Read Makassar Version – KITTA' MATANGKASA EFESUS 5 Bible Online

EFESUS 5 - Makassar Version – KITTA' MATANGKASA bible

EFESUS 5

¹Ikau ana'-ana'Na ngasengko Allata'ala, sannaka Nakarimangnginna; lanri kammana, paralluko mannuruki ri Allata'ala.

² Paralluko attallasa' lalang ri pangngamaseanga, sangkamma todong Almasi mangngamaseangi mae ri katte. Nakoro'bangkangi KalenNa untu' ikatte, a'jari passare siagang koro'bang mabau', Nakarannuanga atinNa Allata'ala.

³Ikau ngaseng Umma'Nako Allata'ala. Lanri kammana, tasiratangai nia' ri tangnga-tangnganu nikanaya gau' bawang, gau'-gau' tenaya nasiratang, yareka kangoanga. Gassingka nia' napare' alasang taua ampakkanaiko angkana nugaukangi anjo sikammaya.

⁴Tena todong nasiratang nucarita nikanaya carita-carita gau' bawang, yareka bicara ra'masaka, yareka a'bicara bonga-bonga tenaya nasiratang. Mingka paralluko appala' sukkuru' mae ri Allata'ala.

⁵U'rangi baji'-baji': ia tau nangaia a'gau' bawang, yareka a'gau' tenaya nasiratang yareka angngoaya (anjo gau' kammaya sangkamma le'ba'ji gau' anynyombaya barhala), anjo tau kammaya takkulleai a'jari anggota umma' niparentaya ri Almasi siagang Allata'ala.

⁶Teako erokki nitipu ri bicara-bicara tenaya bonena. Nasaba' ia ngasemmi anne kammaya ampammumbai pangngalarroiNa Allata'ala mae ri tau tenaya namannuruki ri Ia.

⁷Jari, tea' laloko assileoki tau kammaya anjo.

⁸Ikau riolo niakko lalang ri sassanga. Kamma-kamma anne a'jari mako umma'Na Batara; jari nia' mako lalang ri singaraka. Lanri kammana, musti attallasakko lalang singaraka.

⁹Nasaba' battu ri iaminjo singaraka ammumba sikontu gau' bajika siagang gau' annabaya ri dallekanNa Allata'ala.

¹⁰Usahakammi nanuasseng apa Nakarannuanga pa'mai'Na Allata'ala.

¹¹Teako katuru'-turukangi ri taua anggaukangi gau'-gau' tenaya matu-matunna nagaukanga tau ammantanga lalang ri kasassanganga. Passangalinna parallui nusolarri gau'-gau' kammaya anjo. (

¹²Nasaba' anjo gau' cokko-cokkona ke'nanga, poro nibicara bawang nappakasiri'-siri'mo.)

¹³Sikontu apa-apa nisuloiya lakacinikang baji' ngasengi.

¹⁴Na sikontu apa nicini' bajika, a'jari singara'mi. Iaminjo saba'na nania' nikana, “Ambangungko ikau tau tinroa, ammentengko nai' battu ri kamateanga! Accayami singara'Na Almasi irateangannu.”

¹⁵Lanri kammana, parhatikangi baji'-baji', antekamma katallassannu. Teako attallasaki sangkamma tau dongoka. Attallasakko sangkamma tau cara'de'.

¹⁶ Pake bajiki sikontu kasampatang niaka ri kau; nasaba' anne jammanga, jammang kaja'dallang.

¹⁷Teako dongoki, mingka pappilajari apa Nakaerokia Batara.

¹⁸Teako nabengoi anggoro', nasaba' anjo anggoroka akkulleko napanraki. Passangalinna paralluko nikoasai ri RohNa Allata'ala.

¹⁹ Pakei kana-kana mappakala'birika, kelong pammuji-mujia siagang lagu-lagu rohania lalang ri kana-kanannu. Paralluko rannu pa'mai' akkelong mammuji-muji mae ri Batara makoasaya.

²⁰Lalang ri apa-apa mamo, paralluko tuli appala' sukkuru' mae ri Allata'ala Manggea, lalang arenNa Isa Almasi, Batarata.

²¹Paralluko sipilangngeri sollanna nupakala'biri' Almasi.

²² Ikau tu bai'-bainea, paralluko tundu' mae ri bura'nennu, sangkamma tundu' mae ri Batara makoasaya.

²³Nasaba' anjo bura'nea iami kapala mae ri bainenna, sangkamma Almasi a'jari kapala mae ri jama'aka; kammayatompa Ia tommi a'jari Karaeng Mappasalama' mae ri jama'aka, a'jaria TubuNa.

²⁴Sangkamma anjo jama'aka tunduki mae ri Almasi, kammatommi anjo tu bai'-bainea musti tundu' tongi mae ri tubura'-bura'nena, lalang ri passala' apa-apa mamo.

²⁵ Ikau tubura'-bura'nea, karimangngi bainennu, sangkamma Almasi Nakarimangngi jama'aka. Siagang Nakoro'bangkangi KalenNa untu' anjo jama'aka.

²⁶NaNagaukang Almasi anjo kammaya, sollanna akkulle Natangkasi jama'aka lalang ri pangngajaranNa kammayatompa lalang ri je'ne' pa'je'ne', nampa akkulle Napassareang anjo jama'aka mae ri Allata'ala.

²⁷Battu ri kammanami anjo naNapaenteng baji'mo siagang matangkasa'mo anjo jama'aka ri dallekanNa, tena sikali panra'na yareka tena sikali callanna manna sike'de'.

²⁸Kammatommi anjo tubura'-bura'nea, musti nakarimangngi bainenna, napasanrapang batangkalenna. Inai-nai angkarimangngi bainenna, sangkammami angkana batangkalenna nakarimangngi. (

²⁹Tena le'bakai taua nakabirisi batangkalenna. Passangalinna naparakai siagang najagai, sangkamma todong Almasi Naparakai jama'aNa;

³⁰niassengi anjo nasaba' ikatte anggota-anggota tubuNaki' Almasi.)

³¹ Nia' tattulisi' lalang ri Kittaka angkanaya, “Lanri kammanami anjo nalanabokoi anrong-manggena bura'nea, nampa a'jari se're siagang bainenna, nanjari se'remo anjo tau ruaya.”

³²Anjo ayaka lantang sikali battuanna. Kupasinrapangi anjo antekamma passisambunganNa Almasi siagang jama'aka.

³³Mingka anjo ayaka nia' todong passisambunganna siagang kalennu: Sikontu tu bura'nea parallui nakarimangngi tubainenna, sanrapang anjo bainenna batangkalenna tonji; kammayatompa sikontu bainea musti napakalompoi tu bura'nenna.