Read Makassar Version – KITTA' MATANGKASA YOSUA 10 Bible Online

YOSUA 10 - Makassar Version – KITTA' MATANGKASA bible

YOSUA 10

¹Nalangngere' kabara'mi Adoni-Zedek, iamintu karaenga ri Yerusalem, angkanaya le'ba'mi nabeta siagang naancuru' taba sikali Yosua kota Ai, kammayatompa nabunoi karaenna sangkamma le'baka nagaukang mae ri Yerikho siagang karaenna. Nalangngere' tommi kabara'na angkanaya le'ba'mi tu Gibeon appare' parjanjiang passari'battangngang siagang tu Israel kammayatompa ammantammi ri tangnga-tangngana ke'nanga.

²Teaimi sipato' malla'na pandudu'na Yerusalem, nasaba' anjo Gibeon kota lompo; sangkammai lompona siagang kota-kota niaka karaenna, ba'lalo lompoangangi nakota Ai. Manna taunna sangnging tau barani siagang tau cara'de' a'bundu'.

³Lanri kammana anjo nia'mo tau nasuro Adoni-Zedek mange ri Karaeng Hoham ri Hebron, Karaeng Piream ri Yarmut, Karaeng Yafia ri Lakhis, siagang Karaeng Debir ri Eglon, ampabattui anne pasanga,

⁴“Maeko nanubantua' ambunduki Gibeon, nasaba' le'ba'mi taunna appare' parjanjiang passari'battangngang siagang Yosua na tu Israel.”

⁵Jari asse'remi anjo limaya karaeng Amori, iamintu karaeng Yerusalem, Hebron, Yarmut, Lakhis siagang Eglon, nampa a'lampa ke'nanga siagang sikontu tantarana ke'nanga allipungi siagang ambunduki Gibeon.

⁶Nakirimmi tu Gibeon anne kabaraka mange ri Yosua ri pakkemaang Gilgal, angkana, “Teaki' balang parekangi kale-kalenna ikambe karaeng! Battu maki' linta' ambantui ikambe, nasaba' asse'remi tantara battua ri sikontu karaeng Amori ri daera pa'monconganga untu' angngewai ikambe!”

⁷Nampa Yosua siagang sikontu tantarana, kammayatompa pasukang-pasukang kaminang baji'na, a'lampami battu ri Gilgal untu' mange a'bundu'.

⁸Nakana Batara ri Yosua, “Teako mallakki mae ri ke'nanga. Le'ba'mi Kupattantu laKupassareang pammetanga mae ri kau; lanri kammana anjo tena manna sitau ri ke'nanga akkulle attahang angngewako.”

⁹Sipattangi bujuru' Yosua siagang pasukanna a'gio' battu ri Gilgal mange ri Gibeon, nampa nabunduki silalonna tu Amori.

¹⁰Nipa'jari lingumi ri Batara anjo tu Amoria ri wattunna nacini' ke'nanga tantara Israel. Jai tu Amori nibuno ri Gibeon, siagang anjo attallasaka ija niondangi naung ri pungku'na monconga ri Bet-Horon sa'genna mange ri Azeka siagang Makeda bellana patimboro'na.

¹¹Ri wattunna naung tu Amori battu ri pungku'na anjo monconga ampilari tantara Israel, appaturummi Batara bosi es lompo battu ri langika antujui ke'nanga ri aganga sa'genna mange ri Azeka. Jaiangngangi anjo mate nitujua ri es kala nibunoa ri tu Israel.

¹²Anjo alloa ri wattunna Nasare Batara pammetang tu Israel mae ri Amori, a'bicarami Yosua mae ri Batara. Na ri dallekanna tu Israel, nakanamo Yosua, “E, mataalloa! Ammantangko irateanna Gibeon; Na ikau bulanga! Teako a'letteki battu ri rateanna Ka'bung Ayalon.”

¹³ Jari ammantammi mataalloa siagang ta'lettekami bulanga sa'genna le'ba' tu Israel ambetai sikamma musu-musunna. Anne kajarianga niaki tattulisi' lalang ri Kitta' Yasar. Siallo bujuru' ammantang alloa ri tangnga-tangngana langika, siagang sallo sikali nampa labu.

¹⁴Tale'bakai kajariang siagang tena le'bakai lakajariang se'rea allo kamma anjo, angkanaya napinawangi Batara ero'na rupataua. Niaki Batara angngagangi tu Israel a'bundu'!

¹⁵Le'baki anjo pa'bundukanga, asse'remi ammotere' Yosua siagang tantarana ri pakkemaanga ri Gilgal.

¹⁶Mingka ta'lappasaki anjo limaya karaeng Amori nampa accokko ke'nanga lalang ri kali'bong baru ri Makeda.

¹⁷Niciniki ke'nanga ri taua, nampa napauang anjo tampa' paccokkoanna ke'nanga mae ri Yosua.

¹⁸Nakanamo Yosua, “Gulungi anne batu-batu lompoa mange ri bawana anjo kali'bong batua, siagang suroi tantaraya a'jaga anjoreng,

¹⁹mingka teako ammantangngi anjoreng. Ondangi turus, bunduki ke'nanga battu ri boko; teako lappassangi ke'nanga antama ri kota-kotana ke'nanga! Le'ba'mi Napattantu laNapassareang Karaeng Allata'alanu pammetanga ri kau mae ri ke'nanga.”

²⁰Nabunomi Yosua siagang tu Israel tu Amoria, mingka nia' todong ri ke'nanga lari mange ri kotana ke'nanga, sa'genna tena nibunoi.

²¹Nampa ammotere' ngasemmo tantarana Yosua siagang salama' mange ri Yosua ri pakkemaanga ri Makeda. Tena manna sitau ri anjo pa'rasanganga barani akkana angngewai tu Israel.

²²Le'baki anjo nakanamo Yosua, “Kamma-kamma anne sungkemi anjo bawana kali'bong batua nampa erangi mae anrinni anjo limaya karaeng.”

²³Nisungkemi anjo kali'bong batua, nampa nierang assulu' karaeng-karaeng Yerusalem, Hebron, Yarmut, Lakhis siagang Eglon,

²⁴na nierang mange ri Yosua. Nampa nakio'mo Yosua battu asse're sikontu tu Israel, na nasuro ngaseng sikamma perwira amminawanga siagang ia a'bundu' battu angngonjokangi kallonna anjo limaya karaeng. Battu ngasemmi sikamma perwira na naonjokang kalonna anjo limaya karaeng.

²⁵Le'baki anjo nakanamo Yosua mae ri sikamma perwiraya, “Teako lussakki siagang teako mallakki. Paralluko tappa' siagang barani, nasaba' kammaminne caraNa Batara langgauki sikontu musunnu.”

²⁶Nampa nabuno Yosua anjo limaya karaeng nagentung ri lima benteng. Niboli'mi maya'na anjoreng sa'genna karueng.

²⁷Ri wattunna labumo alloa, situru' parentana Yosua, nipanaummi anjo sikamma mayaka nampa nipasambila antama ri anjo kali'bong batu le'baka napammantangngi ke'nanga accokko. Nampa nijempang siagang batu-batu lompo bawana anjo kali'bong batua. Sa'genna kamma-kamma anne nia' iji anjo batu-batua anjoreng.

²⁸Anjo alloa nabundukimi Yosua kota Makeda, na nabetamo anjo kotaya siagang karaenna. Nabuno ngasemmi sikontu pandudu'na; tena manna sitau nilappassang attallasa'. Nagaukammi Yosua mae ri anjo karaeng Makeda sangkamma apa le'baka nagaukang mae ri karaeng Yerikho.

²⁹Le'baki anjo, a'gio'mi Yosua siagang tantarana turus battu ri Makeda mange ri Libna nampa nabunduki Libna.

³⁰Nisare tommi pammetang tu Israel ri Batara mange ri anjo kotaya siagang karaenna. Tena manna sitau nilappassang attallasa'; sikontu tau niaka ri anjo kotaya nibuno ngasengi. Nagaukammi Yosua mae ri anjo karaeng Libna sangkamma apa le'baka nagaukang mae ri karaeng Yerikho.

³¹Nampa maju Yosua siagang tantarana battu ri Libna mange ri Lakhis. Nalipummi ke'nanga anjo kotaya nampa nabunduki.

³²Nisaremi pammetang ri Batara tu Israel mae ri Lakhis lalang pa'bundukang ri allo makaruaya. Apa nagaukang ke'nanga ri Libna, kamma tomminjo nagaukang ke'nanga ri Lakhis; tena manna sitau nilappassang attallasa', yangasenna nibunoi.

³³Battui Horam, iamintu karaeng ri Gezer ambantui Lakhis, mingka nibeta tongi siagang tantarana ri Yosua; tena manna sitau ammantang, kabusu'na mate ngasengi.

³⁴Le'baki anjo, majumi Yosua siagang tantarana battu ri Lakhis mange ri Eglon, nampa nalipung siagang nabunduki anjo kotaya.

³⁵Ia memanji anjo alloa nanaalle Eglon, siagang nabuno sikontu tau niaka anjoreng sangkamma nagaukanga ke'nanga ri Lakhis.

³⁶Battu ri Eglon, angngambiki Yosua siagang tantarana ri pa'monconganga nampa a'lampa mange ri kota Hebron, nampa nabunduki

³⁷siagang naalle anjo kotaya. Nabunomi karaenna siagang sikamma tau niaka anjoreng ri kotaya kammayatompa ri kota-kota maraenga ia niaka ri tammulilina. Naancuru' taba sikalimi Yosua anjo kotaya sangkamma nagaukanga mae ri kota Eglon. Tena manna sitau nalappassang attallasa' anjoreng.

³⁸Le'baki anjo, ammotere'mi Yosua siagang tantarana nampa nabunduki kota Debir.

³⁹Naallemi Yosua anjo kotaya siagang karaenna kammayatompa sikontu kota maraeng niaka ri tammulilina. Nibuno kabusuki taua anjoreng. Nagaukammi Yosua mae ri Debir siagang karaenna sangkamma apa le'baka nagaukang mae ri Hebron siagang Libna kammayatompa karaenna.

⁴⁰Sikontu anjo pa'rasanganga nibeta ngasemmi ri Yosua. Nabetai anjo sikamma karaenga ri daera pa'monconganga, ri pungku'na bulu'-bulu' irayaya, ri bangkenna moncong-moncong bageang ilauka, kammayatompa ri parang-parang bageang timboroka. Tena manna sitau nalappassang attallasa'; nibuno kabusuki. Anjo kammaya situruki parenta battua ri Batara, Allata'alana Israel.

⁴¹Nabetai Yosua daera-daera battua ri Kades-Barnea ri bageang timboro' sa'genna mange ri Gaza ri ampi'na daera biring tamparanga, kammayatompa sikontu daera Gosyen, tulusu' sa'genna mange ri Gibeon bageang wara'.

⁴²Lalang sikali bawang pa'bundukang na nabeta ngaseng Yosua sikamma anjo karaenga siagang naalle daera-daera kakoasanna ke'nanga, lanri Batara, Allata'alana Israel a'bundu' untu' tu Israel.

⁴³Le'baki anjo ammotere'mi Yosua siagang tantarana mange ri pakkemaanga ri Gilgal.