Read Makassar Version – KITTA' MATANGKASA YOSUA 24 Bible Online

YOSUA 24 - Makassar Version – KITTA' MATANGKASA bible

YOSUA 24

¹Napasse'rei Yosua suku-suku bansa Israel ri Sikhem, nampa nasuro sikamma tau toa-toaya, sikamma pamimpinga, sikamma hakinga siagang sikamma perwira tantaraya battu andallekang. Jari battu ngasemmi ke'nanga andallekang ri Allata'ala.

² Nampa nakana Yosua mae ri ke'nanga, “Pilangngeri anne kananNa Batara, Allata'alana Israel mae ri kau, angkanaya, ‘Riolo dudu, boe-boenu anjorengi ammantang ri ba'leanna Binanga Efrat, siagang anynyombai ri rewata-rewataya. Kalase'renna battu ri ke'nanga iamintu Terah, manggena Abraham siagang Nahor.

³ Nampa Kualle Abraham, anjo boe-boenu, battu ri anjo pa'rasangang ba'leanna Binanga Efrat, nampa Kusuro alla'bang anjappai sikontu pa'rasangang Kanaan. Kusarei jai turungang. Uru-uruna Kupassareangi Ishak mae ri ia,

⁴ nampa Kusare anjo Ishak rua ana', iamintu Yakub siagang Esau. Anjo Esau Kusarei daera pa'moncongang Edom a'jari pisakana, mingka Yakub, anjo boe-boenu, a'letteki mange ri Mesir, siagang ana'na ngaseng.

⁵ Nampa Kusuroi Musa siagang Harun ampitujui bala lompo pa'rasangang Mesir, nampa Kupasulukko battu anjoreng.

⁶ Kuerangi boe-boenu assulu' battu ri Mesir, nampa niondang ke'nanga ri tu Mesir siagang kareta bundu' kammayatompa tantara a'jarang. Na ri wattunna battu anjo boe-boenu ri Tamparang Alara',

⁷akkio'mi ke'nanga appala' tulung mae ri Nakke. Jari Kupa'jari sassammi tampa' ansimbangai ke'nanga siagang tu Mesir, siagang Kutambungi je'ne' tamparang anjo tu Mesirka sa'genna mate tallang ngaseng. Nuasseng ngasemmi sikontu apa Kugaukanga mae ri Mesir. Sallo sikaliko ammantang ri parang kassika.

⁸ Nampa Kuerangko mange ri pa'rasangang tu Amori, niaka ammantang irayanganna Binanga Yordan. Nabundukiko ke'nanga, mingka iNakke ansareko pammetang mae ri ke'nanga. Nuallei pa'rasanganna ke'nanga, siagang iNakke angngancuruki ke'nanga.

⁹ Nampa karaeng Moab, iamintu Balak ana'na Zipor angngewako. Nasuroi taua a'lampa mange ri Bileam ana'na Beor na napala' ri ia sollanna natunraiko.

¹⁰Mingka tena naKuturukiang ero'na Bileam, na nabarakkakiko. Kammaminjo naKupasalamakko battu ri Balak.

¹¹ Nampa a'limbangko ri Binanga Yordan, nubattu mange ri Yerikho. Nibundukiko ri tu Yerikho, kammayatompa ri tu Amori, ri tu Feris, ri tu Kanaan, ri tu Het, ri tu Girgasi, ri tu Hewi siagang ri tu Yebus. Mingka Kusareko pammetang mae ri yangasenna anjo ke'nanga.

¹² Ri wattunnu maju ambunduki ke'nanga, Kupa'jari lingui ke'nanga siagang Kupa'jari mallaki ke'nanga, sa'genna larimo anjo ruaya karaeng tu Amori napakamma malla'. Teai pa'dannu siagang teai todong pananu assareko pammetang.

¹³ Anjo butta Kupassareanga mae ri kau ngaseng nutarimai natanukaresoi. Siagang anjo kota-kota Kupassareanga mae ri kau, teai ikau ambangungi. Mingka kamma-kamma anne ikaumi ammantang anjoreng, siagang ikau ngaseng tommi angkasiaki rappo anggoro'na siagang rappo zaitunna, nampa teai ikau allamungi.’ ”

¹⁴Nakanamo pole Yosua, “Jari, kamma-kamma anne pakala'biriki Batara. Anynyombako mae ri Ia silambusu'na pa'mai'nu siagang pa'mai' tamamminraya. Pakabellai rewata-rewata nasombaya riolo boe-boenu ri Mesopotamia siagang ri Mesir. Anynyombako ri Batara bawang.

¹⁵Ebara' angkana taerokako anynyomba mae ri Batara, pilei memammi anne alloa, angkana inai lanusomba: rewata-rewata nasombaya boe-boenu riolo ri Mesopotamia yareka rewata-rewatana tu Amori nupammantangngia pa'rasanganna kamma-kamma anne. Mingka ikambe, iamintu inakke siagang sikontu kaluargaku, Batara bawang lakusomba.”

¹⁶Appialimi umma' Israel angkana, “Tena sikalia nala'boko ikambe battu ri Batara untu' anynyomba mae ri rewata-rewataya!

¹⁷Karaeng Allata'alata le'ba' allappassangi boe-boeta siagang pole kalenta battu ri nipare' ataya ri Mesir. Le'ba'mi nicini' sikamma gau' malompo Nagaukanga Batara. Tuli Nala'langngiki' Batara lalang sikontu pa'jappanta allaloi sikamma pa'rasangang tu maraenga.

¹⁸Na ri wattunna nipantamakki anne pa'rasanganga, Nabongka ngasengi Batara sikontu tu Amori niaka ammantang anrinni. Jari, eroki ikambe anynyomba mae ri Batara, nasaba' Iami Allata'alata.”

¹⁹Nampa nakana Yosua, “Mingka tena kapang nanukullei anynyomba mae ri Batara, nasaba' anjo Allata'ala matangkasaki, Tenaya Ruanna. Taerokai punna nia' nipa'rembangi. Punna nubokoi Batara nampa anynyombako ri rewata-rewataya, tena nalaNapammopporang dosanu. Kabalekanna, laNabaliangko siagang laNahukkungko. LaNaancuru' ngasengko manna pole riolo bajiki mae ri kau.”

²¹Jari appialimi tu Israel angkana, “Tena! Tena nalanynyomba ikambe mae ri rewata-rewataya. Batara bawang lanasomba ikambe!”

²²Nakanamo Yosua, “Punna kamma, kalennu tonji a'jari sa'bi angkanaya ikau tonji antappuki untu' anynyomba mae ri Batara bawang.” Appialimi ke'nanga angkana, “Kammatojengi, kalenna ikambe a'jari sa'bi.”

²³Angkanami Yosua, “Punna kamma paleng, pakabella ngasemmi rewata-rewatana bansa maraenga, ia niaka ri kau, siagang a'janji mako angkanaya talamamminrayai pa'mai'nu mae ri Batara, Allata'alana Israel.”

²⁴Nampa nakanamo anjo taua mae ri Yosua, “Ikambe Batara Allata'alata bawang lanisomba. Lanaturuki ikambe parenta-parentaNa.”

²⁵Jari anjo alloa appare'mi parjanjiang Yosua siagang umma' Israel ri Sikhem. Siagang anjoreng napassareammi mae ri ke'nanga sikamma hukkung-hukkung siagang paratorang-paratorang mustia naturuki ke'nanga.

²⁶Sikontu anjo hukkunga siagang paratorang-paratoranga natulisiki lalang ri Kitta' HukkunNa Allata'ala. Nampa angngalle se're batu lompo, na napaenteng irawanganna poko' kayu lompoa ri tampa' nisa'laka untu' Batara.

²⁷Le'baki anjo nakanamo Yosua mange ri yangasenna anjo taua, “Anne batua a'jari sa'bi mae ri katte. Sikontu kana-kana Napabattua Batara mae ri katte, le'ba'mi nipau ri dallekanna anne batua. Jari, iaminne batua la'jari sa'bi mae ri kau ngaseng, untu' ampiu'rangiangko sollanna tena nanuewai Allata'alanu.”

²⁸Kala'busanna nasuromi Yosua ammotere' ngaseng anjo taua; nampa ammotere' ngasemmo ke'nanga, massing mange ri buttana.

²⁹Nampa matemo anjo Yosua ana'na Nun, atanNa Batara, lalang umuru' sibilangngang assampulo taung.

³⁰ Nitarawangi ri butta kalenna ri Timnat-Serah, ri pa'moncongang Efraim, warakkanna Moncong Gaas.

³¹Lalang attallasa'na Yosua, anynyombai umma' Israel mae ri Batara. Kammayatompa ri wattunna matemo, tuli manynyombana ke'nanga mae ri Batara lalang nia'na ija ri alla'na ke'nanga sikamma pamimping le'baka anciniki kalenna sikontu apa le'baka Nagaukang Batara untu' umma' Israel.

³² Maya'na Yusuf, naeranga umma' Israel battu ri Mesir, nitarawangi ri Sikhem, iamintu butta naballia Yakub sibilangngang doe' pera' battu ri ana'-ana'na Hemor, manggena Sikhem. Anjo buttaya niwarisiki mae ri jari-jarina Yusuf.

³³Nampa mate tommo Eleazar ana'na Harun, na nitarawang ri Gibea, iamintu kota niaka ri daera pa'monconganna Efraim. Anjo kotaya le'ba'mi nipassareang mae ri Pinehas, ana'na Eleazar.