Read Makassar Version – KITTA' MATANGKASA KOLOSE 1 Bible Online

KOLOSE 1 - Makassar Version – KITTA' MATANGKASA bible

KOLOSE 1

¹Natarimai sikamma sari'battangku, umma'Na Allata'ala niaka ri Kolose, majarreka asse're siagang Almasi! Battu ri nakke, Paulus, niangkaka a'jari tunisuroNa Isa Almasi, lanri ero'Na Allata'ala, siagang sari'battanta Timotius; ma'minasaki' mae ri Allata'ala Manggea, nuporo Nasare barakka' siagang katallassang salewangang.

³Nalangngere'mi ikambe angkanaya tappa' mako mae ri Isa Almasi; kammayatompa mangngamaseang mako mae ri sikamma Umma'Na Allata'ala. Iaminjo saba'na, na ri wattunnu kipappala' doangang, appala' sukkuru' maki' mae ri Allata'ala, ManggeNa Batarata Isa Almasi.

⁵Tappa' mako siagang mangngamaseang mako, nasaba' nurannuammi apa Napasadiaya Allata'ala ri suruga untu' ikau. Le'ba'mi nulangngere' anjo kabaraka, ri wattunna nipabattu Kabara' Baji' tojenga battua ri Allata'ala mae ri kau.

⁶Tassiara'mi anjo kabaraka alla'bang lino. Na nibarakkakimo katallassanna rupataua lanri anjo birittaya; sangkamma todong nibarakkakimi katallassannu appakkaramula ri nulangngere'na anjo passare malammoro'Na Allata'ala na nupahang baji'-baji'.

⁷ Anjo birittaya Epafras ampabattui mae ri kau, bela nakamaseanga ikambe. Ia pajama-jamaNa Almasi, attojeng-tojenga anjama untu' kaparalluanta.

⁸Battu ri iami nalangngere' ikambe angkanaya lanri koasa battua ri RohNa Allata'ala nukkullemo massing sikamaseang.

⁹Iaminjo saba'na nakituli ampappala' doangangko appakkaramula ri nilangngere'na kabara'nu. Kipalaki mae ri Allata'ala sollannu Nasare RohNa Allata'ala kacara'dekang siagang pangngassengang sollanna nupahang baji' apa Nakaerokia Allata'ala.

¹⁰Na lanri kammanami anjo nukkullemo attallasa' situru' ero'Na Allata'ala, siagang natuli nupakasannang pa'mai'Na; sa'genna ilalang ri apa-apa mamo, akkulleko appa'nia' wassele' apa-apa baji'. Kammayatompa katambang tommi pammahannu ri sesena Allata'ala.

¹¹Poro nipakajarrekko lanri kakoasang malompoNa Allata'ala, sa'gennu akkulle attahang angkasiaki sikamma kapa'risanga siagang sa'bara', yareka sannang pa'mai',

¹²kammayatompa appala' sukkuru' mae ri Manggea. Nasaba' iaminjo Manggea ampa'jari siratangko antarimai apa le'baka Napasadia Allata'ala untu' umma'Na lalang ri kakaraengang singaraka.

¹³Le'ba' maki' Nalappassang battu ri kakoasanna masassanga, nampa napalettekki' antama' ri pamarentahanNa Ana'Na Nakamaseanga.

¹⁴ Lanri Iaminjo Ana'Na nakinilappassang; battuanna le'ba'mi nipammopporang dosa-dosata.

¹⁵Iaminjo Almasi rupa ma'nyataNa Allata'ala tenaya nakacinikang; iaminjo Almasi ana' bungasa', mala'bianganga na sikontu apa-apa nipa'niaka.

¹⁶Nasaba' tete ri Iami Napa'jari Allata'ala sikontu apa-apa niaka ri suruga siagang irate ri linoa, sikontu apa-apa kacinikanga siagang tenaya nakacinikang; kammayatompa pole sikontu roh niaka koasana siagang ammarentaya. Sikontu anne linoa nipa'jari tete ri Almasi, siagang untu' Almasi.

¹⁷Ri tenanapa nania' sikontu apa-apaya, nia' riolo memammi Almasi. Siagang lanri Ia tommi na massing nia' ri pammantanganna sikontu apa-apaya.

¹⁸ Iami a'jari ulu mae ri KalenNa, iamintu jama'aka; lanri Iami assarei katallassang anjo jama'aka. Iami a'jari ana' bungasa', uru-uru nipattallasa' poleanga ammotere' battu ri kamateanga; sollanna Ia mami bawang a'jari kaminang parallu ilalang ri sikontu katallassanga.

¹⁹KalenNa tonji Allata'ala angkaerokangi sollanna sikontu apa-apa niaka ri KalenNa Allata'ala, nia' ngaseng tongi ri KalenNa Ana'Na.

²⁰ Siagang tete ri Ia tommi anjo Ana'Na, naNapa'jari assibajiki ngasemmo ammotere' sikontu apa-apaya siagang KalenNa — baji' na sikontu apa-apa niaka ri lino kammayatompa apa niaka ri suruga. Anjo Nagaukanga Allata'ala tete ri kamateanNa Ana'Na irate ri kayu sallika.

²¹Riolo bellako ri Allata'ala. Numusui Allata'ala, lanri ja'dala'na pikkirannu siagang panggaukannu.

²²Mingka kamma-kamma anne, Napa'jari baji'mi ammotere' passisambungannu siagang KalenNa, lanri kamateanNa Ana'Na. Kammami anjo carana nukkulle nierang mange andallekang siagang malanynying, matangkasa' siagang tena callanu ri dallekanNa Allata'ala.

²³Mingka tantu musti tuli majarrekko tappa' siagang ammenteng kassa' ri katappakkannu. Gassingka nulappassangi anjo panrannuang le'baka nisareangko ri wattunna nutarima anjo Kabara' Baji' battua ri Allata'ala. Anjo kabaraka le'ba'mi nibirittakang mae ri sikontu taua ri lino. Na untu' iatommi anjo nainakke anne, iamintu Paulus, ku'jari palayang.

²⁴Kamma-kamma anne sannammi pa'maikku angkasiaki pa'risika untu' kaparalluannu. Nasaba' lanri kapa'risang nakasiaka tubuku, kupa'ganna'mi kasessang mustia Nakasia' Almasi untu' jama'aNa, iamintu tubuNa.

²⁵Nasuroma' Allata'ala a'jari palayang mae ri jama'aNa untu' kaparalluannu. Musti kupabattu ngasengi biritta battua ri Allata'ala;

²⁶iamintu biritta a'bilangngang taungamo Narahasiakang Allata'ala mae ri sikontu rupataua, mingka kamma-kamma anne Napa'nyatami mae ri umma'Na.

²⁷Mae ri anjo umma'Na, eroki Allata'ala ampa'nyatai antekamma baji'na siagang mala'biri'na anjo rahasiaNa untu' sikontu rupataua. Anjo rahasiaya, iamintu: Niaki Almasi lalang ri kalennu; battuanna langgappa tongko bageang lalang ri kalompoanNa Allata'ala.

²⁸Iaminjo Almasi nabirittakanga ikambe mae ri sikontu rupataua. Kipakainga'mi siagang kiajara' ngasemmi ke'nanga siagang baji'-baji'. Pattujunna ikambe iamintu sollanna akkulle ngaseng nierang rupataua mae ri Allata'ala, salaku tau baji'mo katallassang rohanina, lanri asse'renamo siagang Almasi.

²⁹Untu' yangasennami anjo passalaka nakuanjama terasa'mo. Usaha tojeng-tojemma' siagang sikontu pakkulle Napassareanga Almasi mae ri nakke; na anjo anjamaya lalang ri kalengku sanna' makoasana.