Read Makassar Version – KITTA' MATANGKASA 2 KORINTUS 4 Bible Online

2 KORINTUS 4 - Makassar Version – KITTA' MATANGKASA bible

2 KORINTUS 4

¹Lanri pangngamaseanNa Allata'ala nakkulle nagaukang ikambe anne jama-jamanga. Iaminjo saba'na natena natappu' panrannuang ikambe.

²Tena nakiaccokko-cokko siagang tena nakiappakasiri' bateta anggaukangi anne jama-jamanga. Tena nakiero' jekkong anggaukangi anne jama-jamanga, yareka tena nakiero' amputara' baleki kananNa Allata'ala. Silambusu'na bawang ero'Na Allata'ala nabirittakang ikambe. Lanri kammana, naminasai ikambe nanabilang baji' ngaseng ri pa'mai'na taua anjo apa nagaukanga ikambe.

³Punna tena ijapa napahangi taua anjo Kabara' Baji' nabirittakanga ikambe, tau eroka mamo a'lampa mange ri possoka takkullea ampahangi.

⁴Barhala ja'dala' niaka ri lino antongkoki pikkiranna tau tenaya natappa' ri anjo Kabara' Bajika. Iaminjo barhalaya anrompa-rompai ke'nanga sollanna tanacinika singara' battua ri anjo Kabara' Bajika, ri sese kalompoanNa Almasi, a'jaria pammatei rupanNa Allata'ala.

⁵Anjo biritta napabattua ikambe teai biritta ri sesena ikambe. Anjo birittaya, biritta ri sesena Isa Almasi, angkanaya Iami Batara; na ikambemi anne a'jari atannu ngaseng lanri Isa.

⁶ Nakana Allata'ala, “Nikellai ammumba singaraka battu lalang ri sassanga,” na KalenNa tommi Allata'ala ampamumbai anjo singaraka lalang ri atinta, sollanna a'jari singara' pikkiranta, nakkulle nipahang caya malompoNa Allata'ala niaka accaya ri rupanNa Almasi.

⁷Mingka anjo pa'barang-barangang rohani ga'gaya, ikambemi anne angngerangi, iami antu tubu tenaya anggaranna lanri buttaji nipare'. Lanri kammana, ma'nassami angkanaya anjo koasa malompoa niaki ri Allata'ala, jari tena nania' ri kambe.

⁸Sanrapang nibundukimi ikambe battu ri kere-keremae, mingka tena nakasepekang ikambe. Kala'busang akkala' maki', mingka tena nitappu' panrannuang.

⁹Jai tau ammusuki', mingka tena nakile'ba' nibokoi kale-kalenta. Siagang manna ki'mole-mole sanrapang nipatappasa' naung ri buttaya, mingka tena nakikkulle mate.

¹⁰Tuli niaki nikasia' kamateanNa Isa ri kalenna ikambe. Sollanna a'nyata todong katallassanNa ri tubuna ikambe.

¹¹Ilalang ri tallasa'na ikambe, tuli niondangi ikambe ri kamateanga lanri Isa, sollanna ilalang ri kammana anjo na'batemo katallassanNa Isa ri anne kalenna ikambe akkullea mate.

¹²Iami anne a'jari pammatei angkanaya niaki a'gio' kamateanga lalang ri tubuna ikambe; mingka rannui pa'mai'na ikambe lanri nia'na katallassanga a'gio' lalang ri massing tubunu.

¹³ Nia' lalang ri Kittaka angkanaya, “Lanri tappakku, iaminjo saba'na naku'bicara.” Jari, lanri tappa' lompo kammaya tomminjo na'bicara todong ikambe lanri tappa'na ikambe.

¹⁴Tappa'mi ikambe angkanaya le'ba'mi nipattallasa' poleang ammotere' Isa ri Allata'ala; jari tappa' tommi ikambe angkanaya lanipattallasa' tommi ikambe tete ri Isa. Na Iami langngerang ngasengki' mange ri dallekang mala'biri'Na.

¹⁵Yangasenna anjo, untu' kaparalluannu ngaseng. Nasaba' punna pila' jai tau angkasiaki pangngamaseanNa Allata'ala, pila' jai tommi pappala' sukkuru' nipanai' ri Allata'ala; jari nipakala'biri'mi Allata'ala.

¹⁶Lanri kammanami anjo natena natappu' panrannuang ikambe. Manna pole pila' panra' katallassang lahere'na ikambe, mingka tuli beruna allo-allo katallassang lalanga ri atinna ikambe.

¹⁷Na anne kasusaang tenaya nasiapa jaina, le'baka nakasia' ikambe siagang tenaya nasiapa sallona, iami langngerang wassele' katallassang mate'nea, wassele' sannaka lompona anggaranna siagang akkullea mannannungang. Bella lompona anjo kate'neanga na anjo kasusaanga ri kamma-kammaya anne.

¹⁸Nasaba' teai apa-apa kacinikanga napacciniki ikambe, passangalinna apa-apa tenaya nakacinikang. Anjo apa-apa kacinikanga poro sinampe'ji akkulle attahang; mingka anjo apa-apa tenaya nakacinikang attahangi sa'genna satunggu-tungguna.