⁰Jari, maka ringngapanna nanitarimai Abraham ri Allata'ala? Ri wattu tenanapa yareka ri wattu le'ba'napa nisunna'? Memang, ri wattu tenanapa nanisunnaki, teai ri wattu le'ba'napa.

¹¹ Ri bokopi nampa nisunnaki Abraham. Na anjo sunnaka poro a'jari pammateiji bawang angkanaya nitarimami a'jari tau nikarannuang ri atinNa Allata'ala, lanri tappa'na mae ri Allata'ala. Natarimami ri Allata'ala ri wattu tenanapa naturuki atorang sunnaka. Na'jarimo Abraham bapa' rohanina sikontu tau tappaka mae ri Allata'ala; na lanri kammana minjo nanitarimamo taua a'jari tau nikarannuang ri atinNa Allata'ala, manna natanaturukia atorang sunnaka.

¹²A'jari tommi Abraham bapa' rohanina tau anturukiai atorang sunnaka. A'jari bapa' rohanimi ri ke'nanga, teai lanri naturukinna bawang ke'nanga atorang sunnaka, passangalinna lanri tappa'na todong ke'nanga mae ri Allata'ala, sangkamma todong Abraham ri wattunna tenapa naturuki atorang sunnaka.

¹³ A'janjimi Allata'ala mae ri Abraham siagang sossoranna, angkanaya anne linoa la'jari warisi'nai Abraham. Na'janji kamma anjo Allata'ala teai lanri naturukinna Abraham hukkung-hukkung agama Yahudia, passangalinna lanri tappa'na mae ri Allata'ala sa'genna nitarimamo a'jari tau nikarannuang ri atinNa Allata'ala.

¹⁴ Nasaba' punna tau mannurukiaji bawang ri hukkung-hukkung agama Yahudia lantarimai apa Napa'janjianga Allata'ala, tena sikalimo matu-matunna taua tappa' ri Allata'ala; kammayatompa tena tommo matu-matunna anjo janjinNa Allata'ala.

¹⁵Anjo hukkung-hukkung agama Yahudia appabattu tongi hukkungang battu ri Allata'ala. Mingka ka'de' tenai anjo hukkung-hukkunga, tena tommi panggaukang andakkaiyai anjo hukkung-hukkunga.

¹⁶ Jari lanri tappa'naji taua mae ri Allata'ala nania' anjo janjinNa Allata'ala. Iaminjo a'jari pammatei mattantua mae ri sossoranna Abraham, angkanaya nisareang bawang-bawanji ke'nanga anjo janjia battu ri Allata'ala; teai untu' tau mannurukiaji bawang ri hukkung agama Yahudia, passangalinna untu' tau tappaka pole ri Allata'ala, sangkamma tappa'na Abraham mae ri Allata'ala. Nasaba' iaminjo Abraham bapa' rohanita ngaseng.

¹⁷ Nasaba' kammaminne kananNa Allata'ala mae ri Abraham, “Kupa'jari mako bapa'na jaia bansa ri lino.” Kammaminjo bateNa Allata'ala assarei janji Abraham. Natappa'mo Abraham mae ri Ia. Iami Allata'ala ampattallasa' poleangai ammotere' tau matea; Ia tommi Allata'ala poro akkanayaji bawang nakkullemo Napa'jari nia' apa-apa tenaya nale'ba' nia'.

¹⁸ Tuli ma'minasana siagang tuli tappa'na Abraham manna natenamo panrannuang. Iaminjo saba'na na'jari bapa'mo mae ri jaia bansa. Sangkamma niaka tattulisi' lalang ri Kittaka, angkanaya, “La'jari sanna' jaina sossorannu.”

¹⁹ Anjo wattua naassemmi Abraham angkanaya tenamo olona lakkulle anggappa ana', nasaba' toa sikalimi nasa'ring kalenna, nasaba' la'birimmi narapi' sibilangngang taung umuru'na; la'biangampa pole, nasaba' tau tamanang bainenna, iamintu Sara. Mingka manna nakamma, tena na'jari kurang tappa'na Abraham.

²⁰Tuli tappaki siagang tena nabata-bata mae ri janjinNa Allata'ala. Ba'lalo, a'jari pila' jarre'mi nasaba' tappa'na; sa'genna mammuji-mujimi ri Allata'ala.

²¹Sanna' napatappa'na angkanaya laNarupai janjinNa Allata'ala.

²²Iaminjo saba'na nanitarimamo Abraham a'jari tau nikarannuang ri atinNa Allata'ala.

²³Anjo kana angkanaya, “nitarimai a'jari tau nikarannuang ri atinNa Allata'ala,” teai untu' Abraham bawang nanitulisiki,

²⁴passangalinna untu' ikatte ngaseng pole. Lanitarima tongki' a'jari tau nikarannuanga ri atinNa Allata'ala, lanri tappatta mae ri Allata'ala, le'baka ampattallasa' poleangi ammotere' Isa, Batarata, battu ri kamateanga.

²⁵ Anjo Isa le'ba'mi nipassareang untu' nibuno passabakkang dosa-dosata; nampa nipattallasa' poleang ammotere' ri Allata'ala, sollanta nisare oloang assibajiki ammotere' siagang Allata'ala.