Read Makassar Version – KITTA' MATANGKASA 1 KORINTUS 4 Bible Online

1 KORINTUS 4 - Makassar Version – KITTA' MATANGKASA bible

1 KORINTUS 4

¹Alle rapammi angkanaya ikambe anne palayang-palayanNaki' Almasi; ikambemi nisare tugasa' ambirittakangi sikamma rancanaNa Allata'ala, tenayapa naassengi anne linoa.

²Uru-uruna nituntu' ri anjo palayang kammaya iamintu tamalanrea mae ri karaenna.

³Untu' inakke, tena nanjari apa-apa angkanaya antekamma panggappanu — yareka panggappana tau maraenga — mae ri kalengku. Ba'lalo manna inakke tena todong naparallu angkanaya antekamma panggappaku mae ri kalengku todong.

⁴Tena nakuassengi kalengku angkanaya nia' salaku manna pole passala' apa mamo; mingka anjo takkulleai a'jari butti angkanaya tena memang salaku. Kalenna bawang Batara akkulle ampattantui angkanaya sala' yareka tena nakusala.

⁵Lanri kammana, nasaba' tenapa narapiki wattunna, teako akkaro-karo dudui ampattantui angkanaya salai yareka tena nasala se'rea tau. Tayangi sa'genna battu sallang Batara. Iami lassungke ngasengi sikontu rahasia taccokkoa lalang ri sassanga. Iami lampakacinikang ngasengi sikontu apa le'baka narancana lalang ri massing atinna taua. Iapi anjo wattua nampa massing lannarima taua pujiang siratannaya battu ri Allata'ala.

⁶Sikamma sari'battangku! Lanri untu' kaparalluannu ngaseng, nakalengkumo siagang Apolos kupitujui anne bicaraya; sollannu akkulle accini' conto mae ri kambe, angkanaya antekamma batenu appilajara' ampahangi anne bicara angkanaya, “Anna'gala' majarre' mako mae ri paratorang niaka.” Sa'genna tenamo manna sitau akkulle ampakalompo dudui se'rea tau, nampa nacini' tuna maraenganga.

⁷Inaika ampa'jariko malompoangang na tau maraenga? Sai yangaseng-ngasenna sangnging apa-apa nutarimaji battu ri Allata'ala. Jari angngapa nanuero' ampattampo-tampoangi kalennu, sangkamma le'ba' angkana anjo apa-apa niaka ri kau teai apa-apa nutarima?

⁸Memang tenamo apa-apa nuparalluang pole! Nasaba' akkalumanynyang mako! A'jari karaeng mako! Na ikambe tena. Teai sipato' baji'na ka'de' a'jari karaeng tojeng-tojeng mako, sollanta akkullemo siagang ammarenta.

⁹Nasaba' turu' panggappaku, ikambe tunisuroNa Allata'ala, le'ba' maki' Napare' paccini'-cinikang Allata'ala ri dallekanna rupataua siagang malaekaka. Ikambe sangkamma maki' tau tuna le'baka nihukkung mate ri dallekanna tau jaia siagang nigora-gorai ri bonena linoa.

¹⁰A'jari tau dongo' maki' lanri Almasi, nanua'jari cara'de'mo tu Karistenga! Ikambe a'jari lamma maki', na ikau a'jari gassing mako! Ikambe nicalla maki' na ikau nipuji-puji mako!

¹¹Sa'genna kamma-kamma anne nakasia'mi ikambe nikanaya cipuru' siagang atturere; care-carena ikambe ia mami ammantang niaka ri kalenna ikambe; nisessa maki' ri taua; tenamo tampa' pammantanganna ikambe;

¹² akkareso terasa'mi ikambe amboyai kaparalluang allo-alloa. Punna nitunraiki', nibalasa'mi siagang barakka'; punna nisessaki', sa'bara' mamaki';

¹³punna nabicara kodiki' taua, nibalasa'mi siagang kana-kana baji'. Sanrapang bajikangang mami loro-lorona anne linoa na ikambe; sa'genna kamma-kamma anne nipasanrapang mamaki' ra'masa'na anne linoa.

¹⁴Teai lanri erokku ampakasirikko nakutulisi' anne kammaya mae ri kau, mingka lanri erokku ampakaingakko sangkamma ana'-ana' kalengku.

¹⁵Nasaba' inakkemi a'jari manggenu ngaseng, manna pole ebara' angkana nia'mo sampulo sa'bu gurunnu. Lalang attallasa'numo a'jari se're siagang Almasi inakkeji bawang a'jari manggenu, nasaba' inakke ampabattui anjo Kabara' Baji' battua ri Isa Almasi mae ri kau.

¹⁶ Lanri kammanami anjo nasanna' kupala'na ri kau ngaseng, sollannu angngalle conto mae ri nakke.

¹⁷Iami anjo nakusuromo Timotius battu mae ri kau ngaseng. Salaku tumminawang ri Almasi, sangkammai ana' kalengku, kukamaseanga. Iami ana' akkullea nipatappa'. Iami lampakaingakko ri passala'na katallassang kupinawanga ri wattungku a'jari tappa'mo mae ri Almasi; iamintu katallassang le'baka kupangngajarrang mae ri sikontu jamaah niaka ri kere-keremae.

¹⁸Nia' siapa are battu ri kau a'jari tampo, lanri nakana kapang ke'nanga talabattua' mae ri kau ngaseng.

¹⁹Mingka punna Naerokang Batara tena tabattuku mae ri kau ngaseng. Iapi anjo wattua sallang nakucini' todong apa akkullea nagaukang anjo tau tampo kammaya; jari teai poro bicaranna bawang ke'nanga kulangngere'.

²⁰Nasaba' punna ammarenta Allata'ala lalang ri katallassanna taua, tena naporo lalang ri bicaranna bawang nipa'butti mingka lalang pole ri koasa katallassanna anjo taua.

²¹Jari pilei mami apa la'bi nungaia! Apa erokko nakuterassi bateku angngajarakko punna battua' mae ri kau, yareka kulammai siagang kupakkamaseangi?