Read Makassar Version – KITTA' MATANGKASA YOSUA 16 Bible Online

YOSUA 16 - Makassar Version – KITTA' MATANGKASA bible

YOSUA 16

¹Garisi'-garisi' pa'baeng-baenna butta nijo'joka untu' pambageanna jari-jarina Yusuf appakkaramulai battu ri Binanga Yordan ri ampi'na Yerikho, irayanganna sikamma timbuseng je'neka ri Yerikho sa'genna mange ri parang kassika. Battu ri Yerikho, anjo garisika naiki sa'genna mange ri Betel ri daera pa'monconganga.

²Battu ri Betel, anjo garisika a'lampa mangei ri Lus, allalo ri Atarot, iamintu tampa' pammantanganna tu Arki.

³Battu anjoreng anjo garisika a'lampa kalauki ri daerana golongang Yaflet, sa'genna mange ri Bet-Horon-Hilir, tulusu' mange ri Gezer, nampa kala'busang ri Tamparang Tangngaya.

⁴Iaminjo daera nipassareanga mae ri suku Manasye siagang Efraim, jari-jarina Yusuf, untu' a'jari butta pisakana ke'nanga.

⁵Iaminne pa'baeng-baenna butta nipassareanga mae ri kaluarga-kaluarga niaka lalang ri suku Efraim. Ri bageang iraya, garisi' pa'baeng-baenna buttana ke'nanga appakkaramulai battu ri Atarot-Adar sa'genna mange ri Bet-Horon-Hulu,

⁶nampa tulusu' mange ri Tamparang Tangngaya. Mikhmetat niaki ri warakkanna. Timboranna, anjo garisi' pa'baeng-baenga a'lekkoi mange ri Taanat-Silo, nampa allalo battu iraya mange ri Yanoah.

⁷Battu ri anjo garisika naungi mange ri Atarot siagang Naharat, nampa tulusu' a'biring ri Yerikho siagang kala'busang ri Binanga Yordan.

⁸Ri bageang ilau', anjo garisi' pa'baeng-baenna Efraim appakkaramula battu ri Tapuah sa'genna ri pangka Binanga Kana, nampa kala'busang ri Tamparang Tangngaya. Iaminjo butta nipassareanga mae ri kaluarga-kaluarga battua ri suku Efraim, untu' a'jari pisakana ke'nanga,

⁹kammayatompa siapa are kota ca'di siagang desa niaka lalang ri wilayah Manasye.

¹⁰ Mingka suku Efraim tena nanabongkai tu Kanaan battu ri daera Gezer. Iaminjo saba'na nasa'genna kamma-kamma anne nia' iji tu Kanaan ammantang ri Gezer sipammantangngang siagang tu Efraim, mingka nipassai ke'nanga anjama salaku ata mae ri tu Efraim.