Read Makassar Version – KITTA' MATANGKASA 1 KORINTUS 5 Bible Online

1 KORINTUS 5 - Makassar Version – KITTA' MATANGKASA bible

1 KORINTUS 5

¹ Sikontutojenna battumi mae ri nakke kabara'na angkanaya nia' tau ta'liwa'-liwa' batena a'gau' bawang ri tangnga-tangnganu; nia' tau assalimara' siagang amma' aona. Manna tau kapereka ta'gau' kammayai!

²Mingka manna nakamma, ero' ijako tuli attampo-tampo. Sikontutojenna, musti si'nai nyawanu siagang musti nupassuluki anjo tau a'gau' kammaya battu ri alla'nu.

³Bellai batangkalengku battu ri kau ngaseng, mingka pa'maikku niaki ri tangnga-tangnganu. Jari erokka' a'bicara sangkamma angkana niakka' ri tangnga-tangnganu, “Lalang arenNa Batara Isa Almasi nakupau angkanaya, anjo tau le'baka anggaukangi anjo panggaukang ra'masa' kammaya, musti nihukkungi!” Punna a'rappungangko pasanrapangi angkanaya nia' tonga' hadere' lanri koasaNa Isa Almasi.

⁵Musti nupassareangi anjo taua mae ri Billisika; sollanna panra' tubuna siagang lanri kammana nanipasalama' rohna ri wattu battuna pole ammotere' Batara.

⁶ Tena nabaji' anjo apa nupattampo-tampoanga! Nuassemmi kapang anne lampangkana angkanaya, “Pa'gambang sike'deka ampa'bakkaki labu' le'baka nileo'.”

⁷ Pelaki rolong anjo pa'gambang salloa, iamintu dosaya, sollannu a'jari sanrapang labu' berua nileo', tangkasaka battu ri pa'gambanna dosa salloa. Nakuasseng angkanaya kamma mako anjo, lanri sadiami passua'-suarrang allo Paskata: Almasi a'jari sanrapang gimbala' Paska, le'baka nikoro'bangkang.

⁸ Jari, maeko nanipakalompo anjo passua'-suarranga siagang roti tenaya nammake pa'gambang; iamintu roti a'jaria pangngebarang mae ri apa-apa tenaya callana siagang Nakaerokanga Allata'ala. Teaki' nakipakalompoi anjo passua'-suarrang Paskaya siagang roti niaka pa'gambang sallona, iamintu pa'gambang dosaya siagang kaja'dallanga.

⁹Kupaumi lalang ri surakku allaloa, sollanna tena nanuassileo' siagang tau nangaia a'gau' bawang.

¹⁰Naia kupakkanaya tau a'gau' bawang teai tau tenayapa nanaassengi Allata'ala, yareka tau angngoa, yareka paballe-balle, yareka tau anynyomba ri barhala, tena sikaliapa naassengi Allata'ala! Teai ke'nanga kupakkanai! Nasaba' punna musti nupakabellai kalennu battu ri ke'nanga, tantu assulu' taba sikali mako battu ri anne linoa.

¹¹Mingka ia kupakkanaya iamintu, angkanaya teako asse'rei siagang tau nakanaya kalenna Karisteng, mingka a'gau' bawangi, yareka angngoai, yareka anynyombai barhala, yareka nangai napau kodi paranna tau, yareka painungi, yareka palukkaki. Manna ammempoa sipangnganreang siagang ke'nanga tea' laloko!

¹² Memang, teai urusangku angngadeli tau tenaya na Karisteng. KalenNa Allata'ala langngadeli ke'nanga. Mingka ri sesena anggota-anggota jama'aka, sai musti kalenna tonji jama'aka angngadeli ke'nanga? Nia' tattulisi' lalang ri Kittaka angkanaya, “Bongkai tau ja'dalaka battu ri alla'nu.”