Read Makassar Version – KITTA' MATANGKASA YOSUA 5 Bible Online

YOSUA 5 - Makassar Version – KITTA' MATANGKASA bible

YOSUA 5

¹Sikontu karaenna tu Amori ilaukanna Binanga Yordan, siagang sikontu karaenna tu Kanaan ri birinna Tamparang Tangngaya nalangngereki kabara'na angkanaya le'baki Napa'jari kalotoro' Batara anjo je'ne'na Binanga Yordan lalang a'limbanna umma' Israel ri anjo binangaya. Jari a'jari malla'mi siagang annekkere'mi ke'nanga napakamma tu Israel.

²Anjo wattua angkanami Batara mae ri Yosua, “Apparekko lading battu ri batu, nampa apparekko upacara passunnakkang mae ri sikamma tu Israel.”

³Jari nagaukammi Yosua anjo apa Naparentakanga Batara, na nasunna'mo tu Israel ri se'reang tampa' niarenga Bulu' Passunnakkang.

⁴ Ri wattunna assulu' tu Israel battu ri Mesir, sikontu tu bura'nea le'ba' ngasemmi nisunna'. Mingka ri wattunna a'lampa ke'nanga alla'bang ri parang kassika patampulo taung sallona, manna sitau ana'-ana' bura'nea tania' nisunna'. Na ri wattunna kala'busanna anjo wattu patampuloa taung, sikamma tu bura'ne umuru' akkulleamo a'jari tantara ri wattunna assulu' ke'nanga battu ri butta Mesir, mate ngasemmi, lanri tenana namannuruki ri parentaNa Batara. Jari situru' sumpaNa Batara, tena Nanipa'biangi ke'nanga anciniki anjo pa'rasangang kalumanynyanga siagang butta coppong Napa'janjianga Batara mae ri boe-boena ke'nanga.

⁷Iaminjo saba'na natenapa nisunnaki sikontu ana'-ana' bura'nena ke'nanga. Iaminne turungang berua nisunna' ri Yosua.

⁸Ri le'ba'na ngasemmo ke'nanga nisunna', ammantammi ke'nanga ri kemaya sa'genna pia bokka'na ke'nanga.

⁹Nakana Batara mae ri Yosua, “Anne alloa le'ba'mi Kupa'lanynya' katunaannu ngaseng salaku ata-ata ri Mesir.” Iaminjo naniareng anjo tampaka Gilgal, battuanna nipa'lanynya', sa'genna kamma-kamma anne.

¹⁰ Lalang akkemana ri Gilgal, ri lappara' ambania ri Yerikho, napakalompomi umma' Israel Allo Lompo Paskaya ri wattu karuenna tanggala' sampulo angngappa' anjo bulanga.

¹¹Ammukona, bungasa' angnganremi ke'nanga wassele'na pa'rasangang Kanaan, iamintu: roti tenaya nammake pa'gambang siagang gandung nilangga.

¹² Anjo alloa tena memammo natu'guru' pole mannaya battu rate ri langika, siagang ammarimi tu Israel angnganre manna. Appakkaramula anjo wattua nakanremi ke'nanga wassele' buttana Kanaan.

¹³Ri se'reang wattu niaki Yosua ri ampi'na Yerikho. Ti'ring nia'mo nacini' sitau bura'ne ammenteng ri dallekanna angngerang pa'dang ta'bi'bu'. Nareppesimi Yosua anjo taua nampa akkuta'nang angkana, “Ikau anne agangko, yareka baliko?”

¹⁴Appialimi anjo taua angkana, “Teai agang, siagang teai todong bali. Inakke battua' mae anrinni salaku panglimana tantaraNa Batara.” Nalangngere'na Yosua pappialinna anjo taua, su'ju'mi anynyomba ri anjo taua. Angkanami Yosua, “Inakke anne atanta' karaeng. Apa akkulle kugaukang untu' ikatte?”

¹⁵Appialimi anjo panglima tantaraNa Batara angkana, “Sungkei sapatunu; antu butta nupammentengia iamintu butta matangkasa'.” Jari nasungkemi sapatuna Yosua.