Read Makassar Version – KITTA' MATANGKASA 1 TESALONIKA 4 Bible Online

1 TESALONIKA 4 - Makassar Version – KITTA' MATANGKASA bible

1 TESALONIKA 4

¹Lanri kammana, sikamma sari'battangku, paralluko angngalle conto battu ri kambe, antekamma batenu musti attallasa' sollanna nupakasannang pa'mai'Na Allata'ala. Memang kamma-kamma anne sangkammami anjo katallassannu. Mingka kamma-kamma anne lalang koasaNa Batara Isa, napala' tojeng-tojengi ikambe siagang kisekeki ngasengko sollannu pila' appattujuang pole ilalang ri anjo passalaka!

²Nasaba' nuassemmi anjo pitunju'-pitunju' le'bakamo kipassareang mae ri kau ngaseng lalang koasaNa Batara Isa.

³Iaminne Nakaerokia Allata'ala: Nikellaiko sollannu matangkasa' lalang tallasa'nu, untu' KalenNa siagang nupakabella kalennu battu ri a'gau' bawanga.

⁴Sikontu bura'ne-bura'ne niaka ri kau parallui naasseng antekamma carana attallasa' siagang bainenna siagang matangkasa' na baji', napakasannang atinNa Allata'ala siagang rupataua.

⁵Teako turuki hawa napasunu mae ri bainennu sangkamma nagaukanga tau kapere' tenaya naassengi Allata'ala.

⁶Ri anne passalaka, tea' laloko niakki appanggaukang sala yareka annipu mae ri sari'battanna. Pirangalloang le'ba'mi napau sitojeng-tojenna ikambe mae ri kau ngaseng angkanaya laNahukkungi Batara sikontu tau anggaukangai kasalang kammaya anjo.

⁷Nakiokki' Allata'ala, teai sollanta a'gau' bawang lalang ri katallassanta, passangalinna sollanta attallasa' mappakasannang mae ri atinNa Allata'ala.

⁸Lanri kammana, inai-nai taeroka antarimai anne pangngajaranga, teai rupataua tanatarimaya, passangalinna Allata'ala ampassareangai Roh matangkasa'Na mae ri kau ngaseng.

⁹Tenamo naparallu ikambe antulisiki mae ri kau ri passala' antekamma batenu musti angkamaseangi sikamma sari'battang julu tappa'nu. Le'ba' mako niajara' ri Allata'ala sollannu massing sikamaseang.

¹⁰Na anjo passalaka le'ba'mi nupappicinikang mae ri sikamma sari'battang julu tappatta ri sikontu butta Makedonia. Jari, sari'battangku ngaseng, napala' tojeng-tojengi ikambe mae ri kau ngaseng, sollannu pila' a'jari la'bi baji' lalang ri katallassannu.

¹¹Usahako sollanna nupakasannang tallasa'nu, siagang teako pantama'-tamakki kalennu ri urusanna tau maraenga. Paralluko anjama, nanuboya lanukatallassanga, sangkamma le'baka naparentakang ikambe mae ri kau ngaseng ri pirangalloang.

¹²Punna kamma ngaseng anjo batenu attallasa', tenamo nulatanjeng mae ri tau maraenga untu' katallassannu; siagang lanianggara' tommako ri tau tenayapa natappa' mae ri Almasi.

¹³Sikamma sari'battangku; kikellaiko sollanna nuasseng antekamma sitojenna ri passala'na tau mateamo; sollanna tena nasi'na pa'mai'nu sangkamma tau maraenga, tenaya panrannuanna.

¹⁴Tappa' maki' angkanaya le'ba'mi mate Isa Nattallasa' poleang ammotere'. Iaminjo saba'na nakitappa' tommo angkanaya laNapattallasa' poleangi Allata'ala sikontu tau matea lalang KalenNa Isa, iamintu sikontu tau tappaka mae ri Ia, sollanna attallasa' tommo ke'nanga lalang ri Ia.

¹⁵ Untu' anjo passalaka, iaminne pangngajara'Na Batara, eroka napabattu ikambe mae ri kau ngaseng: Punna battu sallang Isa, ikatte tau attallasaka ija talanipilumbayai tau la'bi rioloa mate.

¹⁶Punna sallang naung KalenNa Isa battu ri suruga, lakkio' lompoi malaeka' lompoa siagang lanipasa'rai tarompe'Na Allata'ala untu' a'jari pammatei. Nampa nipabangung la'bi riolo tu Karistenga.

¹⁷Le'baki anjo, ikatte tau attallasaka ija anjo wattua lanipasiangka' ngasengki' siagang ke'nanga antama' ri rammanga untu' mange assibuntulu' siagang Batara. Nampa lammantang maki' siagang Batara sa'genna satunggu-tungguna.

¹⁸Lanri kammana anjo, paralluko massing sipakajarre' ri tappa'nu lalang ri anne kana-kana kammaya.