Read Makassar Version – KITTA' MATANGKASA YOSUA 11 Bible Online

YOSUA 11 - Makassar Version – KITTA' MATANGKASA bible

YOSUA 11

¹Nalangngereki kabara'na Karaeng Yabin battu ri Hazor ri passala'na sikamma pammetanna tu Israel, nia'mo tau nasuro mange ri Karaeng Yobab ri kota Madon, mange karaeng-karaeng kota Simron siagang Akhsaf,

²mange ri karaeng-karaeng niaka ri pa'moncongang bageang wara', ri Ka'bunna Yordan ri bageang timboranna Galilea, ri daera pa'moncongang, siagang ri daera biring tamparanga ri ampi'na Dor.

³Nia' tommo tau nasuro mange ri tu Kanaan niaka ri bageang ilau' siagang ri bageang rayanganna Yordan, mange ri tu Amori, Het, Feris, siagang tu Yebus ri daera pa'monconganga, kammayatompa tu Hewi ri bangkenna Moncong Hermon ri daera Mizpa.

⁴Na battu ngasemmo anjo sikammaya karaeng siagang massing tantarana ke'nanga ia sannaka jaina rapang kassika ri biring tamparanga. Manna jaranna siagang kareta pa'bundukanna ke'nanga sanna todong jaina.

⁵Asse'remi anjo sikammaya karaenga siagang battu ngasemmi appare' tampa' ri ampi'na Kaloro' Merom, untu' ambunduki tu Israel.

⁶Nakanamo Batara mae ri Yosua, “Teako mallakki mae ri ke'nanga. Ri wattu kamma-kammaya anne ammuko, le'ba' ngasemmi Kubuno ke'nanga lanri tu Israel. Musti nupesoki jaranna ke'nanga, siagang musti nutunui kareta-kareta pa'bundukanna ke'nanga.”

⁷Jari nabundukimi Yosua siagang tantarana anjo musua, iamintu nabunduki silalonnai ri ampi'na Kaloro' Merom.

⁸Nanisaremo pammetang tu Israel ri Batara. Nabundukimi tu Israel siagang naondammi ke'nanga sa'genna Misrefot-Maim siagang Sidon bellana pawara'na, siagang sa'genna mange ri Ka'bung Mizpa patimboro'na. Tulusu' heba'na anjo pa'bundukanga sa'genna tena manna sitau musu ammantang tassesa, yangasenna mate kabusuki.

⁹Nagaukammi Yosua mae ri ke'nanga situru' apa Naparentakanga Batara: napesoki jaranna ke'nanga, siagang natunui kareta-kareta bundu'na ke'nanga.

¹⁰Le'baki anjo ammotere'mi Yosua, nampa naalle Hazor, iamintu kakaraengang kaminang kassaka ri sikontu kakaraengang niaka anjoreng anjo wattua. Natunumi anjo kotaya, kammayatompa nabunoi karaenna siagang sikontu pandudu'na; tena manna sitau nalappassang attallasa'.

¹²Sikontu anjo kota-kotaya naalle ngasemmi Yosua, siagang najakkala'mi na nabuno sikontu karaenna situru' parentana Musa, anjo atanNaya Batara.

¹³Mingka kota-kota nibangunga irate ri rumbangnganga, tena manna se're natunu tu Israel, pantaranganna kota Hazor nitunua ri kalenna Yosua.

¹⁴Sikontu pandudu'na anjo kotaya nibuno ngasemmi; tena manna sitau nilappassang attallasa'. Mingka sikontu barang-baranna niaka anggaranna siagang olo'-olo' piarana niallei ri tu Israel nampa nakammai ke'nanga.

¹⁵Sikontu apa Naparentakanga Batara mae ri Musa, atanNa, le'ba'mi napabattu Musa mae ri Yosua, siagang nagaukammi Yosua; tena manna se're tanagaukang.

¹⁶Naalle ngasengi Yosua anjo pa'rasanganga — daera pa'moncongang, daera bangkeng moncong, baji' niaka ri bageang wara' kammayatompa niaka ri bageang timboro'; kammayatompa sikontu daera Gosyen siagang daera parang kalotoroka ri bageang timboro'na Gosyen, siagang Ka'bung Yordan.

¹⁷Luara'na anjo daeraya appakkaramulai battu ri Pa'moncongang A'gondoloka ri bageang timboro' ri ampi'na Edom, sa'genna wara' ri Baal-Gad ri Lappara' Libanon ri timboranna Moncong Hermon. Sallo sikali Yosua a'bundu' siagang sikamma karaeng niaka anjoreng ri daeraya, mingka kale'bakkanna najakkala'mi siagang nabuno ngasemmi ke'nanga.

¹⁹Battu ri sikontu kota-kota niaka ri anjo daeraya, tena manna se're kota appare' parjanjiang passari'battangang siagang tu Israel, pantaranganna Gibeon, kotana bansa Hewi. Sikontu kota maraenga nibetai lalang pa'bundukang.

²⁰ Nipa'jari terasaki pa'mai'na ke'nanga ri Batara untu' a'bundu' siagang tu Israel, sollanna niancuru' ke'nanga, siagang nibuno tanikamaseang situru' parentaNa Batara mae ri Musa.

²¹Iatommi anjo wattua na'lampa Yosua mange angngancuruki bansa Enak, iamintu bansa lompo tinggia ngaseng kalenna, niaka ammantang ri daera pa'moncongang — ri Hebron, Debir, Anab, siagang ri sikontu daera pa'monconganna Yehuda siagang Israel. Nibuno ngasengi ke'nanga ri Yosua, siagang niancuru' ngasengi kota-kotana ke'nanga.

²²Tena manna sitau battu ri bansa Enak ammantang tassesa ri daera Israel; ia mami niaka iamintu niaka ri Gaza, Gat, siagang Asdod.

²³Sikontu anjo pa'rasanganga naallei Yosua situru' parentaNa Batara mae ri Musa, nampa nipassareang mae ri bansa Israel untu' napatang ke'nanga. Nibage-bagei anjo pa'rasanganga, na massing-massing sukua anggappai tasse're bageang. Ammarimi bansa Israel a'bundu' siagang amammi nasalewang pa'rasanganna.