Read Makassar Version – KITTA' MATANGKASA ROMA 6 Bible Online

ROMA 6 - Makassar Version – KITTA' MATANGKASA bible

ROMA 6

¹Jari punna kamma, apamo lakkulle nikana? Jari musti tuli nigaukammi dosaya sollanta pila' nikamaseang ri Allata'ala?

²Tantu tena! Nasaba' tenamo nanakoasaiki' dosaya. Jari apa saba'na natuli lanigaukang dosaya lalang ri tallasatta?

³Maka nuasseng ngasenji sari'battang, angkanaya ri wattunta nije'ne' nipasileo'mi tallasatta siagang Isa Almasi? Anjo battuanna angkanaya nipasileo' maki' siagang kamateanNa Isa Almasi.

⁴ Iaminjo nije'netta a'jari pammatei angkanaya sikamateang maki' Isa Almasi, siagang nipasitarawang maki' siagang KalenNa; sollanna, antekamma batena attallasa' poleang ammotere' Isa Almasi lanri koasa mala'biri'Na Allata'ala Manggea, kamma tomminjo akkullei nigappa katallassang berua.

⁵Punna assileo' maki' siagang Isa Almasi lanri sikamateanta lalang ri KalenNa, kamma tomminjo lanipasileo' tommaki' attallasa' poleang ammotere' battu ri kamateanga sangkamma Ia.

⁶Niassemmi angkanaya nipasibunomi sipa'-sipa' kodi rupatauta salloa ri wattunna nibuno Isa ri kayu sallika, sollanna a'jari ancuru' koasana sipa'-sipa' kodita; lanri kammana, tenamo nanapare' ataki' dosaya.

⁷Nasaba' punna matemo taua, nilappassammi battu ri koasana dosaya.

⁸Punna le'ba' maki' sikamateang siagang Isa Almasi, tappa' maki' angkanaya lasikatallassang tommaki' ammotere' lalang ri KalenNa Isa.

⁹Nasaba' niassemmi angkanaya le'ba'mi nipattallasa' poleang ammotere' Almasi battu ri kamateanga siagang talamateami pole ribokoanganna; tenamo nakkulle nikoasai KalenNa ri kamateanga.

¹⁰Anjo kamateang Naoloa Almasi iami kamateang mae ri dosaya. Anjo sikaliji kajariang sa'genna satunggu-tungguna. Na anjo katallassang Naoloa ri kamma-kammaya anne, iamintu katallassang untu' mae ri Allata'ala.

¹¹Ikau ngaseng pole, musti nupasangkamma tongi angkanaya matemi kalennu lalang ri dosa-dosaya, mingka attallasa' poleang mako ammotere' nusijarreki siagang Allata'ala tete ri Isa Almasi.

¹²Tea' mako pole pa'biangi nikoasai tallasa'nu ri dosaya ilalang ri anne linoa, sollanna tena nanuturukiangi ero' kaja'dallanna.

¹³Tea tongko passareangi tubunu mae ri kakoasanna dosaya nanipake anggaukangi kaja'dallanga. Passangalinna passareangi kalennu mae ri Allata'ala, a'jari tau le'bakamo nipalette' battu ri kamateanga mae ri katallassanga. Passareangi sikontu batangkalennu mae ri Allata'ala, sollanna nipakei anggaukangi ero'Na Allata'ala.

¹⁴Takkullea mako nikoasai ri dosaya, nasaba' tenamo nurawanganna hukkung-hukkung agama Yahudia attallasa', passangalinna irawanganna mako pangngamaseanNa Allata'ala.

¹⁵Jari, kamma-kamma anne apa bodona bicaraya? Maka akkullei nigaukang dosaya nasaba' tenamo nakirawangang kakoasanna hukkung-hukkung agama Yahudia passangalinna irawangang kakoasanNa pangngamaseanNa Allata'ala? Tena sikalia!

¹⁶Maka nuassenji angkanaya punna nupassareang kalennu mae ri se'reang tau nanugaukang apa ero'na, sikontutojenna napa'jari ata mako anjo tau nuturukia ero'na? Akkulleko a'jari ata mae ri apa langngeranga mae ri kamateanga, yareka a'jari ata mannurukia mae ri Allata'ala nalanri kammana assibajiki mako ammotere' siagang Allata'ala.

¹⁷Mingka sukkuru' maki' mae ri Allata'ala! Nasaba' riolo a'jari atako ri dosaya, mingka kamma-kamma anne nuturuki tojeng-tojemmi pangngajarang annabaya, le'baka nipassareang mae ri kau.

¹⁸Le'ba' mako nilappassang battu ri dosa-dosaya, nakamma-kamma anne a'jari ata mako mae ri ero'Na Allata'ala.

¹⁹Nasaba' sukkara' sikali nupahang, ammakema' pangngebarang mae ri nikanaya a'jari ata sollanna gampang nupahang. Riolo nupassareangi sikontu batangkalennu a'jari ata mae ri apa-apa ra'masaka siagang panggaukang ja'dalaka untu' kaja'dallanga. Kamma tomminjo ri kamma-kammaya anne, musti nupassareangi sikontu batangkalennu a'jari ata mae ri ero'Na Allata'ala, untu' anggaukangi ero'Na bawang Allata'ala.

²⁰Wattunnu nipare' ata ri dosa-dosaya, tena nanikoasaiko ri ero'Na Allata'ala.

²¹Anjo wattua apa passawallang nugappa ri anjo panggaukang appakasirika? Poro kamateang bawang naerang anjo panggaukang-panggaukang kammaya!

²²Mingka kamma-kamma anne nilappassang mako battu ri dosa-dosaya, siagang a'jari mako atanNa Allata'ala. Naia passawallang nugappaya iamintu angkanaya nupassareammi tallasa'nu mae ri Allata'ala, siagang iaminjo langngerang wassele' katallassang sitojennaya siagang katallassang satunggu-tunggua.

²³Nasaba' pahalana dosaya iamintu kamateanga; mingka pangngamaseang Napassareang bawang-bawanga Allata'ala, iamintu katallassang sitojennaya siagang katallassang satunggu-tunggua lalang ri Isa Almasi, Batarata.