Read Makassar Version – KITTA' MATANGKASA FILIPI 1 Bible Online

FILIPI 1 - Makassar Version – KITTA' MATANGKASA bible

FILIPI 1

¹ Natarimai sikontu sari'battangku umma'Na Allata'ala, niaka ammantang ri Filipi, asse'reamo siagang Isa Almasi. Kammayatompa sikamma pamimpinga siagang pambantuna jama'aka! Inakke Paulus, siagang Timotius, pajama-jamaNa Isa Almasi;

²ma'minasaki' mae ri Allata'ala Manggeta siagang Batarata Isa Almasi, nuporo Nasare barakka' siagang katallassang salewangang.

³Punna kurapikko kuu'rangi, tuli appala' sukkuruka' mae ri Allata'ala.

⁴Siagang punna kupappala' doangang ngasengko, teai sipato' sannanna atingku.

⁵Appala' sukkuruka' mae ri Allata'ala lanri battu ri pakkaramulanna sa'genna kamma-kamma anne, tuli nubantuma' ampa'la'bangi Kabara' Baji' battua ri Allata'ala.

⁶KalenNa Allata'ala le'ba' ampakaramulai anne jama-jamang bajika ri kau; na tappaka' angkanaya Ia tommi lampannarrusuki anjo jama-jamanga sa'genna le'ba' ri Allo kabattuanNa ammotere' Isa Almasi.

⁷Tuli nia'nu ngaseng lalang ri atingku. Memang siratangi punna kammai anjo nyawaku mae ri kau ngaseng. Nasaba' le'ba' ngaseng tommako annarima siagang inakke iamintu passare malammoro' Napassareanga Allata'ala mae ri nakke; baji' na ri kamma-kammaya anne, iamintu ri wattungku nia' lalang ri tarungkua, kammayatompa pole ri wattungku nia' pantara' untu' angngalleangangi siagang ampamentengangi anjo Kabara' Bajika.

⁸Naassengi Allata'ala angkanaya teai sipato' nakkukku mae ri kau ngaseng; nakkuka' lanri pangngamaseang majarre' battua ri KalenNa Isa Almasi.

⁹Iaminne pappala' doangangku untu' ikau: poro pila' mangngamaseangko ri Allata'ala siagang ri parannu tau siagang natuli katambang pangngassengannu ri katojenganga siagang kacara'dekanga,

¹⁰sollanna akkulle nuasseng ampilei apa kaminang bajika natangkasa' katallassannu battu ri kakodianga siagang battu ri tuduhang apa-apa mamo punna narapi' sallang allo kabattuanNa ammotere' Almasi.

¹¹Lakala'biang mako ri sikamma panggaukang bajika; iamintu jama-jamang KalenNaya bawang Isa akkulle anggaukangi; naporo nipakala'biri'mo siagang nipuji-pujimo Allata'ala.

¹²Kukellai nuasseng ngaseng, angkanaya passabakkang iaminne apa-apa kajariang mae ri kalengku, napila' jaimo tau allangngereki siagang ampatappaki Kabara' Bajika.

¹³ Passabakkang kammaminjo nanaasseng ngasemmo pangawala'na balla' karaenga siagang tau maraengannaya anrinni ri kotaya, angkanaya passabakkang a'jari palayangku mae ri Almasi nanitarungkua'.

¹⁴Siagang lanri iaminne nitarungkuku nujaimo tu Karisteng anrinni ri kotaya a'jari pila' tappa' mae ri Batara; sa'genna pila' baranimo ke'nanga ambirittakangi pappasanNa Allata'ala.

¹⁵Memang, nia' siapa are ri ke'nanga ambirittakangi Almasi lanri assereatina siagang ero'na a'boya pa'beserang; mingka nia' todong maraengang attojeng-tojeng memang tongi ambirittakangi Almasi.

¹⁶Anne ke'nanga, lanri mangngamaseanna mae ri Allata'ala siagang mae ri nakke nanagaukang anjo jamanga; nasaba' naassengi ke'nanga angkanaya Allata'ala le'ba' assuroa' untu' ampa'nyatai angkanaya ma'nassa kontutojengi anjo Kabara' Bajika.

¹⁷Mingka anjo tau maraengannaya, lanri pattujuang sala nanabirittakang Almasi; untu' kaparalluang kalenna nanabirittakang ke'nanga anjo Kabara' Bajika. Napikkiriki ke'nanga angkanaya lakkullea' napa'jari pila' susa lalang ri tarungkua punna nagaukang ke'nanga anjo sikammaya.

¹⁸Mingka tena nangngapa! Nasaba' manna pole antekamma, iaka nanigaukang anjo jamanga lanri pattujuang baji' yareka napattujuang sala, mingka kanibirittakang mangkaji Almasi; jari, sannangi kusa'ring pa'maikku. Na tuli lakammana sannanna pa'maikku;

¹⁹nasaba' kuassengi angkanaya lanri pappala' doangannu ngaseng, siagang lanri pannulunNa RohNa Isa Almasi, nakulanipakabebasa'.

²⁰Iaji kukaerokia siagang kuminasaia, iamintu: tapporo tena sikali laloja nakusia-sia lalang ri jama-jamangku. Mingka tuli ma'minasaku, la'biangampa ri kamma-kammaya anne, sollanna akkulle a'jari barani nyawaku siagang batangkalengku — baji' na ri wattu attallasakku yareka ri wattu mateku — kupakala'biriki Almasi.

²¹Nasaba' untu' inakke, mangeanna tallassakku iamintu Almasi bawang! Na matea iamintu upakku.

²²Mingka, punna lanri attallasakku ri anne linoa nakkulle kugaukang jama-jamang la'bi niaka matu-matunna, takuassengami angkana kereanga lakupilei.

²³Battu pimbalimi pikkirang battua mae ri nakke. Ero' dudua' ambokoi anne linoa nakua'lampa mange ammantang siagang Almasi, nasaba' iaminjo kaminang baji'.

²⁴Mingka lanri untu' kaparalluannu ngaseng, bajikangangi punna ammantanga' ri lino.

²⁵Tappaka' ri anne passalaka. Iaminjo saba'na nakuasseng angkanaya lammantanga' anrinni. Lammantanga' siagang ikau ngaseng, sollangku akkulle antulungko a'jari pila' majarre' siagang pila' sannang lalang ri katappakkannu mae ri Almasi.

²⁶Lanri kammana, punna ammoterekka' sallang mae ri kau, asse'reamo siagang Isa Almasi, lapila' jaimi alasannu angkalompoang pa'maiki kalengku.

²⁷Jari, ia parallua kamma-kamma anne, iamintu musti attallasakko situru' apa nakaerokanga anjo Kabara' Bajika ri sesena Almasi. Jari, iaka nisigappa yareka tena, mingka lakulangngereki angkanaya majarrekko asse're, siagang lasiagang ngasengko anjama a'julu ero' siagang a'julu pattujuang; iamintu untu' katappakkang situru' anjo Kabara' Baji' battua ri Allata'ala.

²⁸Paralluko tuli barani; teako mallaki mae ri musu-musunnu. Iaminjo a'jari butti angkanaya ma'nassa lanibetai ke'nanga, na ikau mattantu lammeta, nasaba' KalenNa Allata'ala ampassareangi anjo pammetanga mae ri kau.

²⁹Nasaba' Nasare mako pangngamaseang Allata'ala teai untu' katappakkang bawang mae ri Almasi, passangalinna untu' angkasia' tongi sessaya lanri Almasi.

³⁰ Kamma-kamma anne amminawang ngaseng tongko siagang inakke lalang anne se'rea jama-jamang; iamintu jama-jamang le'baka nucini' kugaukang riolo, siagang kugaukanga ija sa'genna ri kamma-kammaya anne, kamma nulangngereka kamma-kamma anne.