Read Makassar Version – KITTA' MATANGKASA GALATIA 4 Bible Online

GALATIA 4 - Makassar Version – KITTA' MATANGKASA bible

GALATIA 4

¹Mingka paralluko kupauang baji' angkanaya: punna ca'di ija tau lannarimaya warisi', nia' tau anjagai siagang angngurusangi sikamma kaparalluanna, sa'genna narapi'mo umuru' le'baka napattantu manggena. Nipare' kamma iji ata, manna naia pata anjo sikontu barang-baranga.

³Sangkamma tommi anjo mae ri katte. Ri wattu tenanapa natoa pikkiranta, nipare' ataki' ri roh-roh niaka ilalang ri anne linoa.

⁴Mingka ri wattunna narapi' baji'mo wattunna, Nasuromi Ana'Na Allata'ala antama' ri anne linoa. Nilassukammi anjo ana'Na ri se'reang baine, nattallasa'mo irawangang kakoasanna hukkung agamaya.

⁵ Lanri kammanami anjo naNalappassammo sikamma tau attallasaka irawangang kakoasanna hukkung agamaya; sollanta akkulle todong a'jari ana'-ana'Na Allata'ala.

⁶Nasaba' ana'-ana'Naki' Allata'ala, Nasuromi RohNa Ana'Na Allata'ala antama' ri atinta; iamintu Roh angkanaya, “Bapakku, o Bapakku.”

⁷Jari, teai mako ata, passangalinna ana' mako. Na lanri ana'Na mako Allata'ala, laNasareang ngaseng mako sikontu apa-apa le'baka Napasadia untu' ana'-ana'Na.

⁸Riolo tanuassengai Allata'ala. Iaminjo saba'na nu'jari atamo mae ri koasa-koasa nikanaya allata'ala, mingka sikontutojenna teai Allata'ala tojeng-tojeng.

⁹Mingka kamma-kamma anne nuassemmi Allata'ala; yareka bajikangangi punna nikana, Naasseng mako Allata'ala. Angngapa nanuero' ammotere' poleang mae ri roh-roh niaka lalang lino, lammaya siagang kasi-asia? Angngapa nuero' poleang nipare' ata ri roh-roh kammaya anjo?

¹⁰Nupakalompoi allo-allo attantua, bulang-bulang attantua, siagang taung-taung attantua.

¹¹Bata-batai nyawaku, gassingka la'jari sia-siaji posoku mae ri kau.

¹²Sari'battangku ngaseng! Kupala' dudui mae ri kau sollannu a'jari sangkamma inakke. Nasaba' inakke a'jari sangkamma tomma' ikau. Tena apa-apa kasalang le'ba' nugaukang mae ri nakke.

¹³Tantu nuu'rangi iji apa saba'na ri uru-uruna nakubirittakang anjo Kabara' Bajika mae ri kau. Saba'na, iamintu lanri natabaku garring.

¹⁴Anjo wattua tena nu'ringi'-ringi' mae ri nakke, manna na'jari paccoba lompo anjo garringku mae ri kau ngaseng. Ba'lalo nutarima bajikka' sangkamma malaeka'Na Allata'ala yareka sangkamma KalenNa Isa Almasi.

¹⁵Sanna' te'nena pa'mai'nu anjo wattua. Mingka kamma-kamma anne, kemaemi anjo te'nenu? Kuassengi angkanaya anjo wattua ka'de' akkulle kapang, manna matannu ero' tonjako angkocciki assulu' nampa nupassareang mae ri nakke.

¹⁶Maka nucini' kammama' musu ri kamma-kammaya anne, lanri kupa'nassana apa tojenga mae ri kau?

¹⁷Lompoi sumanga'na tau maraenga amboyako, mingka tena nabaji' pattujunna ke'nanga. Ero'naji ke'nanga antappuki passisambunganta, sollanna akkulle lompo sumanga'nu amminawang mae ri ke'nanga.

¹⁸Memang bajiki punna lompo sumangatta mae ri apa-apa kabajikanga. Assala' tuli kammana anjo. Tena nangkana iaji punna niakka' ri tangnga-tangnganu.

¹⁹Sikamma ana'-anakku kukarimangngia! Kamma-kamma anne lussa'mi sedeng nyawaku lanri ikau ngaseng. Pa'risikka' kusa'ring, sanrapang baine eroka allassukang ana'. Punna tenapa nanutarima ri kalennu sipa'-sipa' battua ri Almasi, tuli lakupisa'ringinna anne pa'risika!

²⁰Sanna' nakkukku ero' nia' ri tangnga-tangnganu ri kamma-kammaya anne; sollangku akkulle a'bicara sa'ra maraeng mae ri kau, lanri takuassengami angkanaya apa mami lakugaukang mae ri kau!

²¹Inai-nai ero' attallasa' irawangang kakoasanna hukkung-hukkung agamaya, pilangngerimi anne kanangku! Erokko kupauang apa sitojenna tattulisika lalang ri Kitta' Hukkung napassareanga Musa.

²² Nia' lalang tattulisi' angkanaya nia' rua ana'na Abraham: amma'na anjo ana' se'rea iamintu ata. Na amma'na anjo ana' maraengannaya iamintu tau bebasa'.

²³Ana'na anjo baine ataya, biasaji bawang kalassukanna, lanri battu ri ero'na rupataua nalassu'. Mingka ana'na anjo baine bebasaka, lanri janjinNa Allata'ala nanilassukangi.

²⁴Anne akkullei nipake a'jari pangngebarang. Anjo baine ruaya ebara' ruang rupa parjanjiang: anjo se'rea parjanjiang battu ri Bulu' Sinai — iamintu Hagar; a'jari atai ana'-ana' nalassukanga.

²⁵Jari, iaminjo Hagar sanrapang Bulu' Sinai, niaka ri butta Arab. Iami pangngebaranna kota Yerusalem siagang sikontu tuma'buttana, a'jaria ata kamma-kamma anne.

²⁶Mingka anjo Yerusalem, niaka ri suruga iamintu Yerusalem bebasaka, siagang iami anronta ikatte.

²⁷ Nasaba' nia' tattulisi' lalang ri Kittaka angkanaya, “Pakarannumi pa'mai'nu ikau baine tamananga, tenaya nale'ba' allassukang ana'! Assannang-sannang mako siagang ma'reja-reja mako ikau tau tale'baka ampisa'ringi pa'risi'na pammanakkanga! Nasaba' baine nibokoia ri tu bura'nenna lanisarei la'bi jaiangang ana', na ia baine niaka tuli a'rurung siagang tu bura'nenna.”

²⁸Sari'battangku ngaseng! Ikau ana'-ana'Na ngasengko Allata'ala, nilassukanga lanri janjinNa Allata'ala; sangkammako Ishak.

²⁹ Anjo wattua, anjo ana' nilassukanga lanri ero'Na RohNa Allata'ala lanisessai ri ana' nilassukanga lanri ero'na rupataua. Kamma tomminjo ri kamma-kammaya anne.

³⁰ Mingka apa nakana pole lalang ri Kittaka? Nia' tattulisi' angkanaya: “Suroi a'lampa anjo baine ataya siagang ana'na, nasaba' anjo ana' battua ri baine ataya tena nakkulle lannarima warisi' sangkamma anjo ana'na baine bebasaka.”

³¹Jari, sari'battangku ngaseng, ikatte anne teaiki' ana'na baine ataya; ikatte ana'naki' baine bebasaka.