Read Makassar Version – KITTA' MATANGKASA KOLOSE 4 Bible Online

KOLOSE 4 - Makassar Version – KITTA' MATANGKASA bible

KOLOSE 4

¹ Ikau ngaseng a'jari pinggawaya! Paralluko a'gau' tojeng siagang adele' mae ri palayang-palayannu. U'rangi angkanaya nia' todong se're pinggawanu ri suruga.

²Paralluko tamalanrea appala' doang siagang a'jaga-jaga, kammayatompa appala' sukkuru' mae ri Allata'ala.

³Appala' doang tongko untu' ikambe, sollanta Nasare Allata'ala kasampatang baji', untu' ampa'la'bangi biritta rahasiaNa Almasi. Nasaba' passabakkang iaminjo nakunia'mo kamma-kamma anne ri tarungkua.

⁴Appala' doangko sollanna akkulle kupakasingara' anjo rahasiaya sa'genna singara' tojeng-tojeng.

⁵ Mae ri parannu tau, ia tenayapa natappa', baji'-bajiki katallassannu nanupake baji' sikamma kasampatang niaka.

⁶Sikamma bicara nupasuluka parallui appakasannang pa'mai' siagang appatimbo pangngai. Parallui nuasseng baji' appiali ri pakkuta'nanna taua.

⁷ Tikhikus, sari'battang nikamaseanta, lampabattuang ngasengko sikontu kabara' battua ri batangkalengku. Iami majarre' anrurungangi ikambe anggaukangi jama-jamang mangea ri Batara.

⁸Kusuromi battu mae ri kau sollanna akkulle nuasseng katallassanna ikambe, nanukkullemo kasaleorang.

⁹ Nia' tongi Onesimus lanaagang Tikhikus a'lampa mae ri kau; Ia tau battu antureng tonji. Iami sari'battanta majarreka, siagang nakarimangngia ikambe. Iami siagang Tikhikus lampabattuang ngasengko sikontu apa-apa kajarianga anrinni ri tampa' kupammantangia.

¹⁰ Aristarkhus, niaka kuagang anrinni ri tarungkua, akkiringi sallang mae ri kau ngaseng. Kammayatompa Markus, sampu sikalinna Barnabas. (Le'ba' mako nisare kabara' sollanna nuruppai siagang nutarima bajiki punna battu mae ri kau.)

¹¹Sallanna pole Yesus nigallaraka todong Yustus. Battu ri sikamma tu Yahudi tappakamo mae ri Batara Isa, iaji anne bawang ke'nanga tallua angngaganga' anggaukangi jama-jamang battua ri Allata'ala. Teai sipato' natulungku tojeng ke'nanga.

¹² Sallang battu ri Epafras. Anne Epafras tau battu antureng tonji. Pajama-jamaNa tongi Isa Almasi, tenaya lanrena tuli ampappala' doangangko. Sanna' napala'na mae ri Allata'ala, sollanna pila' jarre' tappa'nu siagang a'jari toa tojeng pikkirang rohaninu; sollannu a'jari sukku' mannurukinnu mae ri ero'Na Allata'ala.

¹³Kalengku ansa'bi antekamma batena anjama terasa' untu' ikau ngaseng siagang sikamma tau niaka ri Laodikia siagang Hierapolis.

¹⁴ Dottoro' Lukas, nikarimangngia, siagang Demas, akkiring tongi sallang mae ri kau ngaseng.

¹⁵Pabattu tongi sallanna ikambe mae ri sikamma sari'battanta tu Karistenga ri Laodikia; kammayatompa mae ri sari'battanta Nimfa siagang sikamma jama'ah a'rappunganga assambayang ri balla'na.

¹⁶Punna le'ba' nibaca anne suraka mae ri kau ngaseng, usahakang tongi sollanna nibacakang todong mae ri jama'ah niaka ri Laodikia. Kammayatompa, musti nubaca tongi sura' lanikiringa battu ri Laodikia mae ri kau.

¹⁷ Siagang pauangi Arkhipus, angkanaya, “Pa'le'baki jama-jamang nipassareanga mae ri kau untu' allayani Batara.”

¹⁸Sallang battu ri nakke, Paulus. Kalengku antulisiki anne bageang anrinnia. Teako kaluppai angkanaya nia' ija' lalang ri tarungkua. Poro Nabarakkaki ngasengko Batara. Sallangku, Paulus