Read Makassar Version – KITTA' MATANGKASA 1 TESALONIKA 3 Bible Online

1 TESALONIKA 3 - Makassar Version – KITTA' MATANGKASA bible

1 TESALONIKA 3

¹ Kala'busanna tanatahangami nakku'na ikambe. Lanri kammana appikkiri' maki' angkana bajikangang ammantang maki' ri Atena,

²nanisuro riolo sari'battanta Timotius battu mae ri kau: Anne Timotius, iami palayanNa Allata'ala, assiaganga ikambe anjama untu' ambirittakangi Kabara' Bajika, iamintu ri passala'na Almasi. Kisuromi Timotius battu mae ri kau ngaseng, sollanna napakajarrekko siagang napamajuko nupila' tappa' mae ri Almasi.

³Sollanna tenanniakka manna sitau battu ri kau ammono'boko passabakkang sikamma anne kasessanta ngaseng. Kalennumi angngassengi, angkanaya anjo sikamma passessaya antama' memang tongi lalang ri ero' rancanaNa Allata'ala untu' ikatte.

⁴Ri wattunna assiagangija ikambe siagang ikau ngaseng, le'ba' memammi kipau la'bi riolo mae ri kau ngaseng angkanaya lanikasiaki sessaya. Na ma'nassa kajariang tojemmi anjo kipakkanaya; kalennu ngasemmi angngassengi anjo kammaya.

⁵Lanri kammana minjo nakusuromo Timotius battu mae ri kau ngaseng, sollanna akkulle kuasseng antekamma kamajuanna katappakkannu, nasaba' teai sipato' ero'na kuasseng. Bata-batai nyawaku, gassingka naso'riko Billisi' sa'genna a'jari sia-sia ngaseng kaposoanna ikambe.

⁶ Kamma-kamma anne nia'mi ammotere' Timotius; siagang napabattumi ri kambe kabara' nakarannuanga ikambe, iamintu ri passala'na katappakkannu mae ri Almasi siagang passikamaseannu. Napabattumi ri kambe angkanaya tuli nuu'rangi baji'na ngaseng ikambe lalang ri pa'mai'nu ngaseng. Siagang angkanaya ero' ngasengko angngagangi ikambe assicini', sangkamma todong ikambe sanna' todong ero'na ikambe angngagang ngasengko assicini'.

⁷Iaminjo saba'na, sikamma sari'battangku ngaseng, nailalang sikontu kasusaanna siagang kasessanna ikambe, anggappa maki' panynyaleori lanri biritta battua ri kau ngaseng. Tappa'nu ngasemmi mae ri Almasi ampakalompoi pa'mai'na ikambe;

⁸sa'genna kamma-kamma anne attallasa' tojeng-tojemmi nakasia' ikambe, assala' tuli majarrekko, asse're mae ri Batara.

⁹Teai sipato' lompona kasukkuranna ikambe mae ri Allata'ala lanri sikontu karannuang nagappaya ikambe ri dallekanNa Allata'ala passabakkang ikau ngaseng.

¹⁰Allo bangngi maki' appala' doang tojeng-tojeng, sollanna nakiakkulle assicini' siagang ikau ngaseng, nakkulle ikambe ampa'gannaki apa-apa kakuranganga ri katappakkannu.

¹¹Naporo KalenNa Allata'ala Manggeta, kammayatompa Batarata Isa, allappari oloanna ikambe sollanta akkulle assicini'!

¹²Poro pila' Napasikama'-kamaseang ngasengko Batara, kammayatompa napila' nukamaseang todong sikontu rupataua, sa'genna pila' katambang pangngamaseannu, sangkamma pangngamaseanna ikambe mae ri kau.

¹³Lanri kammana, akkullemi Napakajarre' Batara pa'mai'nu, sa'gennu matangkasa' siagang tena callannu ri dallekanNa Allata'ala Manggeta, punna battu poleang sallang Batara Isa a'rurung siagang sikontu taunNa ngaseng.