Read Makassar Version – KITTA' MATANGKASA GALATIA 5 Bible Online

GALATIA 5 - Makassar Version – KITTA' MATANGKASA bible

GALATIA 5

¹Kamma-kamma anne bebasa' maki', lanri le'ba' maki' Nalappassang Almasi! Lanri kammana, attahang mako ri kabebasannu; teako ero' poleangngi nipa'jari ata.

²U'rangi angkanaya punna nusuro sunnaki kalennu, battuanna tenamo matu-matunna Almasi mae ri kalennu. Kalengku Paulus, ampauangko anne.

³Sikalipi pole kupakainga' tau assuro sunnakai kalenna, angkanaya musti nagaukang ngasengi anjo sikontu apa-apa napassuroanga hukkung-hukkung agamaya!

⁴Punna erokko assibajiki ammotere' siagang Allata'ala tete ri hukkung-hukkung agamaya, battuanna a'jari tappu'mi passisambungannu siagang Almasi. Jari pantarang pangngamaseanNa mako Allata'ala attallasa'.

⁵Mingka untu' ikambe, manrannuang maki' mae ri pannulunNa RohNa Allata'ala; na lanri tappatta mae ri Almasi, Nasare maki' oloang assibajiki ammotere' siagang KalenNa.

⁶Nasaba' punna asse'remi tallasatta siagang Almasi, tenamo naparallu anjo nikanaya mannuruki yareka tena, mae ri paratorang sunnaka. Ia mami parallu anjo tappaka mae ri Almasi; na anjo tappaka ma'nassai lalang ri pangngamaseanta mae ri paranta tau.

⁷Riolo attojeng-tojeng mako anggaukang bajiki jama-jamannu! Mingka kamma-kamma anne, angngapa natenamo numannuruki mae ri ero'Na Allata'ala? Inai le'ba' anynyonyo' salako?

⁸Mattantu teai Allata'ala le'baka angkiokko anggaukangi anjo kammaya!

⁹ Nakana taua, “Anjo pa'gambang sike'deka akkullei napabakka' sikontu tarigu le'baka nileo'.”

¹⁰Mingka manna nakamma, tappa' ija' angkanaya tena nulamminawang mae ri oloang maraenga, lanri asse'remi tallasatta siagang Almasi. Siagang tappa' tonga' angkanaya manna inai, punna nakacoi pikkirannu lanihukkungi ri Allata'ala.

¹¹Na inakke, sari'battangku ngaseng, apa saba'na nakutuli nimusu punna kubirittakang angkanaya parallui anjo paratoranna sunnaka? Punna kamma memang anjo kubirittakanga, tenamo na'jari passala' punna kubirittakang anjo Salli'Na Almasi.

¹²Bajikangangi punna assulu' memang battu ri jama'aka anjo tau angkacoai pikkirannu!

¹³Le'ba' mako nikio' a'jari tau bebasa'. Mingka teako pake salai anjo kabebasannu, untu' anggaukang ero' kalennu. Passangalinna musti sikamaseangko siagang massing siparakaiko.

¹⁴ Nasaba' anjo sikontu bonena hukkung agamaya le'ba'mi nipakabodo a'jari se're hukkung, iamintu angkanaya, “Parallui nukamaseang parannu tau sangkamma nukamaseanna batangkalennu.”

¹⁵Mingka punna massing sikara'musukko, tutu laloko, sollanna tena nupara ancuru'.

¹⁶Kamma anne natabaya kanangku: Boli'mi kamma naNarurungangko RohNa Allata'ala; siagang teako turukiangi ero'na sipa'-sipa' rupataunu.

¹⁷ Nasaba' assisalai ero'na rupataua siagang ero'Na RohNa Allata'ala; kammayatompa assisalai ero'Na RohNa Allata'ala siagang ero'na rupataua. Assisala rua-ruai; jari takkulleako anggaukangi apa nukaerokia.

¹⁸Mingka punna Napimpingko RohNa Allata'ala, tenamo nukkulle nakoasai hukkung-hukkung agamaya.

¹⁹Anjo ero'na sipa'-sipa' rupataua a'nyatai lalang ri panggaukang-panggaukang salimaraka, panggaukang ra'masaka, siagang panggaukang tenaya nasiratang;

²⁰kammayatompa ri panggaukang anynyombaya ri barhala, baca-baca pangngissenganga; assimusu-musua, passiba'jianga, akkimburua, pa'larroanga, kaparalluang kalennaji bawang naboyai, appasisala-salaya tau, siagang a'golongang-golonganga;

²¹kammayatompa assereatia, painunga sa'genna nasa'ring, assua'-suara' appala'busuka apa-apa, na maraengannaya. Yangasennami anjo kupakaingakkangko kamma-kamma anne; sangkamma todong kupakainga'nu pirangalloang, angkanaya anjo tau a'gau' kammaya takkulleai a'jari anggota Umma'Na Allata'ala.

²²Mingka, punna nipimping ri RohNa Allata'ala taua, iaminne wassele'na: sikamaseangi ke'nanga, rannui, assiamaki, sa'baraki siagang lammoro' pa'maiki, bajiki ri paranna tau, majarreki,

²³tuna pa'maiki, siagang akkullei nalewai kalenna. Tena hukkung agama ampappisangkangi anjo sikammaya.

²⁴Inai-nai a'jarimo taunNa Almasi, matemi sipa'-sipa' rupatauna siagang sikamma ero' napasu rupatauna.

²⁵Nasare maki' RohNa Allata'ala katallassang beru; jari musti Ia tommi angkoasai sikontu katallassanta.

²⁶Takkulleaki' a'jari tampo, yareka sipa'ri'-pa'risi pa'mai', kammayatompa assikimbu'-kimburui.