Read Makassar Version – KITTA' MATANGKASA YOSUA 13 Bible Online

YOSUA 13 - Makassar Version – KITTA' MATANGKASA bible

YOSUA 13

¹Kamma-kamma anne toa sikalimi Yosua. Nakanamo Batara ri Yosua, “Toa mako Yosua! Mingka jai iji daera musti nualle:

²sikontu daera Filistin siagang Gesur,

³kammayatompa sikontu daera Awi a'lampa timboro'. (Daera battu ri Binanga Sikhor ri pa'baeng-baenna Mesir sa'genna mange ri pa'baeng-baenna Ekron ri bageang wara', yangasenna anjo antamaki daerana bansa Kanaan; siagang karaeng-karaenna tu Filistin ammantangi ri Gaza, Asdod, Askelon, Gat siagang Ekron.)

⁴Kammayatompa musti nialle iji iamintu: sikontu daera Kanaan siagang Meara (daerana bansa Sidon), sa'genna mange ri Afek ri pa'baeng-baenna daera bansa Amori;

⁵nampa daera bansa Gebal, siagang sikontu daera Libanon a'lampa anrai', battu ri Baal-Gat ri bageang timboranna Moncong Hermon, tulusu' mange ri oloang mangea ri Hamat.

⁶ Antama tongi sikontu daerana tu Sidon, niaka ammantang ri daera pa'moncongang ri alla'na moncong-moncong Libanon siagang Misrefot-Maim.” Nakana Batara, “Sikontu anjo bansa-bansaya laKubongkai sallang, ri wattunna nibunduki ke'nanga ri tu Israel. Anjo buttaya musti nubage-bagei mae ri umma' Israel untu' a'jari butta pisakana ke'nanga, sangkamma le'baka Kuparentakang mae ri kau.

⁷Jari, kamma-kamma anne bage-bagemi anjo buttaya mae ri salapanga suku lalang ri bansa Israel, siagang mae ri bageruanna suku Manasye, sollanna a'jari butta pisakana ke'nanga.”

⁸ Suku Ruben siagang suku Gad kammayatompa bageruanna suku Manasye, le'ba'mi annarima bageang butta battu ri Musa, anjo atanNa Batara; iamintu butta niaka irayanganna Binanga Yordan.

⁹Daerana ke'nanga iamintu antamaya Aroër (ri birinna Ka'bung Binanga Arnon), siagang kota niaka ri tangnga-tangngana anjo ka'bunga. Kammayatompa sikontu daera lappara' tinggia battu ri Medeba sa'genna mange ri Dibon

¹⁰siagang sa'genna mange ri pa'baeng-baenna daera Amon, siagang sikontu daera le'baka nakoasai Sihon, karaeng Amori, niaka ri Hesybon.

¹¹Kammayatompa antama tongi daera Gilead, daera ri tammulilina Gesur siagang Maakha, kammayatompa sikontu Moncong Hermon, siagang sikontu daera Basan sa'genna mange ri Salkha.

¹²Daerana ke'nanga antama tongi daera kakoasanna Karaeng Og, karaeng kala'busanna tu Refaim, ammarentaya ri Asytarot siagang Edrei. Le'ba'mi nabeta Musa anjo bansa-bansaya siagang nabongka ke'nanga assulu' battu ri daerana ke'nanga.

¹³Mingka pandudu'na Gesur siagang Maakha tena nabongkai tu Israel; ammantangiji ke'nanga ri Israel.

¹⁴ Suku Lewi tena nannarima bageang butta battu ri Musa, nasaba' le'baki Napau Batara mae ri Musa angkanaya pambageanna suku Lewi iamintu battua ri koro'bang-koro'bang nitunua ri tampa' pakkoro'bangnganga untu' Karaeng Allata'alana Israel.

¹⁵Siapa are bageang battu ri butta Napa'janjianga Batara mae ri umma' Israel le'ba'mi napassareang Musa mae ri kaluarga-kaluarga niaka lalang ri suku Ruben, untu' a'jari butta pisakana ke'nanga.

¹⁶Daerana ke'nanga iamintu Aroër (ri birinna Ka'bung Binanga Arnon) siagang kota niaka ri tangnga-tangngana anjo ka'bunga sa'genna mange ri anjo daera lappara' tinggia, ri tammulilina Medeba;

¹⁷kammayatompa Hesybon na sikontu kota ri anjo lappara' tinggia iamintu: Dibon, Bamot-Baal, Bet-Baal-Meon,

¹⁸Yahas, Kedemot, Mefaat,

¹⁹Kiryataim, Sibma, Zeret-Hasahar niaka irate ri bulu'na anjo ka'bunga,

²⁰Bet-Peor, pungku'-pungku'na Moncong Pisga, siagang Bet-Yesimot.

²¹Nampa antama tongi sikontu kota niaka ri anjo lappara' tinggia, kammayatompa sikontu daera kakoasanna Sihon, karaeng bansa Amori, ammantanga riolo ri Hesybon. Manna ia siagang sikamma tu makoasaya ri Midian, iamintu: Ewi, Rekem, Zur, Hur siagang Reba, le'ba' ngasemmi nibeta ri Musa. Sikontu anjo tau makoasaya le'baki ammarenta ri anjo pa'rasanganga untu' Karaeng Sihon.

²²Battu ri sikontu anjo tau nibunoa ri bansa Israel nia' tongi Bileam ana'na Beor, anjo lapung pacinika.

²³Binanga Yordan a'jari pa'baeng-baeng ri bageang ilau'na daerana suku Ruben. Iaminjo kota-kota siagang desa-desa nipassareanga mae ri kaluarga-kaluarga niaka lalang ri suku Ruben untu' a'jari butta pisakana ke'nanga.

²⁴Siapa are bageang battu ri anjo butta Napa'janjianga Batara mae ri umma' Israel le'ba'mi nipassareang mae ri kaluarga-kaluarga niaka lalang ri suku Gad, untu' a'jari pisakana ke'nanga.

²⁵Antamaya daerana ke'nanga iamintu Yaezer siagang sikontu kotaya ri Gilead kammayatompa bageruanna daera battua ri bansa Amon sa'genna mange ri Aroër ri rayanganna Raba;

²⁶daera battua ri Hesybon sa'genna mange ri Ramat-Mizpa siagang Betonim, kammayatompa daera battua ri Mahanaim sa'genna mange ri pa'baeng-baenna Lodebar, yangasenna anjo antama tongi daera untu' suku Gad.

²⁷Ri Lappara'na Yordan anjo daerana suku Gad anjo antamaki Bet-Haram, Bet-Nimra, Sukot, siagang Zafon, iamintu sesa daera kakoasanna Karaeng Sihon ri Hesybon. Pa'baeng-baenna bageang lau'na daera suku Gad iamintu Binanga Yordan sa'genna mange ri Tamparang Galilea ri bageang wara'.

²⁸Iaminjo kota-kota siagang desa-desa nipassareanga mae ri kaluarga-kaluarga niaka lalang ri suku Gad untu' a'jari butta pisakana ke'nanga.

²⁹Siapa are bageang battu ri anjo butta Napa'janjianga Batara mae ri umma' Israel le'ba'mi napassareang Musa mae ri bageruanna kaluarga-kaluarga niaka lalang ri suku Manasye untu' a'jari pisakana ke'nanga.

³⁰Pa'baeng-baenna daerana ke'nanga sa'genna mange ri Mahanaim, kammayatompa sikontu daera Basan — iamintu sikontu daera kakoasanna Og, karaeng Basan, kammayatompa annampuloa kampong-kampong Yair ri Basan.

³¹Nampa antama todong bageruanna daera Gilead, siagang Asytarot siagang Edrei, iamintu ruaya ibukotana daera kakoasanna Karaeng Og ri Basan. Sikontu anjo daeraya nipassareangi mae ri bageruanna kaluarga-kaluarga jari-jarina Makhir, ana'na Manasye.

³²Kammaminjo batena Musa ambagei butta niaka irayanganna Yerikho, ri ba'leanna Binanga Yordan, ri wattunna nia' ke'nanga ri lappara' rawana Moab.

³³ Mingka suku Lewi tena nanggappa pambageang butta manna sike'de' battu ri Musa. Napaui Musa mae ri ke'nanga angkanaya pambageanna ke'nanga iamintu battua ri koro'bang-koro'bang nipassareanga mae ri Karaeng Allata'alana Israel.