Read Makassar Version – KITTA' MATANGKASA 2 KORINTUS 13 Bible Online

2 KORINTUS 13 - Makassar Version – KITTA' MATANGKASA bible

2 KORINTUS 13

¹ Iaminne makapintallungku battu angkunjungiko. Nia' tattulisi' lalang ri Kittaka angkanaya, “Punna nia' parkara musti nia' rua yareka tallu tau a'jari sa'bi nampa a'jari assa anjo parkaraya.”

²Sikamma tau le'baka a'gau' dosa ri wattu allaloa, le'ba'mi kupakainga' pirangalloang, ri wattungku makapinruang battu angkunjungiko. Kamma-kamma anne, ri wattu sikabellainta, kupakainga' poleang mako angkanaya punna battua' pole sallang, tena manna sitau ri ke'nanga lata'lappasa' battu ri hukkunganga.

³Jari lanucini'mi butti nukaerokia angkanaya ma'nassa a'bicara tojeng-tojengi Almasi tete ri kalengku. Punna Nahukkungko Almasi, tena nalamma, passangalinna laNapappicinikangi kakoasanNa ri tangnga-tangnganu.

⁴Memang, ri wattunna nisalli' lammai; mingka kamma-kamma anne attallasa' poleammi lanri kakoasanNa Allata'ala. Ikambe tulamma tonjaki' lalang assileo'na katallassanta siagang Almasi; mingka punna sidallekangki' siagang ikau ngaseng, a'jari majarre' tommaki' lanri koasaNa Allata'ala.

⁵Coba sai paressa kalennu, maka attallasa' tojeng-tojeng mako situru' matappa'nu mae ri Almasi? Ma'nassa langngu'rangiko angkanaya niaki Isa Almasi lalang ri kalennu! Simmaraengi punna tena nutappa' tojeng-tojeng.

⁶Kuminasai nanuasseng angkanaya ikambe anne teaiki' tau akkullea antahangi paccobaya.

⁷Appala' doangki' mae ri Allata'ala sollannu Natulung, natena nugaukangi salaya. Teai lanri erotta ampappicinikangi angkanaya ikambe anne tau cara'dekki' anjama-jama. Mingka sollanna nugaukang ero'Na Allata'ala — manna nakamma nucini' tena wassele' jama-jamanna ikambe. Tena nangngapa-apa!

⁸Nasaba' manna sike'de', takkulleaki' anggaukangi apa-apa tenaya Nakaerokangi Allata'ala; musti nigaukangi ero'Na Allata'ala.

⁹Rannu maki', punna ikambe lamma na ikau majarre'. Appala' doangki', sollannu a'jari sukku' baji' ri tallasa'nu.

¹⁰Iaminjo saba'na nakutulisi' anne suraka, lalang tenanapa nakunia' ri tangnga-tangnganu. Jari, punna battua' sallang, tenamo naparallu kupake katerassanga mae ri kau siagang kakoasang Napassareanga Batarata mae ri nakke. Anjo kakoasanga Napassareangi mae ri nakke Batara untu' ambangungko. Teai untu' lanruntungko.

¹¹Kala'busang kana, sari'battangku ngaseng, paralluko a'rannu-rannu, siagang usahakangi nu'jari sukku'. Tarima ngasemmi pappakaingakku. Paralluko a'julu ati siagang assiama' lalang tallasa'nu. Allata'ala Kaminang Mangngarimangngia siagang mappasiamaka lanrurungangko.

¹²Massing sipasalamakko nusikajarreki salaku tu Karisteng assari'battanga. Appikatui sallang sikontu Umma'Na Allata'ala mae ri kau ngaseng.

¹³Poro Nabarakkakiko Batara Isa Almasi, naNakarimangngiko Allata'ala, kammayatompa Narurungang ngasengko RohNa Allata'ala! Sallangku, Paulus