Read Makassar Version – KITTA' MATANGKASA GALATIA 1 Bible Online

GALATIA 1 - Makassar Version – KITTA' MATANGKASA bible

GALATIA 1

¹Natarimai sikamma sari'battanga, iamintu jama'ah-jama'ah niaka ri sikontu butta Galatia. Battu ri nakke Paulus kammayatompa sikamma tu Karisteng niaka kuagang anrinni; ma'minasaki' nuporo nibarakkaki siagang nisare ngaseng katallassang salewangang battu ri Allata'ala Manggea, siagang battu ri Almasi. Inakke, teai tete ri rupataua nakuniangka' a'jari tunisuroNa Allata'ala; passangalinna tete ri Isa Almasi, siagang Allata'ala Manggeta le'baka ampabangung poleangi Almasi battu ri kamateanga.

⁴Napassareammi KalenNa Almasi a'jari koro'bang untu' dosa-dosata, lanri Naturukinna ero'Na Allata'ala Manggeta. Sollanta akkulle nipasalama' battu ri anne jammang kaja'dallanga.

⁵Nipujimi Allata'ala sa'genna satunggu-tungguna. Aming.

⁶Lannasaka' mae ri kau ngaseng sari'battang! Nasaba' le'ba' mako nikio' ri Allata'ala lanri pangngarimangnginNa tete ri Almasi. Mingka kamma-kamma anne teai sipato' linta'nu ambokoi Allata'ala. Amminawangko mae ri “kabara' baji'” maraengannaya na Kabara' Baji' battua ri Allata'ala.

⁷Sikontutojenna tena “kabara' baji' maraeng”. Mingka nia'naji bawang siapa are tau ambirittakangi mae ri kau “kabara' baji'” ri sesena Almasi, nanaputara' bale' anjo kabaraka sa'gennu nipa'jari lingu.

⁸Lappassammi nihukkung ri Allata'ala anjo tau ambirittakangai “kabara' baji'” simmaraenga siagang Kabara' Baji' nabirittakanga ikambe. Manna pole na ikambe anjo taua, yareka malaeka' battu ri suruga!

⁹Le'ba'mi kupau pirangalloang, nakamma-kamma anne sikalipi pole kupau angkanaya: Anjo tau ambirittakangai mae ri kau “kabara' baji'” simmaraenga siagang Kabara' Baji' le'baka nutarima battu ri kambe, anjo tau kammaya musti nihukkungi ri Allata'ala!

¹⁰Punna kamma, gassingka nukana kuminasai sollangku niakui ri rupataua? Tena sikali! Allata'ala bawang kuminasai angngakuia'. Maka erokkuji ningai ri rupataua nakualle pa'mai'na? Punna kamma anjo bateku, teaiya' tunisuroNa Almasi.

¹¹Musti nuassengi angkanaya anjo Kabara' Baji' kubirittakanga, teai kabara' battu ri rupataua.

¹²Tena nabattu ri rupataua kutarima anjo kabaraka. Siagang tena manna sitau ampangngajarrangi mae ri nakke. KalenNa Isa Almasi ansungkei bonena anjo Kabara' Bajika mae ri nakke.

¹³ Tantu le'ba'mi nulangngere' katallassangku pirangalloang salaku tu tappa' ri agama Yahudia. Nuassengi antekamma sekke'na panggaukangku mae ri jama'aNa Allata'ala. Siagang antekamma terasa'na usahaku ero' angngancuruki ke'nanga.

¹⁴ Ri passala'na anggaukangai pangngajaranna agama Yahudia, inakkemi kaminang la'bi ri sikontu tu Yahudi sanrungka-rungkaku. Inakkemi kaminang rajeng angkatutui ada'na boe-boena ikambe.

¹⁵ Mingka lanri baji' atiNa Allata'ala, Napile memamma' ri wattu tenanapa nakunilassukang. Siagang Nakio'ma' untu' a'jari palayang mae ri Ia.

¹⁶Napappiassengammi Ana'Na Allata'ala mae ri nakke; sollanna akkulle kubirittakang anjo Kabara' Baji' ri sesena Ana'Na, mae ri bansa-bansa maraenga. Anjo wattua tena ku'lampa appala' pappitangara' manna ri nai.

¹⁷Tena todong nakumange ri tau niaka ri Yerusalem, rioloanganga na inakke a'jari suroNa Allata'ala. Mingka a'lampa' mange ri butta Arab, nampa battu anjorenga' nakuammotere' mange ri Damsyik.

¹⁸ Tallun taung ribokoanganna, a'lampama' mange ri Yerusalem, ero' assiasseng siagang Petrus. Ammantamma' siagang ia sampulo allima allonna.

¹⁹Tena nakusigappa siagang sikamma suro maraenganga, pantaranganna Yakobus, sari'battanNaya Batara.

²⁰Anne kutulisika apa kontutojeng. Naassengi Allata'ala angkanaya tena ku'balle-balle!

²¹Le'baki anjo a'lampa' mange ri daera-daera Siria siagang Kilikia.

²²Sa'genna anjo wattua tenapa naassengi tanjakku sikamma jama'ah Karisteng niaka ri Yudea.

²³Nampami kabara' nalangngere' ke'nanga angkana, “Anjo tau le'baka ansessaki' riolo, iami ambirittakangi anjo katappakkang le'baka ero' nabuno riolo.”

²⁴Jari, ammuji-mujimi ke'nanga ri Allata'ala, passabakkang inakke.