Read Makassar Version – KITTA' MATANGKASA GALATIA 3 Bible Online

GALATIA 3 - Makassar Version – KITTA' MATANGKASA bible

GALATIA 3

¹Sikamma sari'battangku niaka ri Galatia! Teai sipato' dongo'nu. Maka inai le'ba' angngajara' salako? Le'ba'mi kupakasingara' baji'-baji' mae ri kau battuanna anjo kamateanNa Almasi ri kayu sallika!

²Pauanga' bedeng anne se'rea passala': Maka lanri nugaukanna hukkung-hukkung agamaya nakkulle nutarima RohNa Allata'ala? Yareka lanri nulangngere'na Kabara' Baji' battua ri Allata'ala siagang lanri tappa'nu mae ri Almasi?

³Angngapa nudongo' kamma! Appakkaramula mako attallasa' lalang ri katallassang berua siagang RohNa Allata'ala; angngapa naero' nuboya kasukkukanna siagang kagassingang kalennu?

⁴Maka tena matu-matunna anjo apa le'baka nutarima? Tena na sia-sia!

⁵Allata'ala assareko RohNa, naNapappicinikang gau'-gau' makoasaNa ri tangnga-tangnganu. Maka lanri nugaukanna hukkung-hukkung agamaya, naNagaukang Allata'ala anjo kammaya? Yareka lanri nulangngere'namo anjo Kabara' Bajika siagang lanri tappa'numo mae ri Almasi?

⁶ Kammami anjo tattulisika lalang ri Kittaka ri sesena Abraham, angkanaya, “Tappaki Abraham mae ri Allata'ala. Na lanri anjo tappa'na, nitarimami ri Allata'ala a'jari tau nikarannuang ri atinNa Allata'ala.”

⁷ Jari parallui nuasseng baji' angkanaya, inai-nai tappa' mae ri Allata'ala, iami ma'nassa sossoranna Abraham.

⁸ Le'ba' memammi nipau lalang ri Kittaka angkanaya akkullei assibajiki ammotere' bansa maraenga siagang Allata'ala punna tappa' ke'nanga mae ri Ia. Le'ba'mi nipauang la'bi riolo Abraham anjo Kabara' Bajika ilalang ri janji angkanaya, “Battu ri kaumi nalaNabarakkaki Allata'ala sikontu rupataua ri lino.”

⁹Tappa'mi Abraham, jari nibarakkakimi. Kammatommi anjo sikontu rupataua. Punna tappaki, lanibarakkaki siagang Abraham.

¹⁰ Sikamma tau tanjenga mae ri hukkung-hukkung agamaya, laniparawa ngasengi ri pangngalarroiNa Allata'ala. Nasaba' nia' tattulisi' lalang ri Kittaka angkanaya, “Inai-nai tena najarre' anggaukangi apa-apa tattulisika lalang ri Kitta' Hukkung Agamaya, langgappai pangngalarroi battu ri Allata'ala!”

¹¹ Tenanniakka manna sitau akkulle assibajiki siagang Allata'ala, lanri nagaukanna hukkung-hukkung agamaya. Anjo kammaya le'ba'mi nipau lalang ri Kittaka angkanaya, “Tau tappakaji bawang mae ri Allata'ala akkulle a'jari baji' ammotere' passisambunganna siagang Allata'ala; iami lakkulle anggappai katallassanga!”

¹² Mingka anjo hukkung-hukkung agamaya tena natanjeng mae ri katappakkanga. Nia' tattulisi' lalang ri Kittaka angkanaya inai-nai anggaukangi hukkung-hukkung agamaya, lanri iatommi anjo hukkung agamaya nattallasa'.

¹³ Mingka le'ba' maki' Napakabella Almasi battu ri pangngalarroiNa Allata'ala lanri hukkung-hukkung agamaya. Napassareammi KalenNa nituju ri pangngalarroia passabakkang ikatte. Nasaba' nia' tattulisi' lalang ri Kittaka angkanaya, “Cilakami tau mate nigentunga irate ri kayu sallika.”

¹⁴Nagaukammi Almasi kammaya anjo, sollanna nisare todong bansa-bansa maraenga barakka' le'baka Napa'janjiang Allata'ala mae ri Abraham. Jari, ikatte tau tappaka mae ri Allata'ala, akkulle tommaki' anggappai anjo Roh Napa'janjianga Allata'ala.

¹⁵Sikamma sari'battangku! Baji'mi nakusareko pangngebarang ri katallassang allo-alloa. Punna nia' tau assijanji, nampa le'ba'mo niassai anjo janjia, takkulleai nia' manna sitau akkulle lesso' battu ri anjo janjia; yareka takkulleai natamba-tambai anjo janjia.

¹⁶ Anjo janji-janjinNa Allata'ala, KalenNa ampareki untu' Abraham siagang untu' sossoranna Abraham. Tena nanakana lalang ri Kittaka, “siagang untu' sikamma tau sossoranna Abraham,” battuanna jai tau. Ia niaka tattulisi' iamintu, “siagang untu' sossorannu,” battuanna sitauji bawang, iamintu Almasi.

¹⁷ Ia eroka kupau anrinni, iaminne: le'ba'mi nipare' siagang nipa'jari assa la'bi riolo janjinNa Allata'ala. Anjo hukkung agama nipassareanga ri patambilangngang antallumpulo taung ribokoanganna, takkulleai ampalessoki yareka ampalanynyaki anjo janjinNa Allata'ala.

¹⁸ Nasaba' punna battu ri ia anjo hukkung agamaya naNapassareang passareNa Allata'ala, anjo passarea teaimi battu ri janjinNa Allata'ala.

¹⁹Jari punna kamma, untu' apa padeng nanipassareang anjo hukkung agamaya? Pialinna iamintu angkanaya, anjo hukkunga nipappitambangi sollanna nipa'nassa gau' dosana rupataua. Wattu tappakena anjo hukkung agamaya sa'gennaji kabattuanna sitau sossoranna Abraham le'baka nipau lalang ri janjinNa Allata'ala mae ri Abraham. Anjo hukkung agamaya, malaeka'-malaeka' ampabattui tete ri rupataua.

²⁰Jari, musti nia' rua tau, nampa parallu se're tau ri tangnga. Mingka tena Naparalluangi Allata'ala nikanaya tau ri tangnga, nasaba' KalenNami battu anggaukangi anjo jamanga.

²¹Jari maka assisalai anjo hukkung agamaya siagang janjinNa Allata'ala? Tantu tena! Nasaba' punna lanri akkullena natallasi rupataua nanipassareang anjo hukkung agamaya, tantu akkullemi assibajiki rupataua siagang Allata'ala tete ri anjo hukkung agamaya.

²²Mingka nia' tattulisi' lalang ri Kittaka angkanaya nikoasai ngasemmi sikontu rupataua ri dosaya. Lanri kammana, anjo passare nipa'janjianga nipassareangi mae ri tau tappaka, lanri tappa'na ke'nanga mae ri Isa Almasi.

²³Ri wattu tenanapa narapiki wattunta a'jari tappa' mae ri Almasi, sanna' bateta nijagai baji' ri hukkung agamaya; sangkammaki' tau nikurunga, sa'genna nipa'nyatamo anjo tappatta.

²⁴Jari anjo hukkung agamaya a'jari sanrapangi pajaga mae ri kalenta, sa'genna battu Almasi ampassibajikiki' ammotere' siagang Allata'ala, lanri tappatta mae ri Almasi.

²⁵Kamma-kamma anne, lanri narapi'mi wattunna akkulle tappa' rupataua mae ri Isa Almasi, tenamo nanajagaiki' hukkung agamaya.

²⁶Lanri tappa' mako mae ri Isa Almasi, a'jari se'remi tallasa'nu mae ri Ia; na lanri kammana, a'jari mako ana'-ana'Na Allata'ala.

²⁷Le'ba' ngaseng mako nije'ne' lalang arenNa Almasi; jari nutarimami mae ri kalennu sipa'-sipa' KalenNa Almasi.

²⁸Lalang ri kammana anjo tenamo nanipasimmaraengi tu Yahudia siagang bansa-bansa maraenga, yareka ataya siagang tau bebasaka, yareka tu bura'nea na tu bainea. A'jari se're ngaseng mako lanri Isa Almasi.

²⁹ Punna taunnako Almasi, a'jari sossoranna mako Abraham. Siagang lanutarimami apa le'baka Napa'janjiang Allata'ala.