Read Makassar Version – KITTA' MATANGKASA GALATIA 2 Bible Online

GALATIA 2 - Makassar Version – KITTA' MATANGKASA bible

GALATIA 2

¹ Sampulo angngappa' taung ribokoanganna, ammotere'ma' mange ri Yerusalem siagang Barnabas, kammayatompa nakuerang todong Titus.

²A'lampa' mange ri Yerusalem, nasaba' le'baka' Nasare pappiso'na Allata'ala, angkanaya musti a'lampa'. Na lalang se're passirapakkang siagang pamimping-pamimpinga anjoreng, kupakasingariammi ke'nanga anjo Kabara' Baji' le'baka kupabattu mae ri bansa-bansa maraenga. Nasaba' tena nakuero' punna a'jari sia-sia anjo usahaku riolo siagang ri kamma-kammaya anne.

³Anjo Titus, kuaganga sipa'lampang, tu Yunani. Mingka tena nanipassai anturuki paratoranna sunnaka;

⁴manna pole nakamma nia' siapa are tau ero' ansuro passai. Anjo ke'nanga tau antama' cokko-cokko ri golonganta, assara-sarai a'jari sari'battang siagang ikatte. Antama' cokko-cokkoi ke'nanga lanri eroki nasalidiki kabebasanta ikatte tau assileoka katallassanta lalang ri Isa Almasi. Eroki ke'nanga ampoterangki' ammotere' mange ri katallassanta riolo, a'jari ata.

⁵Mingka manna sike'de', takkuleaki' anturukiangi ero'na ke'nanga, nasaba' erokki' angkatutui anjo Kabara' Bajika, sollanna tuli majarre' ri kau ngaseng.

⁶ Mingka manna nakamma, tena apa-apa maraeng lakkulle napala' tau nipakala'birika mae ri nakke — untu' inakke tena simmaraenna tau nipakala'birika yareka tena, nasaba' tena Napasimmara'-maraengi Allata'ala rupataua.

⁷Ba'lalo anjo nicini' tu nipakala'birika namangakuimi angkana Allata'ala assuroa' ambirittakangi anjo Kabara' Bajika mae ri bansa-bansa maraenga. Sangkamma todong Iami assuroi Petrus ambirittakangi anjo Kabara' Bajika mae ri bansa Yahudia.

⁸Nasaba' Allata'ala assarei pakkulle Petrus a'jari tunisuroNa mange ri bansa Yahudia. Iatommi assarea' pakkulle a'jari tunisuro mange ri bansa-bansa maraenga.

⁹Anjo Yakobus, Petrus, siagang Yohanes a'jari pamimpinga mae ri jama'ah-jama'aka; namangakui ke'nanga angkana ma'nassa Allata'ala assarea' anne jama-jamang matangkasaka. Jari assijamakkimi ke'nanga siagang Barnabas, na inakkemi a'jari pammateina anjo passari'battanganga. Nampa assamaturu' ngasemmo ke'nanga siagang ikambe angkanaya ikambemi lanjama ri tangnga-tangngana bansa-bansa maraenga, na ke'nanga lanjama ri tangnga-tangngana bansa Yahudia.

¹⁰Se'reji bawang pappala'na ke'nanga mae ri kambe, iamintu parallui niparhatikang tu kasi-asia. Na inakke teai sipato' sannanna nyawaku anggaukangi anjo kammaya.

¹¹Ri wattunna battu Petrus ri Antiokhia kupakaingaki silambusu'na, lanri salai batena appanggaukang.

¹²Uru-uruna ammempoi sipangnganreang siagang sari'battang battua ri bansa maraenga. Mingka ri wattunna nia' battu tau nasuroa Yakobus, napakabellami kalenna battu ri anjo sari'battang battua ri bansa maraeng. Taerokami ammempo sipangnganreang siagang ke'nanga, nasaba' mallaki mae ri tau eroka assuro sunna' ngasengi taua.

¹³Amminawang turu' tommi sari'battang tu Yahudi maraenga a'jari munape' sangkamma Petrus. Sa'genna manna Barnabas kuturu'-turukang todong a'gau' kamma ke'nanga.

¹⁴Kucini'na ke'nanga appakamma gio'na lalang ri anjo katojenganna Kabara' Bajika, kukanamo mae ri Petrus ri dallekanna ngaseng tau niaka hadere' anjoreng, “Punna ikau tu Yahudiko mingka sangkammami gio'nu siagang bansa maraenga, angngapa nanupassa kamma-kamma anne tau maraenga a'jari sangkamma tu Yahudia ri katallassanna?”

¹⁵Memang, battu ri kalassukanta ikambe tu Yahudiki'; teai “bansa maraeng, iamintu bansa dorakaya”.

¹⁶ Mingka niassengi angkanaya lanri tappa'na taua mae ri Isa Almasi nakkulle assibajiki ammotere' siagang Allata'ala; teai lanri nagaukanna hukkung-hukkung agamaya. Ikambe pole, tappa' tommaki' mae ri Isa Almasi; sollanta akkulle assibajiki ammotere' siagang Allata'ala tete ri anjo matappatta. Jari teai lanri kigaukanna hukkung-hukkung agamaya. Nasaba' tena manna sitau lakkulle assibajiki ammotere' siagang Allata'ala lanri nagaukanna hukkung-hukkung agamaya.

¹⁷Usahaki' assibajiki ammotere' siagang Allata'ala, tete ri assileo'na tallasatta siagang Almasi. Mingka punna nigaukammo anjo kammaya nituli “tu doraka” ija sangkamma bansa-bansa maraenga, maka Almasimi a'jari saba' ni'jari tu doraka? Tantu tena!

¹⁸Punna appakkaramula kupaenteng ammotere' hukkung agama le'baka kuruntung, ma'nassami ri kalengku angkana a'jarima' tu mandakkai hukkung agama.

¹⁹Mingka le'ba'ma' mate mae ri hukkung-hukkung agamaya — iaminjo hukkung agamaya ambunoa' — sollangku akkulle attallasa' untu' Allata'ala. Le'ba'ma' nipasisalli' siagang Almasi.

²⁰Kamma-kamma anne teaimi kalengku attallasa' mingka Almasi attallasa' ri kalengku. Anne katallassang niaka ri nakke kamma-kamma anne, iamintu katallassang matappa' mae ri Ana'Na Allata'ala, mangngamaseanga ri nakke, siagang le'baka angkoro'bangkangi KalenNa untu' katallassangku.

²¹Tena nakubalang parekangi anne pangngamaseanNa Allata'ala. Punna a'jari baji' ammotere' passisambunganna taua siagang Allata'ala lanri nagaukanna hukkung-hukkung agamaya, a'jari tenamo matu-matunna kamateanNa Isa mae ri kalenna!