Read Makassar Version – KITTA' MATANGKASA 1 KORINTUS 6 Bible Online

1 KORINTUS 6 - Makassar Version – KITTA' MATANGKASA bible

1 KORINTUS 6

¹Angngapa nunia' barani a'lampa mae ri haking tenaya natappa' ri Allata'ala antuntuki parannu tau tappa' ri Allata'ala, punna assisala pahangko siagang ia? Angngapa natena numae ri umma'Na Allata'ala ampassilolongangi?

²Tenaka nanuassengi angkanaya umma'Na Allata'ala langngadeli anne linoa? Jari punna ikau memang langngadeli anne linoa, maka tanukulleai ampassilolongangi anjo parkara kammaya ca'dina?

³Tenaka nanuassengi angkanaya ikatte langngadeli malaekaka? Jari la'biangampa pole punna parkara katallassang allo-alloaja.

⁴Jari punna ammumba parkara kammaya anjo maka lanuerangi mae ri tu tena sikalia empoanna lalang ri jama'aka?

⁵Punna kamma, teai sipato' appakasiri'-siri'na! Tantu nia'ja tu cara'de' ri tangnga-tangnganu ampakabajiki punna nia' para tu Karisteng assisala pahang!

⁶Mingka angngapa nania' ri kau mange antuntuki paranna tu Karisteng ri dallekanna tu tenaya na Karisteng?

⁷Teako angkana mangea bawang akkara-kara ri dallekanna tu tenaya na Karisteng nanusala; ba'lalo nampa mako assisala-sala para ikau nanunibeta lompomo. La'bi bajikangangi punna tanugappaya kaadelanga yareka nipakarugiko naia appakammaya anjo!

⁸Mingka, ba'lalo ikaumi kalennu a'gau' taadele' siagang ampakarugi tu maraenga! Ba'lalo parannu tonji tau tappa' nupakamma!

⁹Maka nuassenji angkanaya takkulleai a'jari umma'Na Allata'ala tu tenaya namannuruki? Teako eroki nitipu. Inai-nai a'gau' bawang, inai-nai anynyomba ri barhalaya, inai-nai a'gau' bawang, inai-nai a'gau' sala siagang paranna bura'ne yareka paranna baine,

¹⁰inai-nai a'lukka', angngoa, siagang painung, inai-nai nangai ambicara kodi paranna tau siagang ampaccoki paranna tau — yangasemmi anjo tau kammaya takkullea a'jari umma'Na Allata'ala.

¹¹Nia' siapa are jainu appanggaukang kamma anjo riolo. Mingka kamma-kamma anne le'ba' mako nitangkasi battu ri dosa-dosaya, sollannu a'jari umma' matangkasa'Na Allata'ala. Le'ba' mako assibajiki ammotere' siagang Allata'ala lanri tappa'nu mae ri Batara Isa Almasi siagang lanri koasa Roh battu ri Allata'alata.

¹² Nia' tau angkana, “Yangaseng-ngasenna akkulleji nigaukang.” Mingka untu' inakke tena nayangasenna a'matu-matu kugaukang. Jari manna na'rupa-rupa apa-apa akkulle kugaukang, mingka tena nakuero' ampassareangi kalengku nikoasai ri apa-apa mamo.

¹³Nia' todong angkana, anjo kanrea untu' battang, siagang anjo battanga nipasadiai untu' napantamai kanre. Mingka anjo ruaya, iamintu kanrea siagang battanga lanipattaena ngasengi ri Allata'ala. Anjo batangkalea takkulleai nipake untu' a'gau' bawang, mingka untu' poro nipake allayani mae ri Batara. Na Batarami lamparakai anjo batangkalea.

¹⁴Le'ba'mi nipattallasa' poleang ammotere' Isa Almasi ri Allata'ala battu ri kamateanga; kammatommi anjo, laNapattallasa' poleang maki' ammotere' Allata'ala lanri kakoasanNa.

¹⁵Nuassemmi angkanaya anjo batangkalennu anggota batangkalenNa Almasi. Jari, maka akkullei kualle anjo anggota batangkalenNa Almasi, nampa kupa'jari anggota ri batangkalenna baine ja'dalaka? Tena sikali nakkulle!

¹⁶ Yareka tanuassengapi angkanaya inai-nai ampasiallei batangkalenna siagang baine ja'dalaka, a'jari se'remi batangkalenna siagang anjo baine ja'dalaka? Nasaba' nia' tattulisi' lalang ri Kittaka angkanaya, “Anjo ruaya a'jari se'remi.”

¹⁷Mingka inai-nai ampa'jari se'rei kalenna siagang Batara, assileo'mi RohNa Batara siagang rohna anjo taua.

¹⁸Pakabellai kalennu battu ri sikamma panggaukang bawanga. Nasaba' sikontu dosa maraenga nagaukanga taua, pantarangang batangkalennai anjo taua kajariang. Mingka inai-nai a'gau' bawang, battuanna a'gau' dosami mae ri kalenna.

¹⁹ Musti nuassengi angkanaya anjo batangkalennu pammantanganNa RohNa Allata'ala. Anjo RohNa Allata'ala ammantangi lalang ri kalennu. Kammayatompa KalenNa Allata'ala ampassareangi anjo RohNa mae ri kau. Anjo kalennu teaimi ikau pata, mingka Allata'ala pata.

²⁰Le'ba' mako Naballi Allata'ala, siagang lappasa'mi ballinnu. Lanri kammana, katutuimi anjo batangkalennu, sollanna akkulle nupa'matu-matu untu' ampakala'biriki Allata'ala.