Read Makassar Version – KITTA' MATANGKASA 1 KORINTUS 9 Bible Online

1 KORINTUS 9 - Makassar Version – KITTA' MATANGKASA bible

1 KORINTUS 9

¹Sai inakke tau bebasakka'? Sai inakke tunisuroNa' Allata'ala? Maka tenapa nakuciniki Isa, Batarata? Maka teaiko wassele' jama-jamangku untu' Batara?

²Punna padeng taeroka taua angngakuia' salaku tunisuroNa Allata'ala, kaminang sike'de'na ikau numangakui! Nasaba' a'jarinumo tu Karisteng, iami anjo a'jari butti angkanaya tunisuroNa memang tonga' Allata'ala.

³Punna nia' tau ancalla', iaminne pappialingku:

⁴Maka tena nakusiratang anggappa kanre siagang je'ne' inung lanri jama-jamangku?

⁵Maka tena nakusiratang angngerang sitau baine tu ri ballakku lalang lampaku, sangkamma nagaukanga sari'battanNa ngaseng Batara Isa, siagang tunisuroNa Allata'ala maraenganga, kammaya Petrus?

⁶Yareka inakkeji bawang siagang Barnabas musti amboya kale-kalei kaparalluang katallassangku?

⁷Tenanniakka tantara angngongkosi kale-kalei kalenna lalang ri tugasa'na! Tenanniakka tau a'lamung apa-apa natanakanrea anjo wassele' lamung-lamunna! Tenanniakka tau akkatuo sapi natakkullea nainung dadi' battua ri anjo sapi nakatuoa!

⁸Teai lanri battu ri pangalamang katallassang allo-alloa bawang anne kupabattua mae ri kau; passangalinna lanri kammatommi anjo nipaua lalang ri Kittaka.

⁹ Lalang ri Kitta' Musa nia' tattulisi' kammaya anne, “Teako jempangi bawana sapi masarroa nupake akkareso.” Maka sapia nataba anne kananNa Allata'ala?

¹⁰Yareka ikatte nataba? Memang untu' ikatte anjo niaka tattulisi'. Nasaba' inai-nai anjama koko siagang antangkasi anjo kokoa, siratang memang tongi anjo taua ma'minasa langgappa bageang battu ri wassele' jama-jamanna ri anjo kokoa.

¹¹ Jari ikambe anne le'ba' maki' sanrapang appakioro' bine rohani ilalang ri katallassannu ngaseng. Na punna anggappa ikambe barakka' pa'barang-barangang battua ri kau ngaseng, maka nukana jai dudumi natuntu' ikambe battu ri kau ngaseng?

¹²Punna nia' ha'na tau maraenga amminasai anne battu ri kau ngaseng, maka tena nala'bi niakkangang ha'na ikambe na ke'nanga? Mingka inakke tenapa nakupakei anjo ha' kammaya. Nasaba' la'bi kungaiangangi kalengku antanggong ngasengi anjo sikammaya naia appa'niaka kasukkarang, akkullea anghalangi pa'la'banganna Kabara' Bajika ri passala'na Almasi.

¹³ Tantu nuassemmi angkanaya inai-nai anjama lalang ri Balla'Na Allata'ala, battu anjoremmi ri Balla'Na Allata'ala anggappa kanre ke'nanga. Siagang inai-nai angngurusuki tampa' pakkoro'bangnganga, anggappa tongi bageang battu ri anjo koro'bang nipassareanga anjoreng.

¹⁴ Kammatommi anjo, le'ba'mi Napattantu Batara angkanaya inai-nai ambirittakangi anjo Kabara' Bajika, musti nisarei kaparalluang katallassanna lanri anjo biritta napa'la'banga.

¹⁵Mingka manna nakamma, inakke tenale'bakapi kupake manna sirupa anjo ha' kammaya. Siagang punna kutulisi' anne suraka mae ri kau ngaseng, teai lanri erokku sollanna nupassareang anjo sikammaya sumpaeng mae ri nakke. Nasaba' erokanganga' matea naia tappelaka sirikku lanri passabakkang kammaya anjo sumpaeng.

¹⁶Nasaba' takkullea' ampakatinggi pa'maikku punna passabakkang iaja anjo kubirittakanna Kabara' Baji' battua ri Allata'ala; nasaba' Allata'ala assuroa' anggaukangi anjo jama-jamanga. Cilakama' kusa'ring punna tena nakubirittakangi anjo Kabara' Bajika!

¹⁷Ebara' angkana battu ri ero' kalengku nakugaukang anjo jama-jamanga, akkulle memanga' attayang gaji. Mingka iaji nakubirittakang anjo Kabara' Bajika lanri nisuro memang tonga'. Allata'ala assarea' tugasa' anggaukangi anjo jamanga.

¹⁸Jari punna kamma apa passawallangku? Iaminne passawallangku: angkanaya akkullei kubirittakang anjo Kabara' Bajika, natena manna sitau kubattali untu' angngongkosia', lanri tenana nakutuntuki anjo ha' siratanga ri nakke salaku tau ambirittakangai anjo Kabara' Bajika.

¹⁹Inakke anne tena manna sitau ampare' ata'; inakke tau bebasakka'. Mingka manna nakamma, kupa'jari atami kalengku mae ri tau jaia. Naiaji kuappakamma anjo sollanna pila' jai tau akkulle kuerang mae ri Almasi.

²⁰Kupa'jari kalengku sanrapang tu Yahudi mae ri tu Yahudia, sollanna akkulle kuerang tu Yahudia mae ri Almasi. Kupa'jari kalengku sanrapang tau mannurukia ri hukkunna Allata'ala napabattua Musa mae ri tu attallasaka situru' hukkung napabattua Musa; manna sikontutojenna natenaja kutassikko' ri anjo hukkunga. Naiaji kuappakamma anjo, sollanna akkulle kuerang tau kammaya ngaseng anjo mae ri Almasi.

²¹Kupa'jari kalengku sanrapang teaia' tu Yahudi, tenaya natarimai hukkung napabattua Musa. Mingka tena nakutamannurukia ri hukkung-hukkunNa Almasi. Iaji kuappakamma anjo sollanna akkulle kuerang tau kammaya ngaseng anjo mae ri Almasi.

²²Kupa'jari kalengku sanrapang tau tenaya najarre' tappa'na ri tangnga-tangngana tau tenaya najarre' tappa'na, sollanna akkulle kubeso' ke'nanga a'jari tumminawang ri Almasi. Bodona kana, kupa'jari kalengku sanrapang apa-apa mamo, sollanna a'rupa-rupai carana nakkulle kuerang taua mae ri Almasi nanipasalama'.

²³Iaji nakugaukang ngaseng sikammaya anjo, sollanna akkulle kupa'la'bang Kabara' Baji' battua ri Allata'ala, kammayatompa sollanna kunibarakkaki todong.

²⁴Tantu nuasseng ngasenji angkanaya punna appa'lumba taua, para lari ngasengi anjo tau appa'lumbaya; mingka se'reji langgappa hadia. Lanri kammana, usahakammi antekamma batenu lari sollanna nugappa anjo hadiaya.

²⁵Inai-nai a'latihang, musti naparrangngipi kalenna ri sangka' rupaya apa-apa. Naia naappakamma anjo lanri ero'na nipakalongi bunga pammetang, iamintu bunga akkullea kalumeng. Mingka ikatte anne niparrangngi kalenta ri sangka' rupaya lanri erotta nipakalongi bunga tenaya nakkulle kalumeng.

²⁶Lanri kammanami anjo nakulari mae ri tampa' attantua tujunna. Alarapanna punna attandinga' a'bossere', tena nasambarang bateku anja'guru'.

²⁷Kupassareangi kalengku nilati terasa' sa'gengku akkulle a'jari kassa'. Ia nakuappakamma anjo sollanna tena nakajariang angkanaya inakke angkioki taua amminawang appa'lumba nakalengku nisorongboko.