Read Makassar Version – KITTA' MATANGKASA 2 KORINTUS 2 Bible Online

2 KORINTUS 2 - Makassar Version – KITTA' MATANGKASA bible

2 KORINTUS 2

¹Lanri kammanami anjo nale'ba'mo kutappuki angkanaya tenamo nakulabattu poleang angkunjungiko sa'genna a'jari si'na pa'mai'nu.

²Nasaba' punna kupakasi'na pa'mai'nu, inaimi lakkulle ansaleoria', punna teai anjo tau le'baka kupakasi'na pa'mai'na?

³Iaminjo saba'na nakutulisi' anne suraka mae ri kau. Taeroka' angkunjungiko, nampa nupakasi'na pa'maikku. Sikontutojenna musti nupakarannui pa'maikku. Nasaba' tappaka' angkanaya punna rannua', amminawang ngaseng todong mako rannu.

⁴Sanna' si'nana siagang sanna' battala'na pa'maikku, kammayatompa ammatti'-mattiki je'ne' matangku ri wattunna kutulisi' anne suraka. Mingka teai lanri kukellainu si'na nakupau anne, passangalinna sollanna akkulle nuasseng angkanaya sanna' ngaseng kukarimangnginnu.

⁵Punna nia' tau a'jari passabakkang ri anne si'naya, teai kalengku bawang napitujui, mingka ikau ngaseng, yareka kaminang sike'de'na attawa ruako napitujui. Anne kulammai sike'de' bicarangku mae ri anjo taua.

⁶Anjo tau kammaya angganna'mi hukkungang nagappaya ri tangnga-tangnganu.

⁷Anne kamma musti nupammopporammi, siagang parallui nupakajarre' pa'mai'na sollanna tena nasi'na dudu pa'mai'na sa'genna tappu' panrannuang.

⁸Jari kupalaki ri kau ngaseng, sollanna nupappicinikang pole mae ri ia, angkanaya ma'nassa sanna' tojeng nukarimangnginna.

⁹Nakukiring anne suraka mae ri kau, lanri ero'na kuasseng angkanaya maka ero' jako tuli anturuki apa-apa kupaua mae ri kau.

¹⁰Punna nupammopporang tau le'baka kasalang mae ri kau, inakke pole kupammopporang tongi anjo taua. Nasaba' apa le'baka kupammopporang — punna nia' memang todong parallu nipammopporang — kupammopporangi ri dallekanNa Almasi, untu' kabajikannu ngaseng.

¹¹Nakugaukang anjo kammaya, sollanna takkullea Billisika anggappa kasampatang angkoasaiki'; nasaba' niassemmi sikamma ero'na anjo Billisika.

¹² Ri wattungku battu mange ri Troas ero' ambirittakangi Kabara' Baji' ri passala'na Almasi, Nasungkeamma' oloang Batara anggaukangi anjo jama-jamanga anjoreng.

¹³Mingka tena nasannang nyawaku, nasaba' tena nakusibuntulu' siagang sari'battanta Titus anjoreng. Jari appala' kanama' mae ri taua anjoreng, nampa annarrusu' a'lampa mange ri butta Makedonia.

¹⁴Mingka appala' sukkurukki' mae ri Allata'ala! Lanri Iami tuli ampimpingi ikambe amminawang lalang ri barrisi' passua'-suarrang pammetanNa Almasi lanri asse'rena ikambe mae ri Ia. Nipakemi ikambe ri Allata'ala ampa'la'bangi biritta ri passala'na Almasi, sanrapang bau' a'la'banga rasanna ri kere-keremae.

¹⁵Nasaba' ikambemi sanrapang kamanynyang mabauka rasanna, nitunua ri Almasi untu' mae ri Allata'ala. Ri tau a'jappa mangea ri possoka, ikambe anne sanrapangki' a'rasa botto' angngeranga kamateang; mingka ri tau nieranga mange ri kasalamakkanga, sanrapangki' rasa mabau' angngeranga katallassang. Jari, maka inai akkulle anggaukangi anne jamanga?

¹⁷Ikambe tena kisangkamma taua, ampare' kammai danggangang biritta battua ri Allata'ala. Ikambe ci'nongi pattujunta, nasaba' Allata'ala assareki' jama-jamang. Siagang KalenNa Allata'ala anciniki angkanaya nipa'jari atanNami Isa kalenta ampabattui anjo birittaya.