Read Makassar Version – KITTA' MATANGKASA 1 KORINTUS 1 Bible Online

1 KORINTUS 1 - Makassar Version – KITTA' MATANGKASA bible

1 KORINTUS 1

¹ Sikamma sari'battangku, anggota jama'aNa Allata'ala ri Korintus! Le'ba' mako nikio' ri Allata'ala a'jari umma'Na, lanri taunNako Isa Almasi; assiagang ngaseng sikontu tau niaka ri kere-keremae anynyomba ri Batarata Isa Almasi, iamintu Batarana ke'nanga siagang Batarata todong. Inakke Paulus siagang sari'battanta Sostenes, ma'minasa poro nibarakkakiko siagang nisare ngasengko salewangang ri Allata'ala Manggeta, siagang Batara Isa Almasi. Anne suraka kutulisiki salaku tunisuroNa Isa Almasi, niangkaka ri Allata'ala, lanri ero' KalenNa Allata'ala.

⁴Tuli appala' sukkurukka' mae ri Allata'ala saba' ikau ngaseng, nasaba' nutarimami passare malammoro'Na Allata'ala, tete ri Isa Almasi.

⁵Akkalumanynyang mako lalang ri yangasenna apa-apaya ri katallassanga, lanri a'jari taunNa mako Isa Almasi. Jaimi pangngassengannu, siagang cara'de' mako ampangngajarrangi anjo pangngassenganga.

⁶Iami anjo a'jari butti angkanaya baji'mi antama'na ri atinnu anjo biritta ri passala'na Isa Almasi;

⁷sa'genna tenamo nukakurangang barakka' manna sirupa, lalang nutayanna kabattuanNa Batarata Isa Almasi ampa'nyatai KalenNa mae ri sikontu rupataua.

⁸KalenNa Almasi ampakajarrekko sa'genna kala'busang, sollanna punna battu poleangi sallang, tena callanu narapikang.

⁹Akkullei nipatappa' tojeng-tojeng Allata'ala. Iami Allata'ala le'baka angkiokko untu' a'jari se're siagang Ana'Na, iamintu Isa Almasi, Batarata.

¹⁰Sikamma sari'battangku! Kupalaki, lalang arenNa Batarata Isa Almasi, sollannu a'julu kana; sollanna tena nanusisa'la'-sa'la'. Paralluko a'jari se're, a'julu ati siagang a'julu pikkirang.

¹¹Nasaba' nia' tau battu ri balla'na Kloë ampabattui ri nakke angkanaya nia' passigea'-geakkang ri kau ngaseng.

¹² Natabaya kanangku iamintu nia' ri kau angkana, “Inakke amminawanga' ri Paulus,” nia' angkana, “Inakke amminawanga' ri Apolos,” nia' todong angkana, “Inakke amminawanga' ri Petrus,” kammayatompa nia' angkana, “Inakke amminawanga' ri Almasi.”

¹³Masakang ta'bage-bagei Almasi? Tena nale'ba' nisalli' Paulus untu' ikau! Sai tena todong nanije'nekko untu' a'jari tumminawanna Paulus?

¹⁴ Sukkurukka', nasaba' tena manna sitau le'ba' kuje'ne' ri kau ngaseng, pantaranganna Krispus siagang Gayus.

¹⁵Tapporo tena lalo manna sitau angkana iaji nakuje'ne' sollanna a'jari tumminawang ri nakke. (

¹⁶ O, memang! Inakke anje'neki Stefanus sibatu balla'. Inakke memang anje'neki ke'nanga. Mingka pantaranganna anjo, turu' pangngu'rangingku tenamo tau maraeng le'ba' kuje'ne'.)

¹⁷Nasuroa' Almasi teai untu' a'je'ne' tau, passangalinna untu' ambirittakangi Kabara' Baji' battua ri Allata'ala, siagang pole, anjo kugaukangi teai lanri kacara'dekang a'bicara salaku rupatau, sa'genna la'jari sia-siamo anjo koasa kamateanNa Isa Almasi ri kayu sallika.

¹⁸Nasaba' anjo kabara' kamateanNa Isa Almasi a'jari kabara' balle-ballei mae ri tau lamangea ri kapanrakanga. Mingka untu' ikatte tu nipasalamaka ri Allata'ala, anjo kabaraka iami a'jari pammatei ri Napa'nyatana kakoasanNa Allata'ala.

¹⁹ Nasaba' Nakana Allata'ala lalang ri Kittaka, “LaKukacoi kaporeanna tau cara'deka siagang laKupa'lanynyaki pammahanna tau niaka pangngassenganna.”

²⁰ Jari, apa matu-matunna anjo tau niaka pangngassenganna? Apa matu-matunna sikamma anjo tau cara'deka? Apa matu-matunna tu panritaya ri anne linoa? Le'ba'mi Napakasingara' Allata'ala angkanaya kaporeanna anne linoa poro balle-balle lompo bawang!

²¹Nasaba' manna pole antekamma cara'de'na rupataua, mingka takkulleai mangngasseng ri Allata'ala punna lanri kacara'dekanna bawang. Mingka lanri mangngamaseanNa Allata'ala, Naero'mo ampasalamaki sikamma tau tappaka ri Ia, tete ri anjo biritta napabattua ikambe, nicini' a'balle-ballea ri anne linoa.

²²Tu Yahudia annuntuki gau' appakalannasa' salaku butti, kammayatompa tu Yunania naboyai lalang ri kaporeang niaka ri anne linoa.

²³Mingka ikatte anne iaji bawang nibirittakang iamintu biritta ri passala'na Isa Almasi le'baka mate ri kayu sallika. Anjo birittaya napakanassui pa'mai'na tu Yahudia, siagang nicini' a'balle-ballei ri bansa-bansa maraenga. Na bansa maraenga nakanai kadongokang anjo kammaya.

²⁴Mingka untu' sikamma tau le'bakamo nikio' ri Allata'ala — baji' tu Yahudi yareka bansa-bansa maraenga — iami a'jari pammatei ri butti Napa'nyatana kakoasanNa siagang kabajikanNa Allata'ala.

²⁵Nasaba' ia dongoka nicini' ri Allata'ala, iami la'bi poreangngang nakaporeanna rupataua. Na ia lammaya nicini' ri Allata'ala iami gassingangngang nakagassinganna rupataua.

²⁶Sikamma sari'battangku! Cobasai u'rangi antekamma katallassannu ri wattunnu Nakio' Allata'ala. Sike'de' duduji ri kau tau pore, yareka tau koasa, yareka tau tinggia empoanna ri paccini'na rupataua.

²⁷Nasaba' Nakunjungi memang tongi Allata'ala ampilei tau nicini' dongoka ri anne linoa; sollanna a'jari siri'-siri' tau cara'deka. Siagang Napile tommi Allata'ala tau nicini' lammaya ri anne linoa, sollanna a'jari siri'-siri' tau makassaka siagang magassinga ri anne linoa.

²⁸Napilemi Allata'ala apa-apa nicini' rawaya, nicini' tunaya, yareka nicini' tenaya matu-matunna ri anne linoa, sollanna Naancu'-ancuru' Allata'ala apa-apa nicini' mala'birika ri anne linoa.

²⁹Sollanna punna kamma anjo, tenamo manna sitau akkulle ampattampo-tampoangi kalenna ri dallekanNa Allata'ala.

³⁰KalenNa Allata'ala ampasse'rei katallassannu siagang Isa Almasi. Tete ri Isa Almasi nanipa'jariki' cara'de'. Siagang tete ri Iatommi naNapasibajiki maki' Allata'ala mae ri KalenNa, iamintu Napa'jari maki' umma'Na, kammayatompa Napa'jari bebasa' maki'.

³¹ Jari, sangkamma tattulisika lalang ri Kittaka, “Inai-nai ero' ampakalompoi pa'mai'na, musti napakalompoi pa'mai'na lanri apa-apa Nagaukanga Batara.”