Read Makassar Version – KITTA' MATANGKASA 2 KORINTUS 6 Bible Online

2 KORINTUS 6 - Makassar Version – KITTA' MATANGKASA bible

2 KORINTUS 6

¹Lanri assiaganNa Allata'ala ikambe anggaukangi anjo jama-jamanga, iami anjo nanapala' tojeng-tojemmo ikambe sollanna tena nanubawang-bawangangi anjo kabajikang pa'mai'Na Allata'ala.

² Nakana Allata'ala lalang ri Kittaka, “Ri wattu pangngellaingKu, Kupilangngerimi pappala'nu, siagang ri wattu allo kasalamakkanga, Kupasalama' mako.” U'rangi baji'-baji'! Iaminne wattua, wattu pangngellaiNa Allata'ala. Kammayatompa iaminne alloa, allo pappasalama'Na Allata'ala.

³Taerokai ikambe angkanaya nibilang salai palayanang nagaukanga ikambe. Jari usahami ikambe sollanna tena manna sitau akkulle ampasalai jama-jamang nagaukanga ikambe.

⁴Jari ilalang ri sikontu apa nagaukanga ikambe napa'nyatami ikambe angkanaya ikambe anne atanNaki' Allata'ala. A'rupa-rupami kasukkarang le'ba' nakasia' ikambe siagang sa'bara':

⁵ nisessa maki', nitarungku maki', siagang niborongi maki' niba'ji; anjama terasa' maki', masarro maki' tattinroa, kammayatompa masarro tommaki' tamangnganrea.

⁶Tulusu' pa'mai' maki', mangngasseng baji' maki', sa'bara' maki', kammayatompa baji' pa'mai' maki' mae ri kau ngaseng, sollanna nuasseng angkanaya ikambe anne ma'nassa atanNaki' Allata'ala. Kammayatompa tanjeng maki' mae ri Roh pannulunNa Allata'ala, mangngamaseang maki' situlusu' pa'maitta;

⁷lalang koasaNa Allata'ala nanibirittakang kabara' battua ri Allata'ala; na lanri kammanami anjo nanapappicinikammo ikambe angkanaya ikambe anne ma'nassa atanNaki' Allata'ala. Anna'gala' jarre' maki' mae ri ero'Na Allata'ala. Iaminjo a'jari kagassinganna ikambe untu' langngewa yareka lanjagai kalenta punna battu mae musu lammanrakia.

⁸Nipakala'birikki' mingka nihina tongki'; nipujiki' mingka nipa'boyang tongki' kodi. Manna kilambusu' pa'mai', nipakkanai tonjaki' paballe-balle.

⁹Nikanamo tau tena angngassengki', mingka niasseng ngasengki' ri tau jaia. Nikana mate maki', mingka ma'nassa attallasa' ijaki'. Manna kinisessa, mingka tamateajaki'.

¹⁰Manna nanipakasi'na pa'maitta, mingka tuli rannujaki'. Kasi-asi maki' nicini', mingka jaimi tau nipa'jari kalumanynyang. Tena nicini' apa-apanta, mingka sikontutojenna nia' ngasemmi ri katte sikontu apa-apaya.

¹¹Sikamma sari'battang kukarimangngia ri Korintus! A'bicara maki' silambusu'na mae ri kau ngaseng. Sikontu bonena atinta nipauang ngaseng mako.

¹²Nasungke luara'mi atinna ikambe mae ri kau, mingka ikau ngaseng mami antongkoki atinnu mae ri kambe.

¹³Jari boli'mi kamma naku'bicaramo mae ri kau sanrapang mae ri ana' kalengku. Kupalaki sollanna nusungke tommo atinnu mae ri kambe, sangkamma nasungkenamo atinna ikambe mae ri kau.

¹⁴Teako eroki sipa'rappungang siagang tau tenaya naero' tappa' mae ri Isa; tena nacoco' anjo kammaya. Antekamma olona lakkulle a'jari se're kabajikanga siagang kaja'dallanga? Tena olona lakkulle a'jari se're singaraka siagang sassanga.

¹⁵Tena olona lakkulle assamaturu' Almasi siagang Billisika. Apa sangkammanna tu Karistenga siagang tu tenaya na Karisteng?

¹⁶ Apa passisambunganna Balla'Na Batara siagang balla'na barhalaya? Ikattemi anne sanrapang Balla'Na Batara, iamintu Allata'ala attallasaka. KalenNa Allata'ala angkana, “LammantangA' ri tangnga-tangngana ke'nanga, na Kusikatallassang siagang ke'nanga. La'jariMa' Allata'ala mae ri ke'nanga, na la'jarimo ke'nanga ummakKu.

¹⁷ Lanri kammana, bokoimi anjo tau tenaya namangngasseng ri Allata'ala, siagang pakabellami kalennu battu ri ke'nanga. Tea' laloko sikarapiki siagang apa-apa ra'masaka, nampa Kutarimako mae ri KalengKu.

¹⁸ La'jariMa' Manggenu, nula'jari ana'-anakKu, kammami anjo kananNa Batara Kaminang Makoasaya.”